Agosto—Agnalinglingwanan a Bulan na Pankimey!
Ibunog so Balon Tract Diad Interon Mundo
1. Antoy nagawan espisyal a kampanya ed interon mundo legan ya manasingger so koma 100 ya anibersaryo na Panarian?
1 Legan ya manasingger so koma 100 ya anibersaryo na inkianak na Panarian na Dios, manepeg labat ya idayew tayo si Jehova panamegley na espisyal a kampanya! Legay Agosto, mibiang tayo ed interon mundo a pangibunog ed balon tract ya Iner Naamtaay Ebat ed Importante Iran Tepet? Papasesegen na sayan tract iray totoo ya anapen ed Biblia iray ebat tan ipapaliwawa na saya no panon a makatulong ed sikara so jw.org.
2. Panon tayon makaarum ed ‘maksil ya eyag na panangirayew ed si Jehova’ legay Agosto?
2 Maksil ya Eyag na Panangirayew: Pian natulongan iray manangipalapag ya napalaknab so ministeryo da, walay espisyal a probisyon parad saray malabay ya man-auxiliary payunir ed bulan na Agosto. Legan na satan a bulan, naikdan na pankanawnawa iray bautismadon manangipalapag ya man-auxiliary payunir tan abotey 30 oras. Lapud walay limaran Biernes, Sabado, tan Simba ed Agosto, dakel ed saray manangipalapag ya mantratrabaho odino maneeskuela so makapan-auxiliary payunir. No walay progresibon iyaaralan moy Biblia odino anak ya labay to lay magmaliw ya manangipalapag, mitongtong kan tampol ed coordinator na ulop na mamatatken. Seguradon napaseseg iramay nakaiba tayon magmaliw a manangipalapag legan na satan ya agnalinglingwanan a bulan! Anggano dakel a payunir so manbabakasyon legay Agosto kayari dan nabet so tinaon a kakaukolanen ya oras, ompan posiblin i-adjust day eskedyul da pian sigpot iran makapibiang ed sayan espisyal a kampanya. Marakep no pantongtongan la natan na saray pamilya no panon iran makaarum ed ‘maksil ya eyag na panangirayew ed si Jehova’ legay Agosto.—Esd. 3:11, NW; Uli. 15:22.
3. Antoy iilaloan tayo ed sayan espisyal a kampanya?
3 Anggano wala la ray ginawa tayon kampanya na panangibunog nensaman, komon ta saya et magmaliw a makatantanda. Sarag tayo kasin makagawa na balon peak ed oras, bilang na manangipalapag, tan auxiliary payunir legay Agosto? Diad panampot na 2014 a service year, komon ta bendisyonan nen Jehova iray sagpot na totoo to ed interon mundo ya gawaen so bulan na Agosto ya bulan a sankabalgan ya pantasi ed kapiganman!—Mat. 24:14.