Iyabawag so Karlangan nen Jehova
1. Anto so mamapakiwas ed sikatayon iyabawag so karlangan nen Jehova?
1 “Kien mo, O Jehova, so kinabalgan, tan saray pakayari, tan say gloria; tan say palabo, tan say katageyan: ta amin a wala ed saray tawen tan dia ed dalin sikato so kien mo.” (1 Awa. 29:11) Anto so epekto ed sikatayo na panangaro tan apresasyon tayo ed si Jehova? Satan so mamapakiwas ed sikatayo a ‘mangibelyaw na karlangan na saman so angekal ed sikatayo ed kabilungetan, ta tinawag to itayo ed makapakelaw a silew to.’ (1 Ped. 2:9) Agtayo nitepel ya ag-ibaga ed arum so nipaakar ed makapanyarin-amin a Dios tayo! Legan na saray bulan na Marso, Abril, tan Mayo, dakel so pankanawnawa tayon iyabawag so karlangan nen Jehova.
2. Anto so niplanon espisyal a kampanya pian iyabawag so Memoryal, tan sioparay nayarin mibiang?
2 Espisyal a Kampanya Pian Iyabawag so Memoryal: Diad Lunes, Abril 2 et ipabitar tayo so karlangan nen Jehova diad panselebra tayo ed Pangdem na Katawan. Sakey ya espisyal ya imbitasyon na sayan importantin ebento so ibunog ed sankamundoan manlapud Marso 17 ya anggad Abril 12. Amin so napapaseseg a sigpot a mibiang ed saya. Marakep iyan panaon parad saray balo ni pian onggapon mangiyabawag ed maong a balita no bilang ta onkualipika la ra. No walaray iyaaralan yo na Biblia odino ananak yon onkualipika, asinggeran yo la iray mamatatken pian itongtong so nipaakar ed satan.
3. Antoy nayari tayon ibaga pian imbitaan iray totoo ya onatendi ed Memoryal?
3 Sayan kampanya et mipadpara ed samay ginawa nipaakar ed “Asingger lay Kililiktar!” iran Distrito Kombension. Pawitan iray kongregasyon na magenap iran imbitasyon ta pian kada manangipalapag et nawalaan na 50 a kopya. Pansiansiaen ya antikey so presentasyon yo, nayarin diad pangikuan: “Saya so imbitasyon yo parad sakey ya importantin tinaon ya ebento ya asingger lan nagawa. Sikayo so naabrasan maong. Lugan na sayan imbitasyon iray detalye.” Siempre, no bilang ta walaray tepet na unabung, ebatan iratan. Say materyal ed apendise nipaakar ed Pangdem na Katawan a naromog ed libron Ibabangat na Biblia ya onggapo ed pahina 206 so nayarin ontulong ed pangebat ed saratan. Iyopresi tayo ed saray sampot-simba iray kaplesan a magasin katekep na say espisyal ya imbitasyon. Irekord so siopaman ya interesado, tan iyuksoy so ipawil lamet.
4. Panon so pangibunog na saray espisyal ya imbitasyon parad Memoryal?
4 No nayadyari et personal ya iyawat ed kada unabung iyan espisyal ya imbitasyon. No melag labat so teritorya yo, irekord iramay abung ya anggapoy asabian yon too pian pawilen iratan ed saginonor. No baleg balet so teritorya na kongregasyon yo, nayarin desidien na saray matatken so maalwar lan pangitilak na saray imbitasyon ed saramay abung ya anggapoy asabian a too. Seguroen a naikdan met na imbitasyon iray papawilen yo, iyaaralan na Biblia, kakanayon, katrabahoan, kakaabay, tan arum niran kabat yo.
5. Akin a nepeg a natan la so panggawa tayo na saray plano parad panag-auxiliary payunir?
5 Panag-auxiliary Payunir: Sarag yo kasin sigpot ya iyabawag so karlangan nen Jehova diad pan-auxiliary payunir yo legan na Marso, Abril, tan Mayo? Pian nagawaan yo itan, nayarin kaukolan yon iyadyas so inagew-agew ya eskedyul yo. (Efe. 5:15-17) Seguradon nawalaan kayo na liket tan panamendisyon nen Jehova diad pansasagpot yon sikatoy nagkalalo nin panlingkoran. (Uli. 10:22) Lapud asingsingger lay Memoryal, natan la sirin so panaon pian manggawa na saray plano.—Uli. 21:5.
