Maliket a Manparaan Parad Memoryal
1. Antoy maabig a pankanawnawa tayo diad panaon na Memoryal?
1 Say Memoryal no Martes, Marso 26, et maabig ya pankanawnawa pian manliket ed inter na Dios ya kilalaban. (Isa. 61:10) Antis na satan ya okasyon, makatulong so pagmaliw a maliket pian makapanparaan tayon maong. Panon?
2. Antoy mamapakiwas ed sikatayon manparaan parad Pangdem na Katawan?
2 Pamparaan Parad Satan ya Okasyon: Say Pangdem na Katawan et seryoso balet simplin okasyon. Anggaman ontan, kaukolan nin siansiay masakbay a pamplano pian agnalingwanan iray importantin detalye. (Uli. 21:5) Kaukolan ya desidien so oras tan no iner so matukoy a lugar. Kaukolan ya iparaan iray emblema. Kaukolan met ya linisan tan iparaan so lugar ya panggawaan ed satan. Sakey ni, kaukolan ya manparaan a maong so espiker, tan nepeg ya amta na saray manangipasa na emblema tan attendant so gawaen da. Seguradon dakel ed saraya et akaparaan la. Papakiwasen itayo na pisasalamat ed pakayari na dondon ya mangilaban pian manparaan ya maong parad sayan sagradon okasyon.—1 Ped. 1:8, 9.
3. Panon tayon niparaan so puso tayo parad Memoryal?
3 Iparaan so Puso: Importante met so pangiparaan ed puso pian natalosan so kaimportantian na Memoryal. (Esd. 7:10) Kanian, kaukolan ya mangigana tayoy panaon parad espisyal ya babasaen ed Biblia diad Memoryal tan dalepdepen iray unor ya agew nen Jesus ed dalin. Napakiwas itayon aligen si Jesus no nodnonoten tayoy impansakripisyo to.—Gal. 2:20.
4. Dinan ed saray bendisyon na dondon so panliketan mon maong?
4 Inyalangon na impatey na Kristo so inkasoberano nen Jehova. Nibulos itayo ed kasalanan tan patey. (1 Juan 2:2) Sakey ni, akapikareenan tayod Dios tan awalaay ilalon manbilay ya andi-angga. (Col. 1:21, 22) Ontulong met itan ed sikatayon gawaey anggaay nayarian tayon toorey dedikasyon tayod si Jehova tan mansiansia bilang disipulo nen Kristo. (Mat. 16:24) Legan kan manpaparaan parad Memoryal, komon ta lalo kan magmaliw ya maliket!