AARALEN YA ARTIKULO 31
Pablim so Pribilehyom ya Manpikasi
“Komon ta say pikakasik et magmaliw a singa insenso ya imparaan ed arapan mo.”—SAL. 141:2.
KANSION 47 Manpikasin Naynay ed si Jehova
DIAD SAYAN ARTIKULOa
1. Parad sika, akin et balbaleg ya pribilehyo ya makapanpikasi tayo ed si Jehova?
ISIP mo pa iyan marakdakep ya pribilehyo tayo—makaasingger tayo ed Amalsa na tawen tan dalin panamegley na pikakasi! Sarag tayoy mitongtong ed si Jehova ed anggan anton oras, ed anggan anton lenguahe, tan agtayo la kaukolay mi-appointment ed sikato. Makapanpikasi tayo anggan iner so kulaan tayo—anggano dia nid ospital o prisoan—ta amta tayo ya dedengelen itayo na maar-aron Ama tayo. Talagan mabmablin pribilehyo so pampikasi ed si Jehova!
2. Akin et nibaga tayon pinabpabli nen Arin David so pribilehyo ya makapanpikasi?
2 Pinabpabli nen Arin David so pribilehyo ya makapanpikasi. Oniay inkansion to ed si Jehova: “Komon ta say pikakasik et magmaliw a singa insenso ya imparaan ed arapan mo.” (Sal. 141:1, 2) Diad panaon nen David, maal-alwar ya ipaparaan na saray saserdote so sagradon insenso ya uusaren ed dugan panagdayew. (Exo. 30:34, 35) Nanengneng tayo sirin ed samay imbaga nen David ya labay to met ya iparaan a maong iray pikakasi to ed Ama tod tawen. Ontan met so labay tayon gawaen. Labay tayon naliketan met si Jehova ed saray pikakasi tayo.
3. Panon so dapat ya pampikasi tayod si Jehova, tan akin?
3 No manpipikasi tayod si Jehova, agtayo dapat masyadon pamilyar ed sikato. Nanengneng komon ed saray pikakasi tayo ya baleg so respeto tayod sikato. Isip mo pa iramay makapadinayew ya pasingawey ya anengneng nen Isaias, Ezequiel, Daniel, tan apostol Juan. Nandurumay anengneng da, pero walay pamparehoan na saratan. Indeskribe day Jehova bilang maglorian Ari. Anengneng nen Isaias si Jehova ya “akayurong ed magloria tan niyatagey a trono.” (Isa. 6:1-3) Anengneng nen Ezequiel si Jehova ya akayurong ed karwahe diad tawen, ya “maliwliwawa ed kaliberliber to a singa kaliwawa na sakey a bunlalakaw” o rainbow. (Eze. 1:26-28) Anengneng nen Daniel si Jehova ya tinawag ton say “Akauna nen Saray Panaon.” Tan indeskribe ton akakawes na amputi tan walay apoy ya manlalapud trono To. (Dan. 7:9, 10) Tan anengneng nen Juan si Jehova ya akayurong ed trono ya apaliberan na bunlalakaw ya mankirlap a singa esmeralda. (Apo. 4:2-4) On, talagan agnaparaan so gloria nen Jehova. Pero inabuloyan to tayon onasingger ed sikato panamegley na pikakasi. Kanian dapat marespeto so pitongtong tayod sikato. Anto balet iray ipikasi tayo?
“ONIA SIRIN SO NEPEG A PAMPIKASI YO”
4. Base ed Mateo 6:9, 10, anto ray unonan binitla nen Jesus ed pikakasin imbangat to, tan antoy naaralan tayod satan?
4 Basaen so Mateo 6:9, 10. Diad samay Sermon ed Palandey, imbangat nen Jesus iray disipulo to no anto ray ipikasi ra ya makapaliket ed Dios. Kayari ton imbaga ya “onia sirin so nepeg a pampikasi yo,” say unonan binitla to et saray importantin bengatla ya direktan mikonektaan ed gagala nen Jehova: say pamasanto ed ngaran To; say isabi na Panarian ya maneral ed amin ya kalaban To; tan saray iter Ton bendisyon parad dalin tan totoo. No ipila tayo iratan ed saray pikakasi tayo, ipapanengneng tayo ya importante ed bilay tayo so pakasumpal na gagala na Dios.
