Paaligwasen Iray Abilidad Tayod Ministeryo—Nawalaan na Rota na Magasin

No Akin ya Importante: Dakel so totoon labalabay dan basaen iray magasin tayo balet ta agda labay so paiyaralan na Biblia. Nayarin kontento la rad relihyon da, odino iisipen dan anggapoy panaon dan manpaiyaral. Balet diad pambabasa day magasin tayo, ompan ontuboy pampilalek dad Salita na Dios. (1 Ped. 2:2) Nayarin nasabi puso ra lapud sakey ya artikulo, odino ompan anguman lay kipapasen da. No regular tayo ran bisitaen anggan magano labat, agla ra nababaingan ed sikatayo kanian mainomay tayon naamtaan no anto ray labalabay tan iisipen da. Ompan onsabi panaon et nigapoy panagaral na Biblia.

No Panon Iyan Nagawaan:

Kada bulan, iyeskedyul so pangiyakar na balon isyu na Say Panag-bantayan tan Onliing! ed sakey a too. Nayarim ya bisitaen ed arum ya agew ed satan a bulan pian pawalaen so interes ton basaen so sakey ya espisipikon artikulo ed magasin ya inter mo o publikasyon ya iyoopresi ed satan a bulan. Irekord so kada ibisita.—Nengnengen so Enero 2014 ya Ministeryo Tayo ed Panarian, pahina 3.
Manparaan ed kada ibisitam. Imbes ya basta labat mangitilak na magasin, mitongtong ed unabung tan mikaaro ed sikato pian nabayuboan moy interes to.
Nengnengen iray pankanawnawa ya makapangigapoy panagaral. No tepetan ka na iikdan moy magasin no antoy ibabaga na Biblia ed sakey a topic, iyawitan moy aaralen a publikasyon ya pakabasaan na ebat, tan pantongtongan yo itan. Antis kan onalis, mangitilak na tepet ya konsideraen yod ontumbok ya ibisitam. No regular tan sistematiko, anggan antikey labat so pantotongtong yod Biblia odino ed aaralen a publikasyon—mangiyaaral ka lay Biblia. Asalim lan inyopresi so brosyur ya Maong a Balita tan indemostra so antikey a panagaral na Biblia? Asalim met lan impabantay so video ya Akin ya Aralen so Biblia? tan Antoy Gagawaen Sano Manaaral na Biblia? Anggano dati et agto labay so paiyaralan, manguuman so kipapasen. Ompan makatulong no salien mo lamet.

Gawaen Iya Legan na Sayan Bulan:

Ilistam no siopa ray nayarin magmaliw ya rotam na magasin. Iyopresim ed sikara iray magasin tayod sayan bulan, tan ibagam ya diad onsublay et ikdan mo ra lamet na balon isyu.