Sikayo ran Kabataan ya Brother—Antoy Gawaen Yo Pian Pantiwalaan Kayo ed Kongregasyon?

1. Antoy nibaga yo ed saray kabataan ya brother?

SIKAYO ran kabataan ya brother, dakel so nitulong yo ed kongregasyon. Mabisbiskeg so laman yo tan singa agkayo nakekesawan. (Pro. 20:29) On, balbaleg so nagawaan yo parad saray agagi! Seguro labay yo met so magmaliw ya ministeryal a lingkor. Pero ompan iisipen yo ya say pakanengneng na arum ed sikayo et ugaw kayo ni odino kulang ni so eksperiensya yo kanian agkayo ni kualipikado parad kaaruman ya pribilehyo. On tua, ugaw ka ni, pero wala la ray nagawaan mo natan pian pantiwalaan tan respetoen ka na agagi ed kongregasyon.

2. Antoy aralen tayo ed sayan artikulo?

² Diad sayan artikulo, manpokus tayo ed bilay nen Arin David. Aralen tayo met so agawa ed duaran ari na Juda—si Asa tan Jehosafat. Amtaen tayo no anto ran subok so dinalan na sarayan taloran lalaki tan no antoy ginawa ra. Tan nengnengen tayo no anto ray naaralan na saray kabataan ya brother ed alimbawa ra.

MAKAARAL ED SI ARIN DAVID

3. Antoy sakey a paraan pian natulongan na saray kabataan iray maedad la ed kongregasyon?

³ Maespiritual lay David anggan nen ugaw ni. Inusar toy abilidad to pian natulongan toy arum. Inaral ton maong so mantogtog na arpa kanian marundunong ed musika, tan inusar to itan ya talento to pian tulongan si Arin Saul. (1 Sam. 16:16, 23) No sakey kan kabataan ya brother, kasin walay abilidad mo odino talentom ya nausar mo met pian natulongan iray agagi ed kongregasyon? Seguradon wala. Singa bilang, ompan marunong ka ed computer o gadyet. Usar mo itan ya abilidad mo pian tulongan iray maedad la ya nakabisado day gadyet da pian nausar da ed personal study tan diad aral ed kongregasyon.

4. Anto ran kualidad nen David so balibalin aligen na saray kabataan ya brother natan? (Nengnengen so litratod apis.)

⁴ Impanengneng nen David ya sikatoy responsable tan napantiwalaan. Singa bilang nen ugaw ni, makulikuli ton inasikaso iray karnero nen ama to. Diad tua, mapeligro yan kimey. Oniay inistorya to ed si Arin Saul: “Say lingkor mo et managpastol na pulok nen ama to, tan walay sakey a leon, tan sakey met ya oso, a kada sakey ed saratan et aningkat na karnero manlapud pulok. Inusilan ko tan pinatumbak itan tan inliktar ko so karnero ed sangi to.” (1 Sam. 17:34, 35) Sineryoso nen David so responsabilidad ton asikasoen iray karnero tan makpel ya akilaban pian naprotektaan ira. Naalig na saray kabataan ya brother so alimbawa nen David no makulikuli dan gawaen so antokaman ya responsabilidad ya inter ed sikara.

5. Base ed Salmo 25:14, anto dapat so sankaimportantian ed saray kabataan ya brother, tan antoy nepeg dan gawaen?

⁵ Malet ya sankaaro si David tan si Jehova. Anggano makmakpel si David tan marundunong ya mantogtog na arpa, say sankaimportantian ed sikato et say relasyon tod si Jehova. Aliwa labat ya Dios so turing tod si Jehova, noagta Best Friend to met! (Basaen so Salmo 25:14.) Sikayo ran kabataan ya brother, komon ta gawaen yoy anggaay nayarian yon onapit ed Ama yo ed tawen. Tandaan ya say relasyon yod sikato so sankaimportantian. No ontan so gawaen yo, posiblin imatalek dad sikayo iray kaaruman ya responsabilidad ed kongregasyon.

6. Antoy pakanengneng na arum ed si David?

⁶ Say pakanengneng na arum ed si David et uga-ugaw ni tan iresponsable. Singa bilang, nen nampresentay David ya milaban ed si Goliat, dinismaya nen Arin Saul tan imbaga ton: “Ugaw ka ni.” (1 Sam. 17:31-33) Antis to itan, sikatoy nampasnokan nen kuya ton Eliab ta iresponsabli kuno. (1 Sam. 17:26-30) Balet aliwa lan ugaw so pakanengneng nen Jehova ed si David. Kabkabat toy David kanian amta to ya sikatoy responsable. Tan lapud baleg so tiwala nen David ed Best Friend to, atalo toy Goliat.—1 Sam. 17:45, 48-51.