5. Kasin sarag tayon ipikasi iray personal ya bagay?
5 Nanengneng tayod sinmusublay ya imbaga nen Jesus ed pikakasi to ya sarag tayon ipikasi iray personal ya bagay. Sarag tayon kerewen ed si Jehova ya ikdan to tayoy naakan ed kada agew, perdonaen to ray kasalanan tayo, iyarawi to tayod saray tukso, tan iliktar to tayod samay mauges. (Mat. 6:11-13) No ipipikasi tayo iraya ed si Jehova, ipapanengneng tayo ya mandedepende tayo ed sikato tan labay tayon naala so pabor to.
No idaulo na asawan laki so pikakasi kaibay misis to, anto ray marakep ya ipila to ed pikakasi to? (Nengnengen so parapo 6)b
6. Kasin say sarag tayo labat ya ipikasi et saramay binitla nen Jesus ed Mateo 6:9-13? Ipaliwawa.
6 Ag-imbaga nen Jesus ya say sarag tayo labat ya ipikasi et saramay binitla tod pikakasi to ya walad Mateo 6:9-13. Nabasa ed Biblia ya diad nanduruman pankanawnawa et impikasi to so arum nin bengatla ya importante ed sikato. (Mat. 26:39, 42; Juan 17:1-26) Kanian sarag tayo met ya ipikasi iray importante ed bilay tayo. Singa bilang no walay kaukolan tayon desisyonan, onkerew tayoy karunongan tan pakatalos ed si Jehova. (Sal. 119:33, 34) No walay naawat tayon mairap ya asainmin o responsabilidad, ipikasi tayo ya tulongan to tayo pian nagawaan tayo itan. (Pro. 2:6) Maabig no ipikasi na atateng iray ananak da, tan ipikasi na ananak iray atateng da. Importante met ya ipikasi tayo ray iyaaralan tayo na Biblia tan saray napupulongan tayo. Pero siempre, aliwa labat komon ya puro kerew so karga na saray pikakasi tayo.
No manpipikasi ka, panon mon nirayew si Jehova tan anto ray pisalamatan mod sikato? (Nengnengen so parapo 7-9)c
7. Akin et agtayo dapat lilingwanan ya irayew si Jehova diad saray pikakasi tayo?
7 Agtayo komon lilingwanan ya irayew si Jehova diad saray pikakasi tayo. Diad tua, agtayo naupotan na rason ya irayew so Dios. Sikatoy “maomaong” tan “akaparaan [ya] mamerdona.” Sikatoy ‘mapangasi tan maabagey, matantan a manpasnok tan abalbaleg so matoor a panangaro tan katooran to.’ (Sal. 86:5, 15) On, talagan kanepegan nen Jehova so panangirayew tayo ta sikatoy maar-aro tan makapadinayew ya Dios.
8. Anto ray pisalamatan tayo ed si Jehova? (Salmo 104:12-15, 24)
8 Agtayo met lilingwanan so misalamat ed si Jehova ed amin ya kamaongan to ed sikatayo. Singa bilang, pisalamatan tayoy Jehova ed saray mararakep ya rosas ya nandurumay kolor da, saray dakdakel ya klase na masarap ya panangan, tan say liket ya nalilikna tayo no kaiba tayo ray kakaaro tayo. Iiter irayan amin na maar-aron Ama tayo ta labay to ya magmaliw tayon maliket. (Basaen so Salmo 104:12-15, 24.) Tan manuna ed amin, pisalamatan tayoy Jehova ed dakdakel ya espiritual ya naakan ya itatarya to tan ed balibalin arapen ya ipaparaan to parad sikatayo.
9. Antoy makatulong pian agtayo nalingwanan so misalamat ed si Jehova? (1 Tesalonica 5:17, 18)
9 Diad amin ya gagawaen nen Jehova parad sikatayo, ompan no maminsan et nalilingwanan tayoy misalamat ed sikato. Anto sirin so gawaen mo pian agmo nalingwanan so misalamat? Maabig no manggawa kay listaan na saray espisipikon impikasim, tan pawilpawil mo iray akalista ditan tan isip mo no panon lan inebatan nen Jehova iratan. Insan mo pisalamatan ed impangebat tod pikakasim. (Basaen so 1 Tesalonica 5:17, 18.) Di ba, malikeliket ka no walay mangapresya tan misalamat ed ginawam? Seguradon makakaimis tan makakaliket met si Jehova kada no pisasalamatan mo ed saray ebat tod pikakasim. (Col. 3:15) Pero wala ni importantin pisalamatan tayo ed Dios. Anto itan?
