Agmo La Ipapaleen so Pampabautismom

1. Anto ray rason akin et manpabautismo so sakey ya too?

KASIN inar-arom si Jehova, say Dios ya angiter ed sika na bilay mo tan arum nin sankaabigan ya regalo? Kasin labay mon patunayan so panangarom ed sikato? Say sankaabigan ya paraan pian napatunayan mon inar-arom si Jehova et no idedikam so bilay mod sikato tan manpabautismo ka. No ontan so gawaen mo, magmaliw kan parte na pamilya nen Jehova. Makaseguro ka ya iwanwan tan asikasoen ka na Amam tan Kaarom ta kayarian to ka la. (Sal. 73:24; Isa. 43:​1, 2) Tan no indedikam lay bilay mo ed Dios tan nampabautismo ka la, wala lay ilalom ya manbilay na andi-anggaan.—1 Ped. 3:21.

2. Antoy pantongtongan tayo ed sayan artikulo?

² Kasin manaalangan kan manpabautismo? No ontan so situasyon mo, tandaan mo ya agmo bukbukor. Milyon-milyon so singa ontan met ed sika ya antis iran manpabautismo et dakel ni kaukolan dan umanen ed ugali tan panagnonot da. Pero natan et malikeliket tan masetseseg la ran manlilingkor ed si Jehova. Diad tua, anggan saray Kristiano nen inmunan siglo et wala met iray subok ya dinalan da antis iran nampabautismo. Pantongtongan tayod sayan artikulo no anto iratan, tan no antoy naaralan tayo ed alimbawa ra.

NAMPABAUTISMO IRAY SAMARITANO

3. Anto ray kaukolan ya gawaen na saray Samaritano antis iran nabautismoan?

³ Nensaman, nen wadiad dalin si Jesus, walay sekta na relihyon ya say tawag ed sikara et Samaritano. Dakel ed sikara so manaayam diad syudad na Siquem tan Samaria, diad norte na Judea. Say panisiaan labat na saray Samaritano et amay unonan limaran libro na Biblia—manlapud Genesis anggad Deuteronomio. Tan nayarin panisiaan da met so libron Josue. Pero no say sakey ya Samaritano et labay toy nabautismoan bilang Kristiano, kaukolan ton panisiaan tan awaten so amin ya walad Salita na Dios. Manisia met iray Samaritano ya walay onsabin Mesias ta amta da may insipan na Dios ya walad Deuteronomio 18:​18, 19. (Juan 4:25) Balet pian nabautismoan ira, kaukolan dan panisiaan ya si Jesus may insipan ya Mesias. Tan ontan so ginawa na “dakel a Samaritano.” (Juan 4:39) Say sakey nin subok ed sikara et walay busolan ed baetan na saray Samaritano tan saray Judio. Kanian no say sakey ya Samaritano et labay toy nabautismoan, kaukolan ton umanen so pakanengneng tod saray Judio, lalo la ta maslak ed saray inmuunan Kristiano et Judio.—Luc. 9:​52-54.

4. Base ed Gawa 8:​5, 6, 14, antoy reaksion na arum ya Samaritano nen pinulongan ira nen Felipe?

⁴ Antoy akatulong ed saray Samaritano pian napakiwas iran manpabautismo? Nen linmad Samaria si Felipe ya ebanghelisador tan ‘impulong tod saray Samaritano so Kristo, inawat na arum ed sikara so salita na Dios.’ (Basaen so Gawa 8:​5, 6, 14.) Dinengel day Felipe anggano sikatoy sakey ya Judio. Seguro anonotan da ra may bersikulo ed Kasulatan ya mangibabagan anggapoy lalabien na Dios. (Deu. 10:​17-19) Kanian ‘inimano dan maong iray imbaga nen Felipe’ nipaakar ed Kristo. Tan nen anengneng da iray tanda ya ginawa nen Felipe, singa nen pinaabig to ray mansasakit tan pinapaway to ray demonyo, anisia ra ya sikatoy imbaki na Dios.—Gawa 8:7.

5. Anto ray naaralan mo ed saray Samaritano?

⁵ Wala komoy rason na saray Samaritano ya ag-ondengel ed si Felipe ta sakey ya Judio. Tan sarag da komon ya irason ya kulang ni amta da ed Salita na Dios. Pero antoy ginawa ra? Nen akombinse ira ya tua so ibabangat nen Felipe, agla ra nampaleen. Nampabautismo ran tampol! Oniay ibabaga na Biblia: “Sanen anisia rad si Felipe, a mangiyaabawag na maong a balita nipaakar ed Panarian na Dios tan ed ngaran nen Jesu-Kristo, lalaki tan bibii so nampabautismo.” (Gawa 8:12) Sika ey? Kasin kombinsido ka ya tua so ibabaga na Biblia, tan saray Tasi nen Jehova so mangipapanengneng na samay tuan panangaro ya imbaga nen Jesus ya pakabidbiran na saray tuan Kristiano? (Juan 13:35) No on, agka sirin natatakot ya manpabautismo. Mantiwala ka ya bendisyonan nen Jehova itan ya desisyon mo.

