Tumboken so Ehemplo ya Impanengneng nen Jesus
1. Anton ehemplo so impanengneng nen Jesus?
1 Sano mibibiang itayo ed panggaway babangatan, nepeg tayon nonoten lawas a say ehemplo tayo so walaan na baleg ya epekto ed saramay mangoobserba ed sikatayo. Nambangat si Jesus panamegley na salita tan gawa. Saramay mangoobserba ed sikato so makaimano ed seseg, aro to ed totoo, say akasentron pilalek to a napasantos so ngaran na Ama to, tan say determinasyon ton sumpalen so linawa na Ama to.—1 Ped. 2:21.
2. Diad antoran dalan a say ehemplo tayo so mangapekta ed saramay nakakaiba tayo ed panagpulong?
2 Legan a Manpupulong ed Kabkaabungan: Singa si Jesus, say ehemplo tayo so walaan na epekto ed saramay nakakaiba tayo ed panagpulong. Saray balo ni tan agtanto nin eksperiensyadon manangipalapag a makakaimano ed maseseg a pibibiang tayo ed ministeryo so manisip met ed kalidad na panagpulong da. Sano naiimano ra so liket tan masimoon ya interes tayo ed arum, napanonotan ira ed kaimportantian na pangipatnag ed saratan a kalidad ed ministeryo ra. Sano naiimano ra so inkakuli tayo ed panangusar tayo ed Kasulatan, ed panagpawil, tan ed saray panangiyaral tayo na Biblia, napakiwas iran mangalig met ed satan.
3. Panon a say ehemplo tayo so mangibangat ed saray iyaaralan tayo na Biblia, tan anto so nayarin naaralan da?
3 Sano Mangiyaaral na Biblia: Saray iyaaralan tayo na Biblia so nagkalalo lan mangoobserba ed kondukta tayo. Alimbawa, anggaman nayarin ipaliwawa tayo ed sikara so kaimportantian na panagparaan parad panagaral, pananap ed saray teksto, tan panggulis ed saray manunan punto, naimano ra no kasin akaparaan itayo. (Roma 2:21) No duga’d oras so isabi tayo ed apantongtongan a pangiyaral ed sikara, nipasal ira ya agda abuloyan a nasaletan na arum a kimey so eskedyul da ed panagaral na Biblia. Seguradon naimano ra met so inkamabulos tayon mansakripisyo parad ministeryo tan say mabiskeg a pananisia tayo. Agpankelawan a saray iyaaralan na saramay maapit a manutumbok ed ehemplo nen Jesus so magmaliw a maseseg tan mabungan manag-ebanghelyo.
4. Sano onatendi itayo ed saray pantitipon ed kongregasyon, anto so nibabangat na ehemplo tayo?
4 Sano Onaatendi ed Saray Pantitipon na Kongregasyon: Amin a kabiangan na Kristianon kongregasyon so walaan na betang ed pambangat diad panamegley na ehemplo ra ed saray pantitipon ed kongregasyon. Saray interesadon onaatendi so nagunggonaan met ed maabig ya ehemplon naiimatonan da ed kongregasyon. Naimano ra so maligsan aroan na impanaagi, pankakasakey bilang Kristiano, tan masimpit a panagkawes tan panag-ayos. (Sal. 133:1) Say ehemplo tayo ed regular a pipiaral tan panagkomento so naiimano met. Sakey a bisita ya akiaral so akaimano ed inkasiglat na sakey a melag ya ugaw a bii a nananap ed nisitas a teksto ed mismon Biblia to tan ed inkaatentibo ton manutumbok ed panagbasa. Say ehemplo na saman ya ugaw a bii so amakiwas ed sayan bisita pian paiyaralan na Biblia.
5. Akin ya agtayon balot melmelagen so kablian na ehemplo tayo?
5 Papasesegen itayo na Kasulatan ya aligen so maabig ya ehemplo na balang sakey. (Fil. 3:17; Heb. 13:7) Kanian, nepeg tayon nonoten a no maapit tayon tumboken so ehemplo ya impanengneng nen Jesus, naimano itan na arum tan walaan na maabig ya epekto ed sikara. Diad pakakamoria ed saya, komon ta ipapuso tayo iray salita a nabasa diad 1 Timoteo 4:16 “Imatonan mo so kaabigan na laman mo tan say ibabangat mo.”