Manpokus ed Itulong ed Saray Totoo ya Magmaliw a Disipulo
1. Antoy kaukolan tayon gawaen pian niliktar iray totoo?
1 Napatnagan ed 2014 ya report ed serbisyo so seseg tan determinasyon na saray lingkor na Dios ya ipulong so maong a balita na Panarian. (Mat. 24:14) Mas dakel lay napapasabian tayoy mensahe na Biblia natan lapud panagpulong ed kaabungan, kampanya na panangibunog ed saray tract tan imbitasyon, tan panagpulong ed publiko. Balet pian niliktar so kada too, nepeg ya magmaliw iran disipulo nen Jesus, kanian kaukolan tayo ran iyaralay Biblia.—1 Tim. 2:4.
2. Anto ray itepet tayod sarili tayo pian naynay tayon akaparaan ya mangigapoy panagaral na Biblia?
2 Naynay ya Akaparaan a Mangigapo na Panagaral na Biblia: No interesadoy katongtong mo, tetepeten mo kasi address to o no panon mon nakontak, tan papawilen mon tampol pian nigapom ya iyaralay Biblia? Iyoopresim kasi so panagaral na Biblia diad unonan pitongtong, odino ed saray rotam na magasin? Nipabantay mo la kasi ed saray katrabahom, kaeskuela, kakaabay, kakanayon, tan arum nin kabat mo so video ya Akin ya Aralen so Biblia? tan Antoy Gagawaen Sano Manaaral na Biblia? No manpupulong panamegley na literature display, ibabagam kasi ed saramay mangaalay publikasyon ya wala met so libren panagaral na Biblia?
3. Antoy kaukolan pian naibangat tayoy katuaan?
3 Tulongan Itayo nen Jehova tan Jesus: Inggapo nen Jesus so ganggan to diad impangibagan “onla kayo,” kaukolan sirin ya mansagpot tan manggawa tayoy paraan. Balet agto tayo basta pinaulyanan, noagta insipan ton ibaan to tayo. (Mat. 28:19, 20) Inter met nen Jehova so masanton espiritu to tan saray publikasyon ya usaren tayo, tan ipapasal to tayo pian naibangat ed totoo so katuaan. (Zac. 4:6; 2 Cor. 4:7) Sarag tayon ipikasi ya nawalaan tayo komoy “pampilalek tan pakayarin” mibiang ed sayan importantin kimey.—Fil. 2:13.
4. Akin et importantin manpokus tayo ed itulong ed saray totoo pian magmaliw iran disipulo?
4 Makapaliket so manpulong. Balet mas maliket tayo no walay iyaaralan tayo ya natulongan tayon milad sikatayo ed “dalan ya ompugta ed bilay.” (Mat. 7:14; 1 Tes. 2:19, 20) Tan say sankaimportantian, no akapokus tayo ed itulong ed saray totoo pian magmaliw iran disipulo, napaliket tayoy Jehova ta “agto labay a naderal so siopaman noagta labay to a makapambabawi so amin.”—2 Ped. 3:9.