Sakey a Video a Mamaaralem na Pakatalos Yo tan Mamakiwas ed Sikayo!
Abril 1951 ed saman. Dakdakel a Tasi nen Jehova diad datin Unyon Sobyet, ya interon sankakapamilyaan, so tinipon, inlugan ed saray boxcar, tan imbantak ed Siberia. Akin a say makapanyarin gobierno na Sobyet so determinadon maneral ed sikara? Panon a saray agagi tayo so akaliktar tan dinmakel ni ingen anggaman ed dakel a taon na agmanundan panamasegsegang? Naromog yo iray ebat diad video a Faithful Under Trials—Jehovah’s Witnesses in the Soviet Union. Bantayan itan, tan napakiwas ed makaibangat a mensahe na satan diad pamasiansiay katooran yo ed si Jehova, antokaman so nagawa!
Kasin naebatan yo irayan tepet? (1) Kapigan so inmunan opisyal ya impamidbir ed saray Tasi nen Jehova diad Russia? (2) Sakbay tan kayari na Guerra Mundial II, panon a dinmakel iray pamilya na Tasi diad Unyon Sobyet? (3) Panon a direktan misunian iray sisiaen da ed pilosopiya nen Lenin? (4) Anto so Operation North, tan anto so pinirawat nen Stalin a nagawa panamegley na satan? (5) Antoy kabaliksan na kibantak parad saray Tasi, tan antoy niganggan ed sikara a gawaen da pian ag-ira nibantak? (6) Diad andukey ya impanbiahe ra diad tren a paarap ed Siberia, panon a nampapasesegan iray agagi tayo tan panon a nikelawan iray angerel ed sikara? (7) Antoran kairapan so sinungdoan na saray Tasi diad Siberia? (8) Anton espiritual a probisyon so papablien a tuloy na saray totoo nen Jehova, tan akin? (9) Akin a mabulos iray agagi tayon mangirisga ed bilay da nisesengeg ed literatura ra, tan panon iran tinmalona anggaman andi-tunda so sagpot na saray autoridad ya amperey pakaawat da ed satan? (10) Panon a nantultuloy ya inataki na Khrushchev so totoo na Dios? (11) Panon a nanggunaetan na opisyales na gobierno a deralen so pananisia na saray Tasin ugugaw? (12) Anto so malinew ya atalosan na saray agagi tayo no akin a sikaray papasegsegangen? (2002 Yearbook, pahina 203-4) (13) Panon a say sigpot a panangataki ed organisasyon na Dios so pinmuktal ed saray managpasegsegang? (2002 Yearbook, pahina 220-1) (14) Antoray bengatlan tinmua a kukugkugipen labat nensaman na saray Tasi diad datin Unyon Sobyet? (15) Antoy tinmulong ed saray agagi tayo pian nasungdoan da iray subok, tan panon ya ililitrato na unor ya eksena ed video so katuaan na Jeremias 1:19? (16) Mangisalaysay na sakey ed saray tuan-agawa ya eksperiensya na katooran diad silong na subok a nagkalautlan amakiwas ed sikayo.