Saray Rota na Magasin—Epektibon Pangigapoay Panangiyaral na Biblia
1. Akin et abayag lan ipapaseseg na organisasyon nen Jehova ed saray manangipalapag ya nawalaay rota na magasin?
1 Dakel so agmalabay ya paiyaralan na Biblia ed sikatayo, balet labalabay dan basaen iray magasin tayo. Kanian, abayag lan ipapaseseg na organisasyon nen Jehova ed saray manangipalapag ya nawalaay rota na magasin. No regular ya babasaen na totoo iray magasin tayo, kaslakan et nawalaan iray pampilalek ed Salita na Dios. (1 Ped. 2:2) Nayarin onsabi panaon et walay nabasa dan makapainteres ed sikara kanian awaten da lay panagaral na Biblia.
2. Panon tayon nabayuboan so interes na saramay rota na magasin tayo?
2 ‘Salogen’ so Bini na Katuaan: Imbes ya basta labat itilak iray magasin, mitongtong ed householder tan salim so mikaaro ed sikato. Makatulong iya pian naamtaan moy kipapasen, paninteresan, tan sisiaen to, diad ontan et makabat kan makapitongtong ed sikato. (Uli. 16:23) Manparaan diad kada ibisitam. No posible, ipaimanon magano so sakey a punto tan teksto ya walad saray magasin, pian nasalog iray bini na katuaan ya walad puso to. (1 Cor. 3:6) Irekord so petsa na kada ibisita, say literatura ya intilak, saray topic tan teksto ya apantongtongan.
3. Maminpiga tayon ompawil ed saramay rota na magasin tayo?
3 Maminpiga Kan Ompawil? Kaukolan moy ompawil maminsan ed kada bulan pian ikdan na saray balon magasin iramay rota na magasin mo. Balet nayarin bisitaen mo ran maminpiga dependid kipapasen mo tan interes na too. Singa bilang, sakey odino duaran simba kayarim ya intilak iray magasin, sarag moy ompawil tan ibagan, “Sinmamar ak ya magano pian itongtong ed sikayo so sakey a punto ed samay intilak kon magasin.” Makatulong iya pian mas nainteresan so too ya basaen so sakey ya espisipikon artikulo. No abasa to la itan, nayarin tepetan mo no antoy nibaga to tan pantongtongan itan ya magano. Odino no labalabay na too ya basaen iray literatura tayo, nayarin ompawil ka tan iyopresim ed sikato so tract, brosyur, odino libro ya opresi ed satan ya bulan.
4. Pana-panaon, antoy nayarin gawaen tayo pian nanengneng no kasin saramay rota na magasin tayo et interesadon paiyaralay Biblia?
4 Agla aalagaren ya kerewen na householder ya paiyaralan ed sika. Iyopresim la. Anggano dati et agto labay so paiyaralan na Biblia, pana-panaon et nayarin usaren moy “Ebat ed Saray Tepet ed Biblia” manlapud Say Panag-bantayan tan imanoen no kasin labay ton pantongtongan itan. Ompan sarag mon igapoy pangiyaral na Biblia diad puerta. Balet, no agmo nagawaan itan, nayarin itultuloy mo nin ikdan na saray magasin pian nabayuboan so interes to.