Ipanengneng so Apresasyon Tayo Say Memoryal a Selebraan no Abril 17
1. Anton balikas na salmista so nagkalautlan matukoy diad panaoy Memoryal?
1 Lapud apresasyon na salmista ed agnabilang a panangasi tan panangiliktar nen Jehova, inkuan to: “Anto kasi manepeg ya ibales ko ed Jehova a nipaakar ed amin na saray panamainawa to ed siak?” (Sal. 116:12) Natan et mas dakel so rason na saray lingkor na Dios pian misalamat. Kalabas na nilasus a taon manlapud inkisulat na sarayan pinuyanan a balikas, inter nen Jehova ed katooan so sankaabigan a regalo—say dondon. Antis na panselebra tayo’d impatey nen Kristo no Abril 17, pankanawnawa tayon ipanengneng so pisasalamat tayo.—Col. 3:15.
2. Akin et misalsalamat itayo ed dondon?
2 Saray Bendisyon Lapud Dondon: Panamegley na dondon, agamoran tayoy “kaperdona na saray kasalanan tayo.” (Col. 1:13, 14) Ontan met, nayarian tayon dayewen si Jehova tekep na malinis a konsiensia. (Heb. 9:13, 14) Sakey ni, walay kawayangan tayon mansalita sano sikatoy asinggeran tayo diad pikakasi. (Heb. 4:14-16) Saramay mangipapanengneng na pananisia ed dondon et walaan na alay abig ya ilalon bilay ya andi-anggaan!—Juan 3:16.
3. Panon tayon nipanengneng so apresasyon tayo’d si Jehova lapud dondon?
3 Ipatnag so Apresasyon: Say sakey a paraan a nipanengneng tayoy impapuson apresasyon et diad inagew-agew a pangikonsidera’d babasaen ed Biblia parad Memoryal tan pandalepdep ed satan. Makatulong so artikulon “Are You Prepared for the Most Important Day of the Year?” ed Pebrero 1, 2011 a Watchtower pian nagawaan iya. Nibalikas tayo met ed si Jehova so panamabli tayo’d dondon diad masimoon a pikakasi. (1 Tes. 5:17, 18) Say iyatendi tayo’d Memoryal bilang katutulok ed ganggan nen Jesus et pakapatnagay pisasalamat tayo. (1 Cor. 11:24, 25) Sakey ni, naalig tayoy agnaparaan a panangaro nen Jehova diad pangimbita’d dakel a totoo anggad posible.—Isa. 55:1-3.
4. Antoy nepeg a determinasyon tayo?
4 Parad saray maapresyan lingkor nen Jehova, say panselebray Memoryal et aliwa labat a sakey ya pantitipon. Satan so sankaimportantian a pantitipon ed taon! Legan a manasingger so Memoryal, komon ta miparay determinasyon tayo’d salmista ya angisulat: “Galangen mo si Jehova, O kamarerwak, tan agmo lingwanan so amin na saray ipanabang to.”—Sal. 103:2.