BILAY NA KRISTIANO
Usar Moy Bilay Mo Pian Idayew si Jehova!
Say bilay et mabmablin regalo. Nasukat so apresasyon tayod satan a regalo diad paraan na panguusar tayod satan diad kada agew. Bilang Tasi nen Jehova, uusaren tayo ray talent tan abilidad tayo pian pagalangan tan igloria si Jehova, say angiter na bilay tayo. (Sal 36:9; Apo 4:11) Balet, lapud walan walay problema tayo kada agew diad sayan mauges a mundo, main-inomay tayon napaulyanan iray espiritual ya aktibidad tayo. (Mar 4:18, 19) Kanian maabig no itepet tayo: ‘Talaga kasin iiter kod si Jehova so sankaabigan ko? (Os 14:2) Antoy epekto na trabahok o propesyon ko diad panaglingkor kod si Jehova? Anto ray goal kod espiritual? Panon kon napalaknab so ministeryok?’ No wala ni ray sarag mon paaligwasen, ipikasim ya tulongan ka nen Jehova tan gawam iray nakaukolan ya pananguman. No idayew moy Jehova ed kada agew, seguradon naliknam ya makana so bilay mo tan maliket ka!—Sal 61:8.
Siopay minanabang ed saray talent mo?
BANTAYAN SO VIDEO YA USAR MOY ABILIDAD MO PARAD SI JEHOVA, INSAN EBATAN IRAYAN TEPET:
Akin et aliwa no usaren moy talent o abilidad mo parad mundo nen Satanas? (1Jn 2:17)
Anto ray bendisyon ed saramay iiter day sankaabigan da ed si Jehova?
Diad anto ran sagradon panaglingkor ya sarag mon usaren iray talent tan abilidad mo?