Pangaligan Iran Presentasyon

Pangigapoy Panangiyaral na Biblia ed Unonan Sabado na Pebrero

“Nandurumay opinyon na saray nakakatongtong mi nipaakar ed Biblia. Wala ray manisian Salita na Dios iya, say arum balet et ibabaga ran ordinaryon libro labat iya. Sikayo ey, antoy nibaga yod Biblia?” Abuloyan ya onebat. Ipanengneng so beneg na Pebrero 1 ya Watchtower, tan pantongtongan so unonan tepet tan anggan sakey a teksto. Iyopresi iray magasin, tan iyeskedyul so ipawil pian pantongtongan so onsublay ya tepet.

The Watchtower Pebrero 1

“Labay na dakel a totoo ya mangangga lay guerra. Parad sikayo, posible ni kasin niwalay kareenan ed mundo? [Abuloyan ya onebat.] Imanoen no antoy isisipan na Biblia. [Basaen so Salmo 46:9.] Makapalikliket ya naamtaan a saray agawa nen World War I tan kayari na satan so mangiiter ed sikatayo na talek ya asingsingger lan sumpalen na Dios itan a propesiya tan sigpot to lan panganggaen so guerra. Ipaliwawa itan na sayan magasin.”

Awake! Pebrero

“Ombibisita kamin magano pian pantongtongan so kaslakan a problema na totoo. Singa kulang ya naynay so panaon pian sumpalen iray kimey tayo. Kasin masyado tayon busy lapud talagan dakdakel so kimey tayo odino lapud dakel labat so nasasayang ya panaon tayo? [Abuloyan ya onebat.] Ag-amta na dakel a totoo ya wala ray praktikal a simbawad Biblia ya makatulong pian makabat tayon nausar so panaon tayo. Nia so sakey ya alimbawa. [Basaen so Filipos 1:10a.] Ipaliwawa na sayan magasin so apatiran paraan ya akatulong ed dakel pian mas makabat dan nausar so panaon da.”