Anto so ‘Panliliketan’ Mo?
1. Anto so panliliketan tayo kada sampot na bulan?
1 Diad kada sampot na bulan, a kaukolan lan iter so report tayo ed impanlingkor, antoy ‘panliliketan’ mo? (Gal. 6:4) Balanglan sakey tayon espisyal payunir ya manrereport na 130 oras odino manangipalapag ya naaprobaan ya mangireport na anggano 15 minuto, nepeg ya amin tayo et manliket ed interon kamarerwan impanlingkor tayod si Jehova.—Sal. 100:2.
2. Akin ya kaukolan tayon iter so sankaabigan tayod panaglingkor ed si Jehova?
2 Bilang Soberanon Katawan na uniberso, manepeg labat ya iter tayod si Jehova so sankaabigan tayo. (Mal. 1:6) Lapud panangaro tayod sikato, indedika tayoy bilay tayo pian gawaey linawa to. Kanian kayari sanagew odino diad sampot na bulan, no segurado tayon inter tayoy “unonan bunga” na panaon, abilidad, tan biskeg tayod impanlingkor ed si Jehova, walay rason tayon manliket. (Uli. 3:9) Balet no say konsiensia tayo et mantatasi sumpad sikatayo, kaukolan tayo sirin ya nonoten no antoy kaukolan tayon paaligwasen.—Roma 2:15.
3. Akin ya aliwan makabat ya ikomparay sarili tayod arum?
3 ‘Ag-ikokomparay Inkasikatayo ed Arum a Too’: Aliwan makabat ya ikomparay sarili tayod arum odino ikomparay nagagawaan tayo natan ed samay nen mas maksil tayo ni. Manguuman iray kipapasen. Nandurumay abilidad tayo. Say panangikompara et manresultad panlalaslasan odino pakaliknan anggapoy kana. (Gal. 5:26; 6:4) Si Jesus et ag-angikompara. Imbes, kinomendaan to ray totoo unong ed sarag dan gawaen.—Mar. 14:6-9.
4. Anto ran importantin leksion so naaralan tayod parabolo nen Jesus nipaakar ed saray talento?
4 Diad parabolo nen Jesus nipaakar ed saray talento, kada aripen et naikdan na talento “unong ed dilin abilidad to.” (Mat. 25:15) Nen sinmabi so katawan, kinomusta toy agawaan da, saramay maseet ya nankimey unong ed abilidad tan kipapasen da et akomendaan tan akiliket ed katawan da. (Mat. 25:21, 23) Ontan met natan, no busy tayo ed panagpulong na Panarian, makaseguro tayod panangabobon na Dios tan walay rason tayon manliket!