Espisyal a Kampanya na Pangigapo na Panag-aral na Biblia no Setyembre

Legan na Setyembre, gawaen tayoy anggaay nayarian tayon mangiyopresi na panag-aral na Biblia diad kada toon nakatongtong tayo ya usaren so brosyur ya Panliketan so Bilay ya Anggapoy Anggaan! Nayarin man-apply iray manangipalapag bilang auxiliary payunir ya 30 oras so kakaukolanen. Panon itayon makapibiang ed sayan espisyal a kampanya?

• Diad Unonan Pitongtong: Usaren so walad beneg na brosyur pian naalay interes na katongtong, tan salien ya idemonstra so panag-aral. Nonot mo iramay datin angipanengneng na interes, kaiba la ray papawilen mo. Anggano agda labay so manpaiyaral nensaman, ompan nagustoan da la natan so balon paraan na panag-aral tayo tan say brosyur ya usaren. Agnepeg ya itilak iray brosyur ed abung ya anggapoy too odino ilaktip iratan ed sulat parad saramay agni angipanengneng na interes. Nayarin mangiyuksoy so Service Committee na kongregasyon na kaaruman ya pantitipon parad lawak na kimeyan legan na satan ya bulan.

• Saray Arum nin Pankanawnawa: No manguusar so kongregasyon yo na saray literature cart, i-display so brosyur ya Panliketan so Bilay ya Anggapoy Anggaan! Ibaga ed saray malabay ya mangala na brosyur ya walay kaiba na satan ya libren panag-aral na Biblia. Idemonstra ya magano no panon ya gagawaen itan, odino pantongtongan yo no kapigan nayari. Nayarin mangiyasain so manangasikaso na serbisyo na saray kualipikadon manangipalapag ya onlad saray pasen na negosyo ed teritorya yo tan mangiyopresi na panag-aral na Biblia. Sarag mo met ya iyopresi so panag-aral na Biblia ed saray katrabahom odino ed saray totoon nakakatongtong mo legan kan manpupulong ya impormal.

Ingganggan itayo nen Jesus ya “ibangat” iray totoo ya magmaliw ya ‘disipulo’ to. (Mat 28:19, 20) Komon ta makatulong ed sikatayo iyan espisyal a kampanya pian natumbok tayo itan ya ganggan diad tulong na Panliketan so Bilay ya Anggapoy Anggaan!