6. Anto so naaralan tayo ed eksperiensya na agin biin mantaon la na 90 a nan-auxiliary payunir nen katantaon?
6 Nanggayagaan na sakey ya agin biin mantaon na 90 so impan-auxiliary payunir nen katantaon. Inkuanto: “Anggano labalabay koy mantanaman tan gabay ko la komoy onggapon mantanem, amoriak a kaukolan kon iyarunsa no antoray nepeg kon iyuna. Lapud say pilalek ko et iyuna so Panarian, nandesidi ak a man-auxiliary payunir nen Marso.” Kasin atumangan iray impansagpot to? Oniay inkuanto: “Mas lalon aliknak a kabiangan ak na kongregasyon, tan saya so lalon amaapit ed siak ed si Jehova.” Nayari kasin amtaen tayo met no antoray prayuridad tayo insan manggawa na saray nakakaukolan a pananguman?
7. Kasin mairap so man-auxiliary payunir?
7 Say pangapet ed kakaukolanen a 50 oras parad auxiliary payunir so aliwan ontan kairap a singa ed abaloan mo. Tekepan moy pikakasi so pangonsideram ed saray aktibidad mo ed inagew-agew, insan ka manggawa na iskedyul tan isulat mo iratan. Sikan mismo so mikabisado ed saray sirkumstansyam. No maletey so laman mo tan mikekesaw ka, anganko et sarag moy manpulong na duay oras ed kada agew. No sigpot-panaon so trabahom odino maneeskuela ka, nayarin sarag moy man-auxiliary payunir diad pibiang mo ed ministeryo diad saray labi odino ed sampot-simba.
8. Anto so tinmulong ed sakey a sanasawa pian makapan-auxiliary payunir?
8 Ayarian na dakel a sankapamilyaan so nan-auxiliary payunir. Walay sakey a sanasawan piga-pigay taon a nansuyat a man-aplay lapud liknaen dan ag-iyabuloy itan na saray sirkumstansya ra. Balet, panon dan atalonaan itan? “Nampikasi kami ed si Jehova a tulongan to kamin nadampot so abayag lan labalabay min gawaen a sanasawa.” Diad dugan panangiplano et adampot da itan a kalat. Intuloy da ni: “Bali-bali so man-auxiliary payunir. Dakel so bendisyon ed sikami. Say suhestion mi et sali yo. Ta no agawaan mi itan, di sarag yo met.”
9. Anto so nayarin gawaen yo ed ontumbok a panagaral yo bilang pamilya pian makapanparaan parad onsabi iran bulan na espisyal a kimey?
9 Akin ya agmangigana na panaon ed ontumbok a panagaral yo bilang pamilya pian pantongtongan yo no panon a napalaknab na balang sakey so kimey to ed saray onsabin bulan? Anggano agkayo makapan-auxiliary payunir bilang interon pamilya, anganko et nagawaan itan na sakey a membro no mitulongan tan mikoopera so arum iran kapamilyaan. No andi, nayarin gawaen a kalat na pamilya yo so malaglaem a pibiang ed ministeryo ed sarayan espisyal a bulan a napnoy aktibidad.
10. Akin a kaukolan tayon itongtong ed arum so pilalek tayon man-auxiliary payunir ed sayan Memoryal?
10 Mantutulongan: Makaalis so ligsa. Itongtong moy pilalek mon man-auxiliary payunir. Ompan saya so mamaseseg met ed arum a man-aplay. Niarum ni, saramay akapanpayunir la so makapangiter na saray suhestion no panon mon niyuksoy iray kimey tan eskedyul mo ta pian nadampot moy kalat mo. (Uli. 15:22) No makapan-auxiliary payunir ka, sarag moy mangitagar na sakey a manangipalapag, nayarin samay kaparehom na kipapasen, pian nakaibam ed sayan makapaliket a kimey.
