Manpulong tan Sigpot a Mantasi
1 Bilang “pangulo tan managganggan,” impasal nen Jesus iray babangatan to parad malaknab a kimey a panagpulong a manatalaran ed sikara. (Isa. 55:4; Luc. 10:1-12; Gawa 1:8) Deneskribe nen apostol Pedro so kimey ya ingganggan nen Jesus ed sikara ed oniaran salita: “Imbilin to ed sikami so pampulong mi ed baley, tan mantasi a sikato so inggaton na Dios, ya ukom ed saray mabilay tan inatey.” (Gawa 10:42) Panon itayon sigpot a makapantasi?
2 Dakel so naaralan tayo diad pangonsidera ed alimbawa nen apostol Pablo. Oniay impanonot to ed saray mamasiken ed kongregasyon na Efeso sanen sikaray akituyawan to: “Anggapo so antokaman a pakapinabangan yo a pinaulyan ko ya impaliwawa ed sikayo tan imbangat ko ed sikayo a lapag, tan dia ed saray kaabungan, a pinatuak [“sigpot kon tinasian,” NW] ed saray Judios tan saray Griegos so pampataoli ed Dios, tan say pananisia ed Katawan tayo a Jesu-Kristo.” Anggaman susungdoan nen Pablo iray subok, nanggunaetan ton impasabi so maong a balita ed dakel a totoo anggad posibli. Sikatoy agkontento ed basta panginabang na manuna iran katuaan ed saray dumerengel to, noagta nanggunaetan to met ya impasabi so “amin a kalar na Dios.” Pian nagawaan to iya, sikatoy mabulos a nansagpot tan nansakripisyo. Inkuan to ni: “Anggapo so antokaman a pankawanan ko ed bilay ko a singa bengatla a pablien ko, daput nasumpal so akar ko, tan say betang ko ya inawat ko ed Katawan a Jesus, pian patuaen ko so ebanghelyo na grasya na Dios.”—Gawa 20:20, 21, 24, 27.
3 Panon tayon naalig so alimbawa nen Pablo natan? (1 Cor. 11:1) Diad pananap tayo ed saray makanepegan a totoo anggaman nipapaarap itayon mismo ed saray subok, diad panseet tayon ipasabi so maong a balita ed saray totoo ed amin ya etnikon grupo tan lenguahe, tan diad maseet a panulong ed interesadon totoo a naroromog tayo. (Mat. 10:12, 13) Mankakaukolan iya na panaon, sagpot, tan panangaro ed totoo.
4 Sarag Yo Kasi so Man-auxiliary Payunir? Saray bulan na Marso, Abril, tan Mayo so maabig a pankanawnawa pian sikayoy sigpot a makapantasi diad pan-auxiliary payunir. Agaylan makapaseseg a nen katantaon et dakel so talagan nansagpot pian man-auxiliary payunir!
5 Sakey a 80 años ya agin bii a masakit so asagyat ed panamaseseg ya intarya na organisasyon nen Jehova. Oniay insulat to: “Lalon asagyat so pampilalek ko ya abayag lan naliliknak, tan amoriak a nepeg koy man-auxiliary payunir lamet.” Denesidi toy man-auxiliary payunir ed Marso. Oniay inkuanto: “Say inmunan ginawak et yinmurong ak tan kinuentak so bili. Intongtong ko iya ed anak kon bii lapud kaukolan koy suporta to. Sinurprisa toak diad impangala to na aplikasyon a parad sikaton mismo.” Diad satan a bulan, say akulaw lan agi so akapangusar na 52 oras diad ministeryo. “Siak so aminpigan nampikasi ed si Jehova a pakasilen toak sano nakekesawan ak la. Diad mantapos na bulan et siak so malikeliket tan napnek, tan aminpigan akisalamatan koy Jehova lapud tinulongan toak. Labay kon salien lamet.” Say maliket ya eksperiensya to so nayarin mamaseseg ed saramay labalabay day man-auxiliary payunir anggaman mabeblay so laman da.
6 Sakey ya agin laki a biglan naandian na trabaho so anganamot ed pankanawnawa pian man-auxiliary payunir. Diad satan a bulan et sikatoy lalon sinmeseg ed panagpulong, tan diad mantapos na bulan et sikatoy akapangigapo na balon iyaaralan ed Biblia. Diad panmomolimoli ed eksperiensya to, oniay inkuanto: “Agaylan makapenek a bulan!” Alay liket to lapud sikatoy inwanwan tan tinulongan nen Jehova! On, sikatoy daakan a benendisyonan nen Jehova lapud pirmin impansagpot to diad ministeryo, tan ontan met so gawaen to ed sikayo.—Mal. 3:10.
7 Parad dakel, mairap so pan-auxiliary payunir. Anggaman kuan, anggano walaray responsabilidad da ed trabaho tan pamilya ra laktip la iray personal a problema, dakel ya agagin lalaki tan bibii so akapan-auxiliary payunir. Say sigpot a pantasi so mabetbet a mankabaliksay pangisakripisyo ed mablin panaon tan biskeg tayo, anggaman ontan saray bendisyon so agnaparaan.—Uli. 10:22.
8 Maabig iray bulan na Marso, Abril, tan Mayo parad pan-auxiliary payunir. Wala so limaran sampot-simba diad Marso tan limaran Sabado diad Mayo. Sakey ni, saraya so bakasyon na saramay maneeskuela. No anamoten so ekstra iran sampot-simba tan piesta-opisyal tan say pankimey a tunggal paminsan diad labi, makapan-auxiliary payunir so arum a mantratrabahon full-time. Kasin nausar yo so sakey ed saray nisuherin eskedyul parad auxiliary payunir a nitekep ed sayan artikulo ta pian niyeskedyul yo so 50 oras diad ministeryo legan na Marso, Abril, odino Mayo? Isingbat ed arum so eskedyul yo ta pian napaseseg met iran miulop ed sikayo diad ministeryo. No agkayo makapan-auxiliary payunir, manggawa kayo na espesipikon kalat parad sarayan bulan, tan suportaan iramay sarag day manpayunir. Manplano kayo la natan pian makapanpulong kayo a nagkalalo legan na Marso, Abril, tan Mayo.
