“Naiwi ed Saray Salita na Pananisia”
1 Say panggegemtan na bilay a walaan na maridios a debosyon so mankakaukolan na impasyan sagpot. (1 Tim. 4:7-10) No diad dili tayon biskeg, maganggano itayon onkesaw tan nigapol diad gunaet tayon mantultuloy ed satan a kurang. (Isa. 40:29-31) Sakey a paraan pian makagamor itayo na biskeg manlapud si Jehova et diad ‘pakaiwi [odino pakatagano] tayo ed saray salita na pananisia.’—1 Tim. 4:6.
2 Daakan Iran Espiritual a Tagano: Diad panamegley na Salita to tan say “matoor tan makabat ya aripen,” itatarya nen Jehova so daakan iran espiritual a tagano. (Mat. 24:45) Gagawaen tayo kasi biang tayo pian nagunggonaan ed saratan? Inagew-agew itayo kasin babasaen so Biblia? Wala tay inggana tayon panaon parad personal a panagaral tan panagdalepdep? (Sal. 1:2, 3) Say ontan a masustansian espiritual a tagano so mamabiskeg tan manalimbeng ed sikatayo manlapud saray makapakapuy ya impluensya na mundo nen Satanas. (1 Juan 5:19) No panoen tayoy kanonotan tayo na saray maabig a bengatla tan iyaplika iratan ed bilay tayo, antabayen itayo nen Jehova.—Fil. 4:8, 9.
3 Papabiskegen itayo met nen Jehova panamegley na saray pantitipon ed kongregasyon. (Heb. 10:24, 25) Say maespiritual iran bilibilin tan maabig a pililimog a nagamoran diad sarayan panduroypo so mamabiskeg ed sikatayon ontalindeg a malet anggaman ed subsubok. (1 Ped. 5:9, 10) Oniay inkuan na sakey a Kristianon kalangweran: “Sanagew ak a walad eskuelaan tan nababanalan ak a maong. Balet saray pantitipon et singa sakey a painawaan ed desierto, a ditan et narerepreskoan ak pian nasarag ko lamet so ontumbok a sanagew ed eskuelaan.” Peteg a nabebendisyonan itayo lapud panggugunaet tayon atendian iray pantitipon!
4 Panangiyabawag ed Katuaan: Impasen nen Jesus a tagano so pampulong ed arum. Satan so mamapakasil ed sikato. (Juan 4:32-34) Ontan met, sano itotongtong tayo ed arum so nipaakar ed makapakelaw iran sipan na Dios, ombiskeg itayo. Diad pagmaliw tayo met ya okupado ed ministeryo et mansiasiansian akasentro so puso tan nonot tayo ed Panarian tan ed saray magano lan onsabin bendisyon. Talagan makaparepresko itan ed sikatayo.—Mat. 11:28-30.
5 Agaylan apribilehyoan itayo ya onggamor na daakan ya espiritual a tagano ya itatarya nen Jehova ed saray totoo to natan! Komon ta mantultuloy itayon maliket ya ikelyaw so kirayewan to.—Isa. 65:13, 14.