Kasin Antam La?

Akin et inyabuloy nen Jehova ya makapanpili iray Israelita no kasin palekpek o malapati so iyapay da?

BASE ed Mosaikon Ganggan, sarag na saray Israelita so manpili no kasin palekpek o malapati so iyapay dad si Jehova. Diad tua, saniban nabibitla iyan dua tan manpili labat iray Israelita no dinan so iyapay da. (Lev. 1:14; 12:8; 14:30) Antoy pankaabigan ya walay napampilian da? Say sakey ya rason et wala ray bulan ya anggapoy naala ya palekpek ed Israel. Akin ey?

No panaon na ampetang, amayamay so palekpek ed Israel. Pero no bandad Oktubre, ombebetel lay panaon kanian onla rad arum ya bansa ya ampetang so klima tan ompawil labat irad Israel no bandad Abril. (Kansion nen Sol. 2:11, 12; Jer. 8:7) Kanian no panaon na ambetel, anggapoy naala na saray Israelita ya palekpek ya iyapay da.

Saray malapati balet et kakaala ta ag-ira onaalis-alis. Diad tua, manaalaga iray Israelita na malapati diad abung da. (Ikompara so Juan 2:14, 16.) Base ed libron Bible Plants and Animals, “amin ya manaayam ed baryo tan baley na Palestina et manaalaga na malapati. Diad kada abung, walay impasadyan abot ya panubongan na saray malapati.”—Ikompara so Isaias 60:8.

Talagan maar-aro tan makonsidera si Jehova ta inabuloyan to ray Israelita ya mangiyapay na palekpek o malapati, depende ed no antoy wala.