PISALAMATAN SI JEHOVA LAPUD INAR-ARO TON ANAK
10. Base ed 1 Pedro 2:21, akin et pisalamatan tayoy Jehova ed impangibaki tod si Jesus diad dalin?
10 Basaen so 1 Pedro 2:21. Pisalamatan tayoy Jehova lapud imbaki toy inar-aro ton Anak diad dalin. No aralen tayoy bilay nen Jesus, lalo tayon nakabat si Jehova tan naamtaan tayo no panon tayon napaliket. Tan nagkalalo ed amin, no ipanengneng tayoy pananisia ed dondon bagat nen Kristo, makapikareenan tayod si Jehova tan magmaliw tayon maapit ya kaaro To.—Roma 5:1.
11. Akin et manpipikasi tayo diad ngaran nen Jesus?
11 Pisalamatan tayoy Jehova ta makapanpikasi tayo ed sikato diad panamegley na Anak to. Si Jesus so uusaren to pian iter iray kekerewen tayo. Dedengelen tan eebatan nen Jehova iray kerew tayo no ipipikasi tayo iratan diad ngaran nen Jesus. Oniay imbaga nen Jesus: “Antokaman so kerewen yo diad ngaran ko, saya so gawaen ko, pian nigloria so Ama ed panamegley na Anak.”—Juan 14:13, 14.
12. Anto ni sakey ya rason ya misalamat tayod si Jehova?
12 Lapud dondon bagat nen Jesus, sarag nen Jehova ya perdonaen iray kasalanan tayo. Diad Biblia, adeskribe si Jesus ya “atagey a saserdote [ya akayurong] ed nikawanan na trono na Sankatagyan diad katawenan.” (Heb. 8:1) Abitla met ya si Jesus so “mananulong tayo a kaiba na Ama.” (1 Juan 2:1) Misatsalamat tayo ed si Jehova ta say pinili ton Atagey a Saserdote et si Jesus. Natatalosan nen Jesus iray kakapuyan tayo tan sikato ni ingen so “mikakasi . . . parad sikatayo”! (Roma 8:34; Heb. 4:15) Aliwa tayon perpekto kanian no anggapoy dondon bagat nen Jesus, ag-itayo makapanpikasi ed si Jehova. On, kulang so salita pian napisalamatan tayoy Jehova ed mabmablin regalo tod sikatayo—say mismon Anak to!
IPIKASI IRAY AGAGI
13. Diad samay labi antis na impatey nen Jesus, antoy ginawa to ya pakapatnagan ya inar-aro to ray disipulo to?
13 Diad samay labi antis ya ompatey si Jesus, sikatoy nampikasi na andukdukey. Impikasi to iray disipulo to tan kinerew tod Ama to ya “bantayan [to] ra lapud samay mauges.” (Juan 17:15) Talagan inar-aro nen Jesus iray disipulo to! Anta asingger lan litisen tan pateyen, sikara nin siansiay sankanonot to.
Anto ray sarag mon ipikasi parad saray agagi tayo? (Nengnengen so parapo 14-16)d
14. Antoy sakey ya paraan pian nipatnag tayoy panangaro ed saray agagi?
14 Aligen tayoy Jesus, aliwan sarili tayo labat so sankanonot tayo no manpipikasi tayo. Lanang tayo met ya ipikasi iray kaagian tayo. Sakey itan ya paraan pian naunor tayo imay ganggan nen Jesus ya, “Manaaroan kayo.” (Juan 13:34) No lanang iran kaiba ed pikakasi tayo, nanengneng nen Jehova ya inar-aro tayo ra. Diad tua, say pangipikasi tayod sikara so sankaabigan ya nitulong tayo. Ibabaga na Biblia ya “balbaleg so nagawaan na masimoon a pikakasi na sakey a matunong.”—Sant. 5:16.
15. Akin et kaukolan tayon ipikasi iray agagi?
15 Kaukolan tayon ipikasi iray agagi ta amayamay so subok ya dadalanen da. Kerewen tayod si Jehova ya tulongan to ran naanosan day sakit, irap na bilay, kalamidad, guerra, panagbawal na gobierno, tan arum ni ran subok. Ipikasi tayo met iray masakripisyon agagi ya ontutulong ed disaster relief. Kasin wala ray kabat mon agagi ya ondadalan ed subok? Maabig no espisipikom ya bitlaen so ngaran da diad pikakasim. Tua so panangaro tayo ed saray agagi no lanang tayon ipipikasi ed si Jehova ya tulongan to ra ed saray problema da.
