Lawas Akaparaan a Mangigapoy Panangiyaral na Biblia
1. Anto so lalanoren na panumpal ed samay ganggan nen Jesus a walad Mateo 28:19, 20?
1 Inikdan itayo nen Jesus na ganggan ya ‘ibangat iray totoo pian magmaliw iran disipulo to.’ (Mat. 28:19, 20) Kanian, lawas itayon akaparaan a mangigapoy panangiyaral na Biblia, aliwa labat a diad samay agew a nigana parad panangiyopresi na panagaral na Biblia. Makatulong so onggendan iran suhestion pian nagawaan itan.
2. Sioparay opresian tayoy panagaral na Biblia?
2 Iyopresi Itan: No mas mabetbet tayon iyopresi so panagaral na Biblia, mas dakel so posibilidad a walay mangawat ed satan. (Ecl. 11:6) Kasin asali yo la so direktan panangigapo na panangiyaral? Diad United States et ontan so ginawa na sakey a kongregasyon diad loob na sakey bulan. Malikeliket ira lapud walay 42 a balon panangiyaral na Biblia a nigapo ra! Agyo iisipen ya amta na saray interesadon akatongtong yo ya angiter kayo lay leksion ed Biblia. Sano pawilen yo ira, agta maabig no iyopresi yo lay panagaral? No agda labay, di diad ontumbok a pankanawnawa. Sarag yon bayuboan so interes da. Kasin sinali yo lan tinepetan iray kakaabay, kakanayon, katrabaho, tan kaklase yo no labay day paiyaralan na Biblia? Sarag yo met a tepetan iray iyaaralan yo no kasin walaray kakaaro odino kakanayon da a malabay met a paiyaralan na Biblia.
3. Anton makatulong a kagawaan ed panangigapoy panangiyaral so walad sikatayo, tan panon tayon usaren itan?
3 Makatulong a Kagawaan: Say sakey a kagawaan a makatulong diad pangigapoy panangiyaral na Biblia et say tract a Kasin Labay Mon Naamtaan so Katuaan? Sarag yon ipalima iya ed unabung, mangawat man ira na literatura odino andi. Nayari iyan usaren sano manpupulong ed saray lugar na negosyo, diad saray daladalan, sano mangipawit na saray sulat, tan sano manggagaway panagpawil. Nayari met iyan itilak ed saramay abung ya anggapoy asabian tayo. Marakep sirin no awiten tayo iyan tract sano onlugan tayo ed publikon luluganan, man-shopping, tan legan a walad trabaho. Ipapaliwawa na sampot a pahina na satan a tract so uksoyan nipaakar ed panagaral na Biblia tan iprepresenta to so libron Ibabangat na Biblia.
4. Panon tayon usaren so tract a Naamtaan so Katuaan pian makapangigapoy panagaral na Biblia?
4 Kayarin nipalima so tract ed unabung, sarag yon ipaimano iramay tepet a walad arap na satan, insan yo ibaga, “Anton tepet so makapasagyat ed sikayo?” Insan yo basaen a dua so ebat ed tract, tan kayari to, ibasa odino salambiten imay walad sampot a pahina a mangipapaliwawa ed uksoyan nipaakar ed panangiyaral tayoy Biblia. Insan yo ipanengneng iray kaaruman ya impormasyon ed satan a tema a naromog ed libron Ibabangat na Biblia, iyopresi so libro, insan yo iyeskedyul so ipawil yo pian nituloy so tongtongan.
5. Akin et kaukolan a lawas itayon akaparaan a mangigapoy panangiyaral na Biblia?
5 Dakel niray walad teritorya tayo a manpipilalek a makaamta no anton talagay ibabangat na Biblia. No lawas itayon akaparaan a mangigapoy panangiyaral na Biblia, nawalaan itayo na dakdakel a pankanawnawa a nalikna so liket na panulong ed arum a mikurang ed dalan a mamaarap ed bilay.—Mat. 7:13, 14.