Epektibon Panagtasi ed Publiko Iran Pasen
1. Bilang panangalig ed saray Kristiano nen inmunan siglo, panon a makapantatasi iray Kristiano natan ed publiko iran pasen, tan antoray resulta?
1 Singa saray inmuunan babangatan nen Jesus, panggugunaetan na saray Kristiano natan ya inabang so maong a balita ed saray totoo inerman so pakaromogan ed sikara. (Gawa 16:13; 17:17; 20:20, 21) Bilang resulta na panggugunaet dan mantasi diad saray publikon pasen, makakaromog ira na saray interesadon totoo a nayarin agnin balon apitongtongan diad panagkabkaabungan a ministeryo.
2. Akin a kaukolan so pakatebek sano mantatasi diad publiko iran pasen, tan antoy nagawaan tayo pian magmaliw a mauksoy itan?
2 Kaukolan so pakatebek sano mantatasi ed publiko. Mabetbet a sankaabigan no gawaen so panagtasi ya agparungtalan. Alimbawa, no dakdakel lan manangipalapag so mantatasi ed apasakey lan pasen odino ondadalaw ed apasakey laran negosyoan, ompan naalipanesan laray totoo ed kiwawala tayo. Saya so nayarin mamaabeba ed dignidad na kimey tayo tan manlimita ed inkaepektibo tayo. Anto so nagawaan pian napaliisan iya? Nalmoan na arum a kongregasyon a walaay dakel iran pasen parad publikon panagtasi a makatulong so panggawa ra ed saratan bilang indibidual iran teritorya. (1 Cor. 14:40) Niarum ni, magmaliw a mauksoy so kimey tayo no say kimeyan tayo labat et say inyasain a teritorya na kongregasyon tayo likud labat no walaray espisipikon inyuksoy panamegley na Komite Parad Serbisyo na Kongregasyon a panulong ed arum a kongregasyon.—Nengnengen so Enero 1999 Ministeryo Tayo ed Panarian p. 5, par. 18-19.
3. Anton metodo so nalmoan na arum ya epektibo sano mantatasi ira ed publikon pasen?
3 Panangigapoy Tongtongan ed Totoo: Sanen akitongtong si Jesus ed sakey a bii diad abay na bobon, ginapoan to ed antikey a panangibano insan to kalkalnan pinalaknab so tongtongan legan ya ipapatnag na bii so interes to. (Juan 4:7-26) Sayan metodo et epektibo met ed pigaran kipapasen natan. Nalmoan na arum a manangipalapag a pian mas epektibo ed publikon panagtasi, makatulong no ibano nin magano iray totoo tan ipanengneng ed sikara so personal ya interes antis ya ipresenta so mensahe na Panarian. Komentoan da so sakey a teman paninteresan ed lokal, a kaslakan lan ompugta ed pantotongtong. Insan legan ya ibabalikas na totoo iray kapagaan da, tatalinengen da iran maong. Agmanbayag, manginanabang laray ligliwa manlapud Salitay Dios.—Roma 15:4.
4. Panon tayon nabayuboan so aromog tayon interes?
4 Bayuboan so Interes: Diad kada maabig ya impakapitongtong tayo, panggunaetan tayon iyuksoy so pamayubo ed interes. Panon tayon nagawaan iya? Sano manasampot lay tongtongan nayarin ipaway yo so panagnotaan yo tan ibagan: “Nanliketan koy impakapitongtong ed sika. Ompan nayari so makapitongtong lamet ed sika diad arum a pankanawnawa?” Odino ibagan: “Labay ko komon a nabasam so sakey ya artikulo a segurado ak a paninteresan mo. Nayarin awiten ko la itan ed abung yo odino diad opisina yo?” Arum a manangipalapag so mangitepet labat lay: “Nayarin alaen so numeroy telepono yo?” Tan mabetbet et iiter da met.
5. Anto so nepeg a kalat tayo sano mantatasi itayo ed publiko iran pasen?
5 Dakel a totoo a primeron akatongtong diad publiko iran pasen so angawat na panangiyaral ed Biblia. Nayarin ikondukta iratan a panangiyaral diad abung na too, diad pantratrabahoan to, diad matukoy a publikon pasen, odino panamegley na telepono. Komon ta gawaen tayon kalat so pangigapo na panangiyaral na Biblia legan itayon epektibon mantatasi ed publiko iran pasen.