Say Ministeryo Tayo—Kimey a Pakapatnagan na Panangasi
1 Naimano nen Jesus a say dakerakel a totoo a dinmengel ed mensahe to et “maermen tan abuybuyak . . , a singa saray karnero ya anggapoy pastol da.” (Mat. 9:36) Tekep na inkatamoy tan aro, imbangat to ed sikara iray daladalan nen Jehova, niligliwa to ra, tan sipapangasin angitarya ed espiritual a pankaukolan da. Legan tayon dadalepdepen iray ginawgawa nen Jesus, naalig tayo so liknaan tan panagnonot to, tan sayan kalidad a panangasi so napatnagan diad ministeryo tayo.
2 Nonoten pa labat a magano no panon so inkiwas nen Jesus sanen sikatoy inasinggeran na totoo a mankakkaukolan na tulong. (Luc. 5:12, 13; 8:43-48) Sikatoy makonsidera ed saramay nidumaduma so kipapasen da. (Mar. 7:31-35) Amta toy liknaan na arum tan angipatnag na panangiyansakit ed sikara. Agto onnenengneng ed itsura. (Luc. 7:36-40) On, impatnag nen Jesus so matamoy a panangasi na Dios tayo ed ayadyarin paraan.
3 ‘Naabagey To Ira’: Aliwa labat a lapud obligasyon nen Jesus so ministeryo kanian ginawa to itan. “Naabagey to” iray totoo. (Mar. 6:34) Ontan met natan, ag-itayo lambengat mangipapasabi na mensahe noagta manggugunaet itayon mangiliktar na saray bilay. Panggunaetan a talosan no akin ya ontan so ikikiwas na saray totoo. Akin kasi et mapagpaga odino naaaburido ira? Kasin apaulyan tan apalikdo ira na saray pastol na palson relihyon? Say masimoon ya interes tayo ed arum so nayarin mamakiwas ed sikaran ontalineng ed maong a balita.—2 Cor. 6:4, 6.
4 Say panangasi et manenyeg ed kapusoan. Bilang panangiyilustra: Sakey ya ina so pirmin nanermen lapud impatey na taloy bulan ya anak ton bii. Sanen sikatoy binisita na duaran Tasi ed abung to, pinaloob to ra pian suppiaten iray katunongan da nipaakar ed no akin ya iyaabuloy na Dios so paniirap. Balet diad kaunoran, oniay imbaga na samay bii: “Mapangpangasi da ak a dinengel, tan sanen manpatanir la ra, alemewan lay liknaan ko, kanian inmabuloy ak a pabisita lamet.” Kasin panggugunaetan yoy mangipatnag na panangasi ed amin a nakakatongtong yo ed ministeryo?
5 Say pamayubo ed inkamapangasi et ontulong ed sikatayon ninabang ed arum so peteg a ligliwa. Diad panggawa ed satan, iglogloria tayo so “Ama na saray panangasi,” salanti, si Jehova.—2 Cor. 1:3.