6. Anto ray naaralan mo ed alimbawa nen Ruben?

⁶ Si Ruben ya taga Germany et binmaleg ed pamilyan Tasi. Pero nen kabataan la, panduaruwaan to no kasin tua ya walay Dios. Antoy ginawa to? Inamin tod sarili to ya agto amta iray ebidensya ya manpapatunay ya talagan walay Dios. Kanian naisip to ya i-personal study itan. Kuan to: “Inaral ko no anton talagay tua. Aminpigak ya in-personal study so nipaakar ed ebolusyon.” Binasa nen Ruben so libron Is There a Creator Who Cares About You? Balbaleg kuno so nitulong to ’tan pian ombiskeg so pananisia to ed Dios. Kuan tod sarili to: ‘Agi! Talagan tua si Jehova.’ Insan nen pinmasyar si Ruben diad world headquarters tayo, lalo to kunon anengneng so pankakasakey tan aroan na saray agagi anggano nanduruma so lahi da. Kanian kapawil nen Ruben ed Germany, nampabautismo la, tan 17 so taon tod saman. Kasin wala met so panduaruwaan mo ed saray papanisiaan tayo? No wala, i-research mo itan ed saray publikasyon tayo. Tandaan mo ya naekal labat so panduaruwam no walaan kay “suston kakabatan.” (Efe. 4:​13, 14) Basam tan bantayan mo iray eksperiensya ya mangipapanengneng ed aroan tan pankakasakey na saray lingkor nen Jehova diad interon mundo. Tan obserbaan mo met no panon itan ya ipapanengneng na saray agagi ed kongregasyon yo. No ontan so gawaen mo, diman mo lalon nanengneng ya tua so aroan tayo.

NAMPABAUTISMO SI SAULO YA TAGA TARSO

7. Akin et kaukolan ya umanen nen Saulo so panagnonot to?

⁷ Say onsublay ya pantongtongan tayo et say alimbawa nen Saulo ya taga Tarso. Atagey so posisyon nen Saulo ed Judaismo, kanian kabkabat na saray Judio. (Gal. 1:​13, 14; Fil. 3:5) Nen panaon to, apostata so pakanengneng na dakel ya Judio ed saray Kristiano, kanian pinairap tan pinasegsegang ira nen Saulo. Say amta to, panlabayan na Dios may gagawaen to. (Gawa 8:3; 9:​1, 2; 26:​9-11) Kanian no bilang ta manisia si Saulo ed si Jesus tan nabautismoan bilang Kristiano, amta to ya sikatoy napairap tan napasegsegang met.

8. (a) Antoy akatulong ed si Saulo pian napakiwas ya manpabautismo? (b) Base ed Gawa 22:​12-16, panon ya tinulongan nen Ananias si Saulo? (Nengnengen met so litrato.)

⁸ Antoy akatulong ed si Saulo pian napakiwas ya manpabautismo? Nen apaoli lay Jesus tan wala lad tawen, nampanengneng ed si Saulo. Walay sinminag ya liwawa kanian abulag si Saulo. (Gawa 9:​3-9) Taloy agew ya aga angan, tan seguradon dinalepdep to iman ya agawa. Atalosan nen Saulo ya si Jesus so Mesias, tan saray Kristiano so tuan relihyon. Seguradon sankanonot to may impamatey ed si Esteban, tan nakokonsiensian maong ta sinuportaan to itan! (Gawa 22:20) Kayari na taloy agew, sikatoy nila na disipulon si Ananias. Maar-aroy impitongtong to ed si Saulo, tan pinaabig to kanian akanengneng la. Insan pinaseseg to ya agto la ipapaleen so pampabautismo to. (Basaen so Gawa 22:​12-16.) Mapaabeban inawat nen Saulo so panamaseseg nen Ananias kanian nampabautismo.—Gawa 9:​17, 18.

9. Anto ray naaralan mo ed si Saulo?

⁹ No say sankanonot nen Saulo et say reputasyon to tan mas antakot toy too, agto pilien so magmaliw ya Kristiano. Pero andi, aga pinmayag ya makaamper iratan ed pampabautismo to. Mapaabeba ton inuman so kabibilay to nen akombinse ya si Jesus so Mesias. (Gawa 26:​14, 19) Akaparaan si Saulo ya magmaliw ya patumbok nen Kristo anggano amta to ya napairap tan napasegsegang met. (Gawa 9:​15, 16; 20:​22, 23) Nen bautismado la, tuloytuloy ya nantiwala ed Dios tan balbaleg so talek to ya tulongan nen Jehova pian naanosan to ray nanduruman subok. (2 Cor. 4:​7-10) No manpabautismo ka la bilang Tasi nen Jehova, walan-walay subok ya dalanen mo tan wala ray onkontra ed sika. Pero nia so segurado: Nasarag mo iratan ta tulongan ka nen Jehova tan Jesus, tan agda kan balot paulyanan.—Fil. 4:13.