7. Antoy naaralan mo ed samay agawad si David?

⁷ Antoy naaralan mo ed samay agawad si David? Kaukolan moy mananos. Ompan wala ray agagi ya anengneng day impanugaw mo kanian iisipen da ya ugaw ka ni anggad natan. Kaukolay panaon pian nanengneng da ya aliwa ka lan ugaw. Pero tandaan mo ya aliwan say itsura o edad so nenengnengen nen Jehova. Kabkabat to ka, kanian amta to ray sarag mon gawaen. (1 Sam. 16:7) Say sakey nin naaralan mo ed agawad si David et importantin pabiskegen moy relasyon mod si Jehova. Inobserbaan nen David iray palsa nen Jehova tan inisip to no antoy naaralan to ed saratan tungkol ed Amalsa. (Sal. 8:3, 4; 139:14; Roma 1:20) Importante met ya kerewen moy tulong nen Jehova pian agka ontakot tan onkapuy no wala ray subok. Singa bilang, ompan babalawen ka na saray kaklasem ta sakey kan Tasi nen Jehova. Ipikasim ed si Jehova ya tulongan to ka pian naanosan moy pambabalaw da. Iyaplikam met iray bilin to ya walad Biblia tan ed saray publikasyon tan video ya base ed Biblia. Kada no napapatunayan mo ya tutulongan ka nen Jehova, mas ombiskeg so tiwalam ed sikato. Tan no nanengneng na arum ya mantitiwala kad si Jehova, pantiwalaan da ka met.

8-9. Antoy akatulong ed si David pian maan-anos ya manalagar anggano abayag ni antis ya nagmaliw ya ari, tan antoy naaralan na saray kabataan ya brother ed alimbawa to?

⁸ Isip mo pay sakey nin subok ya dinalan nen David. Ugaw ni nen nilanaan nen propetan Samuel, balet dakel nin taon so linmabas antis ya talagan nagmaliw ya ari ed Juda. (1 Sam. 16:13; 2 Sam. 2:3, 4) Antoy akatulong ed sikato pian maan-anos ya manalagar? Imbes ya nadismaya, sikatoy nampokus ed no antoy sarag ton gawaen. Singa bilang, legan ya manaamot-amot diad teritorya na saray Filisteo, sinambot to iman ya panaon pian labanan iray kalaban na Israel. Lapud satan, aprotektaan toy ketegan na teritoryay tribu na Juda.—1 Sam. 27:1-12.

⁹ Antoy naaralan na saray kabataan ya brother ed alimbawa nen David? Natan ni labat et gawam lay anggaay nayarian mo ed panlilingkor mod si Jehova tan ed saray agagi. Makaaral tayo ed eksperiensya nen Brother Ricardo.b Nen manga samplora to ni labat, labay to lay man-regular payunir, balet imbaga na saray elder ya agto ni nayarian. Imbes ya nadismaya tan ombarong si Ricardo, nampokus ed ministeryo to. Oniay imbaga to: “Naisip ko lanlamang ya wala ni ray kaukolan kon paaligwasen. Nampokus ak ed panag-RV tan seseguroen kon manpaparaan ak, ya anggad akalmo ak na Bible study’k. Lapud lanang ak ya manpupulong, agak la masyadon mannerbiyos.” Si Ricardo et regular payunir la natan, tan ministeryal a lingkor met la.

10. Antoy aminsan ya agawa ed bilay nen David, tan antoy ginawa to antis ya mandesisyon?

¹⁰ Isip mo pa met so sakey nin agawa ed bilay nen David. Nen manaamot-amot si David tan saray bataan to lapud tatakasan day Saul, wala may panaon ya aki-guerra ira tan say atilak labat ed panaayaman da et saray pamilya da. Legan ya anggapo ra, wala ray linmusob ya tulisan tan inala day kaasawaan tan ananak da. Diad tua, marundunong tan makmakpel ya sundalo si David kanian sarasarag to la komon ya usilan ya tampol iramay tulisan pian niligtas to ray pamilya ra. Pero andi, inamta to ni no antoy nibaga nen Jehova. Diad tulong na saserdoten si Abiatar, intepet nen David ed si Jehova: “Kasin usilan ko imay grupo na saray tulisan?” Imbaga nen Jehova ya usilan to ira tan impaseguro To ya nabawi ra so amin ya inalad sikara. (1 Sam. 30:7-10) Antoy naaralan mo ed saya?

