Magmaliw a ‘Maabagey’
1. Antoy kakkaukolan na totoo natan?
1 Natan ni labat ya agawa a kakkaukolan na dakerakel a totoo so panangabagey. Lapud lalon onloloor so kipapasen ed mundo, amayamay so naeermenan, nadi-depress tan naaandiay ilalo. Kaukolan na minilyon a totoo so tulong, tan bilang Kristiano et nepeg tayon ipanengneng a talagan iyaansakit tayo ray kaparan totoo. (Mat. 22:39; Gal. 6:10) Panon tayon nipanengneng itan?
2. Antoy sankaabigan a paraan a nipanengneng tayoy panangabagey?
2 Kimey a Pakapatnagay Panangabagey: Anggapo lay arum a lapuan na tua tan magnayon a ligliwa noag say Dios. (2 Cor. 1:3, 4) Papasesegen itayo nen Jehova ya aligen so “panangabagey” to tan igaganggan to itayon ipulong so maong a balita na Panarian ed saray kaparan too. (1 Ped. 3:8) Say makulin pibibiang ed sayan kimey so sankaabigan ya paraan pian naligliwa tayo ray “maermen,” ta say Panarian na Dios labat so tuan ilalo na maniirap a totoo. (Isa. 61:1) Lapud panangabagey nen Jehova ed totoo to, magano to lan ekaley kaugsan tan iletneg so matunong a balon mundo.—2 Ped. 3:13.
3. Singa si Jesus, panon tayon moriaen so totoo?
3 Aligey Panmoria nen Jesus ed Totoo: Anggan sanen manpupulong si Jesus ed dakel a totoo, agto ra labat inimano bilang grupo. Imbes, inisip toy espiritual a pankaukolan na kada indibidual. Singa ra karneron anggapoy pastol a mangigiya. Sanen anengneng ira nen Jesus, naabagey tan maan-anos to ran imbangat. (Mar. 6:34) No aligen tayoy panmoria nen Jesus ed totoo, napaseseg tayon mangabagey ed sikara bilang indibidual. Nalikas iya ed tonaday boses tan ekspresion na lupa tayo. Magmaliw lan prayuridad tayoy manpulong tan nitukoy tayoy ibaga tayo base ed personal a pankaukolan na kada indibidual.—1 Cor. 9:19-23.
4. Akin et nepeg ya maabagey tayo?
4 Dakerakel a totoo manlapud amin a nasyon so ondedengel ed mensahe na Panarian tan onkikiwas lapud impanengneng ya interes ed sikara. Legan tayon itutultuloy ya ipatnag so panangabagey, nirarayew tan napapaliket so maabagey a Dios tayon si Jehova.—Col. 3:12.