10. Anto ray naaralan mo ed alimbawa nen Anna?

¹⁰ Binmaleg si Anna ed pamilyan Kurdish diad Eastern Europe. Nen nampabautismo si nanay to bilang Tasi, labay met la nen Anna so manaral na Biblia. Kanian impatanir tod si tatay to, ta 9 ni labat so taon to ed saman. Pinmayag si tatay to. Pero walay nibabaga na saray kanayon da ya kaamong da. Imbaga na kakanayon da ya kababaing so pamilya da no walay anggan sakey ed sikara ya mansalat na relihyon. Pero nen 12 lay taon nen Anna, desidido la ya manpabautismo kanian impatanir to lamet itan ed si tatay to. Tinepetan nen tatay to no talaga kasin desisyon to iman odino ompan pipiliten labat na arum. Oniay imbaga nen Anna: “Inar-arok si Jehova.” Kanian pinmayag si tatay to. Nen abautismoan lay Anna, binalawbalaw na saray kakanayon da tan aliwliway panagtrato dad sikato. Onia ingey imbaga na laki tod ama: “Mas maong nin imoral ka tan masigarilyo ka nen say nan-Tasi ka.” Antoy akatulong ed si Anna pian nasarag to yan subok? Imbaga to: “Pinabiskeg nen Jehova so liknaan ko, tan wadtan met si nanay tan tatay ko ya sinmuportad siak.” Isusulat kuno nen Anna iray agawad bilay to ya aliklikna toy tulong nen Jehova. Papawil-pawilen to iratan pian agto nalingwanan ya wadtan ya lanang si Jehova parad sikato. Kanian no natatakot kan manpabautismo ta ompan wala ray onkontra o manbalaw ed sika, tandaan mo ya tulongan ka met nen Jehova.—Heb. 13:6.

NAMPABAUTISMO SI CORNELIO

11. Antoy situasyon nen Cornelio ya nayarin makaamper ed pampabautismo to?

¹¹ Wala met so naaralan tayo ed alimbawa nen Cornelio. Ibabaga na Biblia ya sikatoy “sakey a senturion.” Labay ton ibaga, komander si Cornelio na 100 ya sundalo diad armada na Roma. (Gawa 10:​1, paimanod leksab) Kanian respetado si Cornelio diad militar tan kabkabat ed lugar da. Ibabaga met na Biblia ya sikatoy matulong ed saray mairap-bilay tan ‘iikdan to ra na dakel a regalo.’ (Gawa 10:2) Imbaki nen Jehova si apostol Pedro ed si Cornelio pian ipulong ed sikato so maong a balita. Kasin napakiwas ya manpabautismo si Cornelio? O manalangan lapud posisyon to?

12. Antoy akatulong ed si Cornelio pian napakiwas ya manpabautismo?

¹² Antoy akatulong ed si Cornelio pian napakiwas ya manpabautismo? Ibabaga na Biblia ya “sikato tan say interon sankaabungan to et matakot ed Dios.” Tan “naynay a mikakasi ed Dios” si Cornelio. (Gawa 10:2) Nen impulong nen Pedro ed si Cornelio tan ed pamilya to so maong a balita, anisia ira ed si Kristo tan nampabautismo ran tampol. (Gawa 10:​47, 48) On, mabulos ya nansakripisyo si Cornelio tan inuman toy bilay to pian napanlingkoran toy Jehova kaibay pamilya to.—Jos. 24:15; Gawa 10:​24, 33.

13. Anto ray naaralan mo ed si Cornelio?

¹³ Singa si Saulo, wala met komoy rason nen Cornelio ya agmanpabautismo bilang Kristiano lapud posisyon to. Pero aga pinmayag ya atan so makaamper ed sikato. Sika ey? Kasin wala met iray kaukolan mon isakripisyo pian magmaliw kan kualipikado parad bautismo? No on, tandaan mo ya tulongan ka nen Jehova. No mabulos kan manggaway baleg ya pananguman pian napanlingkoran moy Jehova tan naunor mo ray prinsipyo na Biblia, seguradon bendisyonan to ka.