11. Antoy maabig ya gawaen mo antis kan mandesisyon?

¹¹ Antis kan mandesisyon, tepetan mo ni arum no antoy nibaga ra. Singa bilang, katongtong mo ray ateng mo. Tan kerew kay advice ed saray elder ya dakel lay eksperiensya ra. Pantitiwalaan nen Jehova irayan lalaki, kanian pantiwalaan mo met ira. “Regalo” ira nen Jehova ed kongregasyon. (Efe. 4:8) No aligen moy pananisia ra tan dengelen moy advice da, duga iray gawaen mon desisyon. Amtaen tayo met natan no antoy naaralan tayo ed si Arin Asa.

MAKAARAL ED SI ARIN ASA

12. Anto ray balibalin kualidad nen Arin Asa nen kagapo ton nanuley?

¹² Nen kabataan ni Arin Asa, sikatoy mapaabeba tan makpel. Singa bilang, nen inatey so ama ton si Abias tan sikato lay sinmublay ya ari, nansagpotan ton deralen so amin ya idolo ed Juda. Imbaga to met ed saray taga Juda ya “anapen day Jehova a Dios na inmuunan atateng da tan unoren da so Ganggan.” (2 Awa. 14:1-7) Tan nen nilusob nen Zera so Juda ya kaiba toy 1,000,000 ya sundalo na Etiopia, kinmerew na tulong si Asa ed si Jehova. Impikasi to: “O Jehova, ag-importantid sika no kasin saramay tutulongan mo et dakel odino andiay pakayari. Tulongan mo kami, O Jehova a Dios mi, ta manmamatalek kami ed sika.” Nanengneng ed sayan impapuson pikakasi nen Asa ya baleg so tiwala tod si Jehova ya iliktar to ra. Lapud nantiwala si Asa ed Ama tod tawen, “tinalo nen Jehova iray Etiope.”—2 Awa. 14:8-12.

13. Antoy nansumpalan nen Asa, tan akin?

¹³ Seguradon aprobleman maong si Arin Asa nen walay 1,000,000 ya sundalon linmusob. Balet lapud nantiwala ed si Jehova, analo ira. Makapaermen balet ta nen kapigan mas melag so problema to, agla nantiwalad si Jehova. Nen plano nen Arin Baasa na Israel ya lusoben so Juda, say kinerewan nen Arin Asa na tulong et say ari na Sirya, imbes ya si Jehova. Aliwa laingen so nansumpalan na desisyon to! Panamegley nen propetan Hanani, imbaga nen Jehova ed si Asa: “Lapud nanmatalek ka ed ari na Sirya tan agka nanmatalek ed si Jehova a Dios mo, say armada na ari na Sirya et akablos ed limam.” Manlapu lad saman, naynay ya walay migi-guerra ed si Asa. (2 Awa. 16:7, 9; 1 Ara. 15:32) Antoy naaralan tayod saya?

14. Panon mon nipanengneng ya mantitiwala kad si Jehova, tan antoy resulta no ontan so gawaen mo ya singa ibabaga na 1 Timoteo 4:12?

¹⁴ Agkomon ombabaleg so ulom tan naynay kan mantiwala ed si Jehova. Nen nampabautismo ka, impanengneng mo ya mabiskeg so pananisiam tan baleg so tiwalam ed sikato. Malikeliket si Jehova ed satan ya desisyon mo kanian in-welcome to ka ed pamilya to. Baleg itan ya pribilehyo. Importante sirin ya naynay kan mantiwala ed si Jehova. Ompan si Jehova so naisip mon tampol ya kerewan na tulong no walay importantin desisyonan mo. Panon to balet iramay angkelag ya bagay ey? Komon ta ipanengneng mo ya mantitiwala kad si Jehova ed amin ya desisyon mo, singa diad pampilim na libangan, trabaho, tan no anto ray planom ed bilay. Agka masyadon bilib ed sarilim. Mas maabig no amtaen mo iray prinsipyo na Biblia ya makatulong ed pandesisyon mo tan iyaplikam iratan. (Pro. 3:5, 6) No ontan so gawaen mo, napaliket moy Jehova tan naalam so respeto na saray agagi ed kongregasyon.—Basaen so 1 Timoteo 4:12.

