Balo Iran Kansion Parad Panagdayew!
1 Diad samay annual meeting na Watch Tower Bible and Tract Society of Pennsylvania nen Oktubre 4, 2014, inyanunsio so plano ya i-revise so songbook tayo. Makapalikliket itan ya balita! Amin ya inmatendi et apanonotan ya saray kansion tayo et importante ed panagdayew tayo.—Sal. 96:2.
2 Nayarin isipen yo, ‘Akin et kaukolan nin i-revise so songbook?’ Wala ray pigaran rason. Unona, say pakatalos tayod Biblia et tuloytuloy ya onlilinew, tan walay epekto na satan ed saray liriko na kansion tayo. (Uli. 4:18) Say sakey nin rason: Diad dakel a lenguahe, maslak ed saray salitan inusar ed songbook tayo natan et inalad datin edisyon na New World Translation. Saratan ya liriko et kaukolan lan umanen pian ontukoy ed saray salitan inusar ed revised edition. Lapud kaukolay panaon tan matrabaho so panguman na saray liriko, apandesisyonan ya mangarum met lay pigaran balon kansion ed songbook tayo.
3 Kasin alagaren ti nin niimprinta so balon songbook antis tayon nausar iray balon kansion? Andi la. Maliket min ipaamtad sikayo ya wala ray balon kansion ya i-release ed Web site tayon jw.org/pag diad ontumbok iran bulan. No walay i-release ya balon kansion, iyeskedyul itan ed sampot na Pantitipon Parad Panagserbi ya walay akasulat ya “balon kansion.”
4 No Panon ya Naaralan Iray Balon Kansion: Tua, aliwan mainomay so manaral na balon kansion. Balet singa say salmista, labay tayoy mangansion ed saray aral diad kongregasyon, imbes ya mandeen labat. (Sal. 30:12) Pian naaralan so balon kansion, gawaen iraya:
Maminpigan dengelen so piano recording na kansion ya walad Web site tayo. No naynay tayon narerengel so tono, mas mainomay tayon nakabisado.
Talosan iray liriko, tan ipatlep iratan.
Bansagan so togtog anggad nakabisadom lay kansion.
Ipraktis ya maminpiga iray balon kansion diad Panagdayew na Pamilya yo anggad nakabisado yo lay kansion.
5 Diad ontumbok iran bulan, no walay aka-eskedyul ya balon kansion ed sampot na Pantitipon Parad Panagserbi, dengelen nin maminsan na kongregasyon so piano recording. Insan la itan kansionen na amin ya bansagan so piano recording, a singa gagawaen tayod arum ya kansion.
6 Isipen pa, agta say pangansion ed saray pantitipon et pankanawnawa tayon manliket ed mankakasakey tan saniiban pangansion bilang pangidayew ed si Jehova? Kanian no agmet kaukolan, agtayo komon ipapasal so onalis ed yurongan tayo no panangansion la.
7 Wala ni sakey a paraan pian nipanengneng tayon aapresyaen tayo ray sagradon musika tayo. Diad saray asamblea tan kombension, walay musikan ipapatogtog antis ya onggapoy kada sesyon. Mamiduad sakey taon, wala ray masakripisyon agagi tayon nanlapud nanduruman bansa ya oonlad Patterson, New York diad sarili dan gastos pian makagaway balibalin musika ya usaren tayod panagdayew. Kanian no ibaga na chairman ya onyurong tayo la tan dengelen tayoy imparaan na orchestra, komon ta onunor tayo. Ontulong iya pian niparaan tayoy puso tayo parad saray narengel tayod programa.—Esd. 7:10.
8 Sampotan tayoy aral tayo natan panamegley na balon kansion ya atituloan na “Niletneg Lay Panarian—Onsabi La Komon Itan!” Sayan kansion ya impakabat ed annual meeting et ginawa parad koma 100 taon ya anibersaryo na inkiletneg na Panarian.
9 Saray balon kansion et talagan “maong iran bengatla” ya nanlapud si Jehova. (Mat. 12:35a) Komon ta kabisadoen tan kansionen tayo a manlapud puso irayan balon kansion, pian niiter tayoy manepeg a galang tan panangirayew ed si Jehova!—Sal. 147:1.