Espisyal ya Agew Parad Pangiyopresi na Panagaral na Biblia
1 Onggapo ed Enero, kada bulan et mangigana so balang kongregasyon na sakey a sampot-simba parad pangiyopresi na panagaral na Biblia. Nayarin samay unaan a Sabado odino Simba na bulan, depende ed no antoy sankamatukoyan ed lokal. Diad satan ya agew, no ag-awaten na saray unabung itan ya opresi, nayari nin siansia ya iyopresi na saray manangipalapag so libron Ibabangat na Biblia odino saray sankabaloan a magasin. Nepeg a manggaway paraan so amin a mamatatken tan ministeryal a lingkor pian sigpot iran makapibiang ed sayan kimey tan tulongan da iray manangipalapag a makapangigapoy panangiyaral na Biblia.
2 Say Komite Parad Serbisyo so manetermina no dinan a sampot-simba so pangalaan day sakey agew ya igana parad pangiyopresi na panangiyaral na Biblia. Diad panapanaon et panonotan iray manangipalapag pian makapanparaan ira tan nagawaan day sankaabigan da diad panangiyopresi na panagaral na Biblia ed kabkaabungan, ontan met sano papawilen da iramay dati lan angipanengneng na interes.
3 No Panon so Pamparaan: Walaray suhestion nipaakar ed panangigapoy panangiyaral na Biblia diad insert na Enero 2006 a Ministeryo Tayo ed Panarian tan diad pahina 12 na Reasoning. Nayarin pilien na arum so pangusar na tract, a singa say Kasin Labay Mon Naamtaan so Katuaan? Diad pahina 4 na Abril 2007 a Ministeryo Tayo ed Panarian et wala met so suhestion nipaakar ed panangigapoy panangiyaral na Biblia sano papawilen iramay apalimaan na magasin. Iyasain iray mamatatken tan ministeryal a lingkor a mangikondukta na 10 anggad 15 a minuto a pantitipon parad lawak na serbisyo, tan diad satan et pantongtongan odino paidemostra so sakey odino duaran praktikal a suhestion ed panangigapo na saray panangiyaral na Biblia.
4 Siempre, aliwan amin et paiyaralan na Biblia, odino mantultuloy a paiyaralan. Nepeg ya agtayo papadismaya ed saya ta si Jehova so mangiyaasingger ed saray kinmarneron totoo paonla’d organisasyon to. (Juan 6:44) Aliwa labat a say pantanem na bini na katuaan so obligasyon tayo, noag say pamayubo tan pansalog met ed saramay linmamut la, tan laktipen na satan so pangiyaral na Biblia ed saray maptek impanpuso. No gawaen tayo itan, naakbibit tayo so pribilehyon pagmaliw a kakimeyan na Dios.—1 Cor. 3:9.