Tulongan so Arum a Nagunggonaan ed Dondon
Memoryal na Impatey nen Kristo a Selebraan no Abril 12
1. Antoy sakey a paraan a nibalikas na totoo na Dios so apresasyon da ed dondon?
1 “Salamat ed Dios lapu ed langkap to ya agnibalikas [odino, agnadeskribe].” (2 Cor. 9:15) Saratan a salita so matukoy a mangibabalikas ed liknaan tayo nipaakar ed kamaongan tan maaron-kaabigan ya impatnag na Dios ed totoo to panamegley na Anak to, si Jesu-Kristo. Satan ya apresasyon so nagkalalo lan ombitar legan a mantitipon itayo no Abril 12 pian selebraan so Memoryal na Impatey nen Kristo.
2. Siopara so kaiba na saray lingkor nen Jehova ya onatendi ed selebrasyon na Memoryal, tan antoy nakaukolan dan gawaen ta pian nagunggonaan ed dondon?
2 Kaiba iray lingkor nen Jehova, manga samploran milyon ya arum ni so onaatendi ed selebrasyon na Memoryal kada taon. Diad panggagawa ra ed saya, nipapatnag da so apresasyon da ed bagat nen Kristo. Balet, pian nagunggonaan ed dondon, kaukolan dan ipatnag so pananisia ed satan. (Juan 3:16, 36) Panon tayoran natulongan a nawalaan na ontan a pananisia? Legan na sayan panaon na Memoryal, napaseseg tayoran paiyaralan a mismo na Biblia tan onatendi ed sinimban pantitipon ed kongregasyon. Konsideraen so onggendan iran suhestion.
3. Panon tayon nigapo so panangiyaral na Biblia sano mangiimbita parad Memoryal?
3 Saray Panangiyaral na Biblia: Sano imbitaan yoray interesado ed Memoryal, akin ta no igapo yoy pangiyaral na Biblia ed sikara ed libron Ibabangat na Biblia? Iyopresin ipaliwawa so selebrasyon na Memoryal ed too diad pangilukas ed pahina 206-8 tan singbaten so teman “Pangdem na Katawan—Sakey a Selebrasyon a Mangigagalang ed Dios.” Nayarin maminpinsan odino palduaen yon singbaten itan ya impormasyon diad ibisita yo, nayarin diad pangiyaral na Biblia diad puerta. Sano asumpal yo la itan a materyal, nayarin mabulos so too a pantongtongan so kapitulo 5, “Say Dondon—Sankaabigan a Regalo na Dios.” Diad bektan niletneg la so regular a panangiyaral na Biblia, pawilen tan singbaten so manangilukas ya apatiran kapitulo na libro.
4. Siopa so nayarin pangigapoan tayo na panangiyaral na Biblia legan na sayan panaon na Memoryal?
4 Siopa so nayarin pangigapoan tayo na panangiyaral na Biblia ya usaren so asalambit a metodo? Nayarin labay na pigara ed saray katrabahoan, kaeskuela, odino kakaabay yo so ontan iran pantotongtong. Nayarin asinggeran na agagin lalaki iray agmananisian kaasawaan na agagin bibii ed kongregasyon. Tan agyo lilingwanan iray mismon kakanayon yo ya aliwan Tasi. Niarum ni, labay tayon panggunaetan ya iyimbita so Memoryal ed saramay datin aktibon mililimog ed kongregasyon. (Luc. 15:3-7) Komon ta panggunaetan tayon tulongan iratan ya amin pian nagunggonaan ed dondon.
5. Panon tayon napaseseg iray iyaaralan na Biblia tan arum niran interesado pian onatendi ed saray sinimban pantitipon na kongregasyon?
5 Saray Pantitipon ed Kongregasyon: Say Memoryal so primeron pantitipon ya aatendian na dakel ed saray iyaaralan na Biblia tan arum niran interesado. Balet, panon tayoran napaseseg ya onatendi pian nagunggonaan ed arum a pantitipon tayo ed kongregasyon? Say Mayo 2005 a Ministeryo Tayo ed Panarian, pahina 1, so mangiiter na onggendan iran suhestion: “Ibaga yo so tema na onsublay a paliwawa parad publiko. Ipanengneng ed sikara so materyal a konsideraen ed onsublay a Panagaral na Panag-Bantayan odino Panagaral na Kongregasyon ed Libro. Deskribien so Teokratikon Eskuelaan Parad Ministeryo tan say Pantitipon Parad Panagserbi. No walay betang yo ed teokratikon eskuelaan, nayari yon ipasal itan a kaiba ira. Inabang iray alay abig a punto a nipresenta ed saray pantitipon. Diad primeron panagaral et imbitaan la ran tampol.”
6. Diad anton duaran paraan a natulongan tayoray matuan impanpuso a nagunggonaan ed dondon?
6 Sano regular a niyaralan na Biblia iray matuan impanpuso tan regular ya onatendi ed saray pantitipon na kongregasyon, maples iran onaligwas ed katuaan. Sirin, komon ta pasesegen tayo so arum a manganamot ed sarayan espiritual a probisyon tan nagunggonaan manlapud sankabalgan a regalo na Dios—say dondon.