Parte 5—Pangikondukta na Progresibo Iran Panangiyaral na Biblia
Determinaen no Kaunongan Karakel so Kobrian a Materyal
1 Sano manbabangat et ikokonsidera nen Jesus iray limitasyon na saray babangatan to, ya itotongtong to labat ed sikara so “unong a nayarian dan dengelen.” (Mar. 4:33; Juan 16:12) Mipadpara, kaukolan a natebek na saray managbangat na Salitay Dios natan no kaunongan karakel a materyal so praktikal a kobrian ed panangiyaral day Biblia. Mandependi ed abilidad tan sirkumstansya na managbangat tan iyaaralan so karakel na materyal a nayarin singbaten.
2 Iletneg so Malet a Pananisia: Walaray iyaaralan a mankaukolan na duara odino talora nin sesyon sakbay dan narandan so materyal a natalosan a tampol na arum ya iyaaralan. Agtayo labay ya isakripisyo so pakawalaan na iyaaralan na malinew a pakatalos ed materyal pian labat napapeles so panagaral. Kaukolan na balang iyaaralan so mabiskeg a basiyan parad balon pananisia ya aromog to ed Salita na Dios.—Uli. 4:7; Roma 12:2.
3 Legan yon ikokondukta so panagaral a sinimba, mangigana na malaem a panaon pian natulongan so iyaaralan a natalosan tan awaten so naaaralan to ed Salita na Dios. Paliisan so panapura a sengegan la ingen na agsigpot a pakagunggonaan na iyaaralan ed kablian na katuaan ya ibabangat. Mangusar na magenap a panaon pian nipaimano iray manunan punto tan nasingbat iray manunan kasulatan a basiyan na saray bangat.—2 Tim. 3:16, 17.
4 Ag-onaarawi ed Tema: Bangta papaliisan tayo so panapura legan na panagaral, papaliisan tayo met so pakaarawi ed tema. No labalabay na iyaaralan ya itongtong so dakel iran personal a pamaakaran, nayarin kaukolan tayon iyuksoy a pantongtongan iratan kasumpal na panagaral.—Ecl. 3:1.
5 Diad biek a dapag, lapud inkaseseg tayo ed katuaan et nayarin walay tendensia tayon mankomento na dakerakel legan na panagaral. (Sal. 145:6, 7) Say sagpaminsan a pangisalet na kaaruman iran punto odino eksperiensya so nayarin mamarakep ed panagaral, balet ta agtayo labay a dakerakel odino andukerukey iratan a mangamper laingen ed iyaaralan ed pakagamor toy suston pikakabat ed saray manunan bangat na Biblia.
6 Diad pangobre na kabkaabigan a karakel na materyal ed kada panagaral, natulongan tayo iray iyaaralan na Biblia a ‘manakar ed silew nen Jehova.’—Isa. 2:5.