9 Ipatnag so Apresasyon ed Panaon na Memoryal: Kada taon legan na panaoy Memoryal, nilibo so napapakiwas a ‘manaliw ed panaon’ pian sikaray makapan-auxiliary payunir lapud apresasyon da ed dondon. (Efe. 5:15, 16) Diad Pilipinas nen katantaon, walay 9,515 a nan-auxiliary payunir nen Marso, 15,458 nen Abril, tan 12,652 nen Mayo. Lapud satan et wala so promedyon 12,542 ed kada sakey ed saratan a bulan. Dakdakel itan no ikompara ed apalabas a serbisyon taon, a say promedyo na nan-auxiliary payunir et 1,691 ed kada sakey ed saratan met a bulan. Sayan panaon na Memoryal so maabig met a pankanawnawa pian nipatnag tayoy masimoon ya apresasyon tayo ed dondon bagat nen Kristo diad pibiang a nagkalalo ed lawak na ministeryo.
10 Legan a manasingger so Abril 16, morekdeken pa no antoy kabaliksan na Memoryal ed sikayo. Nonoten pa iray ebento ya angitonton ed impatey nen Kristo tan saray pamaakaran a pirmin nampagaan to. Dalepdepen pa met so gayagan niiyan ed arapan nen Jesus tan no panon a tinmulong itan ed sikato pian makapansungdo ed ontan a panagmaltrato. Morekdeken pa so peles a kipapasen to bilang Ulo na kongregasyon, a mangaasikaso ed panagpulong tan panaggaway babangatan. (1 Cor. 11:3; Heb. 12:2; Apoc. 14:14-16) Sirin, ipatnag so apresasyon yo ed amin a ginawa nen Kristo diad sigpot a pibiang ed panagpulong a kimey anggad posibli no iyaabuloy na sirkumstansya yo.
11 Pasesegey Arum Pian Sigpot a Mantasi: Diad pan-auxiliary payunir da, saray mamatatken tan ministeryal a lingkor so walad maabig a posisyon pian mamaseseg ed arum diad kongregasyon. Sano manpupulong a kaiba iray manangipalapag diad lawak na ministeryo tan sano manggagawa ira na panagpastol, naanamot dan mismo iratan a pankanawnawa pian tulongay arum a sigpot a mibiang ed sayan nikaduman kimey. Komon ta amin tayo so mangipikasi ed saya, pian diad ontan et napaelet tayo so nankakasakey iran sagpot tayo ed sigpot a panagtasi.
12 Anggaman amin a mamatatken tan ministeryal a lingkor so mikoopera ed saray uksoyan na kongregasyon parad apadaak a kimey legan na saray bulan na Marso, Abril, tan Mayo, say manangasikaso na serbisyo so nagkalautlan manggawa na matukoy iran uksoyan parad panag-ebanghelyon kimey. Kaukolan a sikatoy mangorganisa na saray lugar, agew, tan oras na pantitipon parad lawak na serbisyo a kombeniente ed karaklan a manangipalapag tan ipakabat iratan a naynay. Nayarin iyarunsa to so pantitipon diad nanduruman oras ed sanagew, pian amin ed kongregasyon so makapibiang ed nanduruman nengneng na panagtasi. Laktipen na saraya so pampulong ed pasen na negosyo, pampulong diad karsada, pankabkaabungan, panagpawil, tan pampulong panamegley na telepono. Likud ed satan, kaukolan toy mangiyarunsa parad malaem a suplay na literatura, magasin, tan teritorya a nakimeyan legan na saratan a bulan.
13 Say opresi ed Marso et say libron Pikakabat, tekep na kalat a nigapo iray panangiyaral ed Biblia. Naromog iray maabig a suhestion parad pangiyopresi ed libron Pikakabat diad insert na Mayo 2002 a Ministeryo Tayo ed Panarian. Say opresi ed Abril et saray magasin a Panag-Bantayan tan Awake! Salien ya usaren iray nisuherin presentasyon a naromog diad “No Anto so Ibaga Nipaakar ed Saray Magasin.” Amin so kaukolan a manparaan a maong pian sigpot a makapantasi.
14 Agaylay liket tayo a mankimey diad panangiwanwan na Ulo na kongregasyon, si Kristo Jesus, tan ed pribilehyon manginabang ed maong a balita ed arum! Legan a manasingger so bulan na Marso tan Abril, manseet itayo lamet a pagmaliwen iratan a sankaabigan a bulan parad sikatayo nen say kapiganman legan ya uunoren tayo so bilin nen Kristo a manpulong tan sigpot a mantasi.
[Kahon ed pahina 4]
Nanduruman Eskedyul Parad Pan-auxiliary Payunir ed Marso, Abril, tan Mayo 2003
Agew Oras
Lunes 1 2 — — 2 —
Martes 1 — 3 — — —
Mierkoles 1 2 — 5 — —
Huebes 1 — 3 — — —
Biernes 1 2 — — — —
Sabado 5 4 3 5 6 7
Simba 2 2 3 2 2 3
Marso 56 56 54 55 50 50
Abril 50 50 51 53 — —
Kasin matukoy ed sika so sakey ed sarayan eskedyul?