Kawesan Yoy Inkasikayo na Kapaabebaan
1 Nanmatalek so sakey ya ugaw nin lakin managpastol ed si Jehova tan tinalo to so mabiskeg a mibabakal. (1 Sam. 17:45-47) Maanos a sinungdoan na mayaman a too so kalamidad. (Job 1:20-22; 2:9, 10) Binidbir na Anak na Dios a nanlapud Ama to so amin ya imbangat to. (Juan 7:15-18; 8:28) Say kapaabebaan so manunan napatnagan ed kada sakey ed sarayan alimbawa. Ontan met natan, makana so kapaabebaan pian napidenengan iray kidudungetan tayon situasyon.—Col. 3:12.
2 Sano Manpupulong: Bilang Kristianon ministros, sikatayoy mapaabeban manginanabang na maong a balita ed amin a klase na totoo, ya agtayo ira huhusgaan unong ed rasa, kultura, odino abenegan da. (1 Cor. 9:22, 23) No say arum so andiay-galang odino malangas a mangipulisay ed mensahe na Panarian, ag-itayo onkiwas ed ontan met a paraan noagta maanos itayon mantultuloy a mananap ed saray makanepegan. (Mat. 10:11, 14) Imbes a panggunaetan a pandinayewen so arum ed pikakabat odino edukasyon tayo, ipaarap tayo so imano ra ed Salitay Dios, a bidbiren a mas makatangguyor itan nen say antokaman a nayarin ibaga tayo. (1 Cor. 2:1-5; Heb. 4:12) Bilang pangalig ed si Jesus, iter tayo so amin a dayew ed si Jehova.—Mar. 10:17, 18.
3 Diad Loob na Kongregasyon: Nepeg met a ‘balkesan [na saray Kristiano] so inkasikara na panagpaabeba ed balang sinansakey.’ (1 Ped. 5:5) No ipapasen tayon atagtagey so arum nen say sikatayo, mananap itayo na paraan pian serbian iray agagi tayo imbes ya ilaloan a sikara so manserbi ed sikatayo. (Juan 13:12-17; Fil. 2:3, 4) Agtayo moriaen ya ag-ontukoy ed posisyon tayo iray kimey a singa say panaglinis ed Kingdom Hall.
4 Ontulong ed sikatayo so kapaabebaan pian ‘makapantetepelan so sakey tan sakey ed aro,’ diad ontan et niwala so kareenan tan pankakasakey ed loob na kongregasyon. (Efe. 4:1-3) Mamainomay itan ed sikatayon manpasakop ed saramay aturon mangidaulo. (Heb. 13:17) Satan so mamakiwas ed sikatayon mangawat ed antokaman a simbawa odino disiplina a niiter ed sikatayo. (Sal. 141:5) Tan say kapaabebaan so mamakiwas met ed sikatayon manmatalek ed si Jehova sano asikasoen tayo iray antokaman a pribilehyo a naawat tayo diad kongregasyon. (1 Ped. 4:11) Singa si David, bidbiren tayon say itatalona so mandependi ed panamendisyon na Dios aliwan diad abilidad na too.—1 Sam. 17:37.
5 Diad Imaton na Dios Tayo: Sankaimportantian, kaukolan tayon ‘ipaabebay inkasikatayo ed silong na makapanyarin lima na Dios.’ (1 Ped. 5:6) No kapilitan itayon mipuligesgesan ed makapasubok iran sirkumstansya, nayarin pirawaten tayo so pakainawaan ya itarok na Panarian. Balet sikatayoy mapaabeban man-anos, ya alagaren si Jehova a manumpal ed saray sipan to diad aturon panaon. (Sant. 5:7-11) Singa met ed say manamemben na katooran a si Job, say manunan pampagaan tayo et say ‘pakabendito na ngaran nen Jehova.’—Job 1:21.
6 Si propetan Daniel so ‘nampaabeba ed arap na Dios to’ kanian agamoran to so pabor nen Jehova tan dakel a maabig a pribilehyo. (Dan. 10:11, 12) Kawesan tayo met komon so inkasikatayo na kapaabebaan, lapud amta tayon say ‘tumang na kauyamoan (odino kapaabebaan) tan say takot ed Jehova et kayamanan tan dayew tan bilay.’—Uli. 22:4.