16. Akin et kaukolan tayon ipikasi iray mangidadaulo?
16 Agtayo met komon lilingwanan ya ipikasi iray agagin lalaki ya mangidadaulo ed kongregasyon. Seguradon naapresya dan maong no amta ran ipipikasi tayo ra ta kakkaukolan da itan. Anggan si apostol Pablo et kinerew tod saray agagi ya ipikasi da komon. Oniay insulat to: “Ipikasi yo ak met, pian natulongan ak a makapansalita, diad ontan et makpel ak a makapanpulong nipaakar ed sagradon sekreto na maong a balita.” (Efe. 6:19) Diad panaon tayo, dakdakel so makukulin brother ya mangidadaulo ed sikatayo. Nipanengneng tayo ya inar-aro tayo ra no ipikasi tayod si Jehova ya bendisyonan to so amin ya gagawaen da parad sikatayo.
NO SIKA SO MANGIDAULO NA PIKAKASI
17-18. Diad anto ran pagkakataon ya nakerew itayon mangidaulo na pikakasi, tan antoy nepeg tayon tandaan?
17 No maminsan, sikatayo so nakerew ya mangidaulo na pikakasi. Singa bilang, no sakey kan sister tan walay angitagar ed sikan sister ed Bible study to, ompan kerewen to ya sikay mangidaulo na pikakasi. No agmo ni kabat ya maong imay Bible study, mas maabig no dia ka lad pansaran pikakasi pian nasegurom ya say ipikasim et dugaruga ed pankaukolan na samay Bible study.
18 Saray brother so aka-assign ya mangidaulo na pikakasi parad pantitipon antis ya manpulong tan diad aral na kongregasyon. No apribilehyoan ka ya mangidaulo na pikakasi, tandaan mo no antoy gagala na ontan iran pantitipon. Agtayo uusaren so pikakasi pian simbawaen iray agagi odino singa tayo mangibabaga na announcement. Diad saray aral tayo, maslak et limaran minuto labat so parad kansion tan pikakasi. Kanian no sikay mangidaulo na pikakasi, iwasan moy “dakel a salita,” lalo la diad panlukas ya pikakasi.—Mat. 6:7.
MAGMALIW YA MAPIKASI
19. Antoy nepeg tayon gawaen pian akaparaan tayo ed isabi na agew na panangukom nen Jehova?
19 Dapat mas mapikasi tayo natan, lalo la ta asingsingger lay agew na panangukom nen Jehova. Oniay bilin nen Jesus: “Mansiansia kayon aliing, a manpikasi kayon masimoon ed amin a panaon pian makaliktar kayod sarayan amin a nepeg a nagawa.” (Luc. 21:36) On, no lanang tayon manpikasi, ag-itayo ontemeg ed espiritual tan alerto tayo ed isabi na agew nen Jehova.
20. Antoy gawaen tayo pian saray pikakasi tayo et singa ambalbalingit ya insenso?
20 Anto ray apantongtongan tayo? Talagan balbaleg ya pribilehyo ya naasinggeran tayoy Jehova kada no manpipikasi tayo. Say dapat ya manunan karga na pikakasi tayo et saray direktan mikonektaan ed gagala nen Jehova. Agtayo met lilingwanan so misalamat ed si Jehova lapud Anak to tan ed Panarian. Ipikasi tayo met iray agagi. Tan siempre labay met nen Jehova ya ipikasi tayo ray inagew-agew ya pankaukolan tayo, pati say espiritualidad tayo. No ipaparaan tayon maong iray pikakasi tayod si Jehova, ipapanengneng tayo ya papablien tayo iyan nikadkaduman pribilehyo. No ontan so gawaen tayo, saray pikakasi tayo et singa ambalbalingit ya insenso ya “makapaliket”ed si Jehova.—Pro. 15:8.
KANSION 45 Say Dadalepdepen na Pusok
a Misatsalamat tayo ta makaasingger tayo ed si Jehova panamegley na pikakasi. Labay tayo ya saray pikakasi tayo et singa ambalbalingit ya insenso ya makapaliket ed sikato. Pantongtongan tayo ed sayan artikulo no anto ray sarag tayon ipila ed saray pikakasi tayo tan no anto ray nepeg tayon tandaan no mangidaulo tayo na pikakasi.
b DESKRIPSION NA LITRATO: Indaulo na brother so pikakasi kaibay asawa to, tan kinerew toy proteksion parad maneeskuela ya anak da, biskeg parad mansasakit ya ateng da, tan say iyaligwas na Bible study nen asawa to.
c DESKRIPSION NA LITRATO: Misasalamat so brother ed saray intarya nen Aman Jehova, singa say dondon bagat nen Jesus, sayan marakdakep ya dalin tayo, tan saray masustansian panangan.
d DESKRIPSION NA LITRATO: Ipipikasi na sister ya igiya nen Jehova so Mananguley ya Ulop, tan tulongan to iray agagin asalanta na kalamidad tan saray agagin walad prisoan.