Tulongan so Arum a Magmaliw a Kakaaro na Dios
1 Natan, saray totoo ed amin a nasyon so nababangatan ed saray dalan nen Jehova. (Isa. 2:2, 3) Balet, pian “manbunga ra a maanos,” nepeg dan aroen si Jehova. (Luc. 8:15; Mar. 12:30) No anggapo itan ya aro, ag-ira nawalaan na biskeg pian labanan iray makapuy ya impluensya tan ag-ira nawalaan na pakpel pian gawaen so duga. Say sakey a paraan pian tulongan so arum a napaaligwas day maabig a relasyon ed si Jehova et say panulong ed sikaran mangapresya ed saray kalidad to. Pasesegen iran usisaen a maong so impormasyon ed libron Onapit ed si Jehova.
2 Say Ehemplo Yo: Say kakikiwas yo so walaan na mapuersan epekto ed kapusoan na saray iyaaralan yo na Biblia. Sano naiimano ra a papablien yo so pikakaaro yo ed si Jehova tan nanenengneng da so epekto na satan ed bilay yo, nayarin napakiwas met iran mamayubo ed ontan a personal a relasyon. (Luc. 6:40) On, say ehemplo tayo so mabetbet a walaan na mas baleg ya impluensya ed arum nen say ibabaga tayo.
3 Say manunan paraan a nibangat na atateng so ananak da a mangaro ed si Jehova et diad ehemplo ra. (Deu. 6:4-9) Sakey a sanasawa a manpirawat a mamabaleg ed ananak da ed katuaan so kinmerew na simbawa ed matalonan atateng. Inkuan na asawan laki: “Say maslak ya ibabaga na kada akatongtong ko et say ehemplo na atateng.” Kanian, diad interon kabibilay da, saray atateng so magmaliw ya ehemplo ed ananak da no antoy kabaliksan na pagmaliw a “kaaro na Dios.”—Sant. 2:23.
4 Impapuson Pikakasi: Natulongan yo met so arum a mamayubo ed pikakaaro ed si Jehova diad pangibangat ed sikaran masimoon a manpikasi. Nayarin ipaimano yo ed sikara so modelon pikakasi nen Jesus, ontan met ed dakel a masimoon a pikakasi a nabasa ed Biblia. (Mat. 6:9, 10) Nabangatan yo iray ananak yo tan saray iyaaralan yo na Biblia no panon so pampikasi diad italineng da ed mismon pikakasi yo. Sano narengel day masimoon iran balikas yo, natebek da so liknaan yo ed si Jehova. Pasesegen iran “mansiansia a malet ed pikakasi” sano nasusubok ira. (Roma 12:12) Legan dan naeeksperiensya so tulong nen Jehova ed panaon na pankaukolan, onggapo iran manmatalek tan mangaro ed sikato bilang tuan kaaro.—Sal. 34:8; Fil. 4:6, 7.