11. Panon a napaligsa na saray mamatatken iray arum a man-auxiliary payunir ed onsabi iran bulan?
11 Dakel a mamatatken so manggagawa na nakaukolan iran panangiyarunsa ta pian makapibiang met ira ed sayan espisyal a pribilehyo. (Heb. 13:7) Talagan makapaseseg iya ed kongregasyon! Napaligsa met na saray mamatatken so arum diad pitongtong da ed sikara. Nayarin say nakaukolan labat et pigaran makapaseseg a salita odino praktikal a suhestion pian napakiwas so arum a man-auxiliary payunir. Maseguron mangorganisa so manangasikaso na serbisyo na kaaruman iran pantitipon antis na kapapaway ta pian makapibiang so amin ed ingrupon panagpulong, anggan kayari na trabaho odino karitira ed eskuela. Nepeg ya ipaiyanunsio ton naynay irayan uksoyan. Seguroen to met a magenap so teritorya tan literatura parad amin.
12. Anto so nayarian yon gawaen no agyo sarag so man-auxiliary payunir?
12 Anggano agkayo makapanpayunir lapud saray sirkumstansya yo, napaseseg tan nipikasi yo iramay manpayunir. (Uli. 25:11; Col. 4:12) Anganko et niyarunsa yon aruman ni na sakey agew so kapapaway yo ed sakey simba odino manbayag kayo ni ed ministeryo pian napiulopan ira.
13. Anton kalat so niletneg parad Pilipinas, tan panon a makatulong so kongregasyon yo pian nadampot itan?
13 Say Kalat a 25,000 ya Auxiliary Payunir no Abril: Diad Pilipinas, adampot nen 1997 so sankatagyan a bilang na auxiliary payunir a 22,410. Kanian say makatunongan a kalat ed sayan onsabin Abril et 25,000 ya auxiliary payunir. Nadampot tayo itan no walay anggan 1 labat ed kada 6 manangipalapag ed balang kongregasyon a man-auxiliary payunir. Siempre, diad arum a kongregasyon et mas dakel so manangipalapag ya iyaabuloy na sirkumstansya ra so pakapan-auxiliary payunir. Diad tua et sankadampot na maslak a kongregasyon iyan kalat. Isipen pa labat so segseguradon liket ya ipagamor na saya ed kongregasyon yo tan say positibon epekto na saya ed panagpulong diad teritorya yo!
14. Akin a say Abril et marakep a bulan pian man-auxiliary payunir?
14 Akin a say Abril et marakep a bulan a pan-auxiliary payunir? Nagawa so Memoryal ed gapo na bulan, kanian baleg so pankanawnawa tayon napawil iramay inmatendi. Natan diad pamawil tayo ed sikara, iyopresi tayo iray magasin tekep na gagalan makapangipalima na libron Ibabangat na Biblia tan mangigapo na saray panangiyaral na Biblia. Kanian say panag-auxiliary payunir no Abril so mangitarok na dakel a pankanawnawa pian makapangigapo na saray panangiyaral na Biblia. Sakey ni et mas andukey so agew nen say labi tan kaslakan lan marakep so tiempo. Niarum ni, limaray Simba na bulay Abril tan walaan na piesta-opisyal, kanian mainomay parad saramay mantratrabaho tan maneeskuela so manpayunir.
15. Akin a nepeg itayon makaliknay inkaganat legan a manasingger so panaon na Memoryal?
15 Diad kada ilalabas na Memoryal, onsisingger itayo na sakey a taon ed anggaan na sayan sistema na bengabengatla. Antiktikey lay nakekeraan a panaon pian ibaga ed arum so nipaakar ed makapanyarin-amin a Dios tayo. (1 Cor. 7:29) Kalabas na sayan Memoryal et agtayo la nipawil so maabig a pankanawnawa pian nidayew tayo so mangatatawen ya Ama tayo. Paraanan tayo la komon natan so panggaway anggaay nayarian tayo a mangiyabawag ed karlangan nen Jehova legan na Marso, Abril, tan Mayo!
[Kahon ed pahina 4]
Nawalaan Itayo Kasi na 25,000 ya Auxiliary Payunir no Abril?
◼ Amtaen mo no anto iray prayuridad mo
◼ Pantongtongan yon sankapamilyaan iray kalat yo
◼ Itongtong ed arum iray planom