MAKAARAL ED SI ARIN JEHOSAFAT

15. Base ed 2 Awaran 18:1-3; 19:2, anto ray makapuy ya desisyon nen Arin Jehosafat?

¹⁵ Amin tayo et aliwan perpekto kanian makakagawa tayoy lingo. Tandaan mo balet ya no nalingo ka, agto labay ya ibagan agka la makapanlingkor ed si Jehova ed interon pusom. Nengnengen tayoy alimbawa nen Arin Jehosafat. Dakel so maong ya kualidad to. Diad gapo na uley to, “inanap to so Dios nen ama to tan tinumbok toy ganggan [To].” Tan imbaki to ray prinsipe to ya onlad amin ya syudad ed Juda pian ibangat iray totoo tungkol ed si Jehova. (2 Awa. 17:4, 7) Balet wala met iray makapuy ya desisyon nen Jehosafat, kanian aminsan et walay imbaki nen Jehova ya mansimbawa ed sikato. (Basaen so 2 Awaran 18:1-3; 19:2.) Antoy naaralan mo ed saya?

16. Antoy naaralan mo ed eksperiensya nen Rajeev?

¹⁶ Dengel kad bilin tan unor mo iratan. Singa dakel ya kabataan natan, ompan naiirapan kan iyuna ed bilay mo so panlingkor ed si Jehova. Pero agka komon nadidismaya. Isip mo pa yan eksperiensya nen Brother Rajeev. Oniay imbaga to ya agawad sikato nen tinedyer ni: “Anggapoy direksion na bilay ko nensaman. Singa arum met ya kabataan, mas interesado ak ed sports nen say diad pipiaral tan panagpulong.” Antoy akatulong ed si Rajeev? Walay maar-aron elder ya nan-advice ed sikato. Oniay imbaga nen Rajeev: “Imbasa dad siak so 1 Timoteo 4:8, tan tinulongan da ak pian natalosan kon maong iman.” Lapud mapaabebay Rajeev, dinmengel ed advice tan inisip to no anton talagay iyuna tod bilay to. Oniay imbaga to: “Manlapu lad saman, nandesisyon ak ya iyunak lad bilay ko si Aman Jehova.” Antoy resulta ey? “Kalabas na pigaran taon,” so imbaga nen Rajeev, “kinmualipika ak bilang ministeryal a lingkor.”

PALIKET MOY AMAM ED TAWEN

17. Antoy nalilikna tayo ed saray kabataan ya brother ya kaiba tayon manlilingkor ed si Jehova?

¹⁷ Sikayo ran kabataan ya brother, agyo komon lilingwanan ya sikami ran mas matatken nen say sikayo et aapresyaen min maong so inkaseseg yo. Malikeliket kami ta kaiba mi kayon manlilingkor ed si Jehova! (Sof. 3:9) Balbaleg kayon tulong ed kongregasyon ta alisto tan makulikuli yon gagawaen iray asainmin yo. Inar-aro mi kayon maong.—1 Juan 2:14.

18. Base ed Proverbio 27:11, antoy nalilikna nen Jehova ed saray kabataan ya brother ya manlilingkor ed sikato?

¹⁸ No sakey kan kabataan ya brother, tandaan mo ya inar-aro tan pantitiwalaan ka nen Jehova. Diad tua, impropesiya to ya diad kaunoran iran agew et walay “ulop na saray kalangweran a lalaki” ya mabulbulos ya onsuporta ed sikato. (Sal. 110:1-3) Amta to ya sikatoy inar-arom tan labay mon gawaey anggaay nayarian mon manlingkor ed sikato. Kanian anosan mo no say pakanengneng ed sika na arum et ugaw ka ni, tan anosan mo met so sarilim. No bilang ta nalingo ka, awat moy disiplina tan panangipasal. Isip mo ya nanlapu itan ed si Jehova. (Heb. 12:6) No walay ipagawa dad sika ed kongregasyon, komon ta makulikulim ya sumpalen itan. Tan say sankaimportantian, isip mo no panon mon napaliket si Aman Jehova diad amin ya gawaen mo pian magmaliw ya proud ed sika!—Basaen so Proverbio 27:11.