14. Anto ray naaralan mo ed alimbawa nen Tsuyoshi?

¹⁴ Si Tsuyoshi ya taga Japan et kaukolan toy manggaway pananguman pian magmaliw ya kualipikado parad bautismo. Atagey so posisyon to ta assistant na headmaster na Ikenobo school. Sikat itan ya eskuelaan, ya ditan ibabangat so panag-ayos na rosas. No anggapo may headmaster, si Tsuyoshi so ibabaki ton manayos na saray rosas ed saray tulor, tan kaiba ed trabaho to so pibiang ed ritual na saray Budista. Nen naamtaan balet nen Tsuyoshi so katuaan nipaakar ed saray inaatey, atalosan to ya kontra ed Biblia iraman ya ritual. Agto labay ya makaamper so trabaho to ed pampabautismo to, kanian nandesisyon ya aglan balot mibiang ed onman iran ritual. (2 Cor. 6:​15, 16) Kinatongtong nen Tsuyoshi imay headmaster. Imbaga to iman ya desisyon to. Antoy resulta ey? Pinmayag may headmaster tan aga nakal ed trabaho si Tsuyoshi. Kayari na manga sakey taon ya impanaral toy Biblia, sikatoy abautismoan.a No bilang ta wala ray kaukolan mon umanen ed trabahom pian nagawaan moy panlabayan nen Jehova, agka mapaga ta insipan to ya itarya toy pankaukolan mo tan na pamilyam.—Sal. 127:2; Mat. 6:33.

NAMPABAUTISMO IRAY TAGA CORINTO

15. Antoy nayarin makaamper ed pampabautismo na saray taga Corinto?

¹⁵ Maslak ed saray manaayam ed syudad na Corinto nensaman et materyalistiko, imoral so kabibilay da, tan wala ray kagagawa ra ya kabusol nen Jehova. Kanian no taga Corinto ka nensaman tan labay moy magmaliw ya Kristiano, talagan nasubok ka. Pero nen linmay apostol Pablo ed satan ya syudad tan impulong toy maong a balita nipaakar ed Kristo, ‘dakel ya taga Corinto so anisia tan abautismoan.’ (Gawa 18:​7-11) Diad tua, nampanengneng si Jesu-Kristo ed si Pablo diad pasingawey, tan kuan to: “Dakel so totook ed sayan syudad.” Kanian agni inmalis si Pablo. Sakey tan kapalduan taon ni ya nampulong diman.

16. Antoy akatulong ed saray taga Corinto pian nauman day kabibilay da tan magmaliw iran kualipikado parad bautismo? (2 Corinto 10:​4, 5)

¹⁶ Antoy akatulong ed saray taga Corinto pian napakiwas iran manpabautismo? (Basaen so 2 Corinto 10:​4, 5.) Tinulongan ira na Salita na Dios tan na masanton espiritu pian nauman day kabibilay da. (Heb. 4:12) Kanian anggano wala ray bisyo tan mauges ya kagagawa ra singa say panagbuanges, panagtakew, tan homoseksualidad, nitunda da iratan nen inawat day maong a balita nipaakar ed Kristo.—1 Cor. 6:​9-11.b

17. Anto ray naaralan mo ed saray taga Corinto?

¹⁷ Anggano wala ray abaybayag lan bisyo na arum ya taga Corinto, agda inisip ya imposible la ran manguman. Tan agda met inisip ya mairap so magmaliw ya Kristiano. Ginawa day anggaay nayarian da pian makapanakar ira ed makisir ya dalan ya ompugta ed bilay ya andi-anggaan. (Mat. 7:​13, 14) Sika ey? Kasin wala met so bisyom odino mauges ya kagagawam ya pansasagpotan mon itunda ta labay moy magmaliw ya kualipikado parad bautismo? No on, agka onsusuko. No bilang ta natutukso kan manggaway aliwa, ipikasim ed si Jehova ya ikdan to kay masanton espiritu to pian nalabanan moy tukso.

18. Anto ray naaralan mo ed alimbawa nen Monika?

¹⁸ Antis ya naamtaan nen Monika ya taga ed bansan Georgia so katuaan, sikatoy maayew tan mahilig ya manbantay na mauges iran palabas. Pero nansagpot ya manguman pian magmaliw ya kualipikado parad bautismo. Imbaga to: “Nen tinedyer ak, say talagan akatulong ed siak et say pikakasi. Amta nen Jehova ya labay kon gawaen so duga. Lanang to ak ya tutulongan tan igigiya.” Abautismoan si Monika nen 16 so taon to. Kasin wala met iray bisyom odino kagagawam ya kaukolan mon itunda pian awaten nen Jehova so panagdayew mo? Agka komon onsasawan onkerew na tulong ed sikato. Tandaan mo ya labalabay kan ikdan nen Jehova na masanton espiritu to.—Juan 3:34.

NO WALAY PANANISIAM, SARAG MON IYALIS SO PALANDEY

19. Antoy makatulong pian nalampasan mo ray pinmapalandey ya subok? (Nengnengen met so litrato.)

¹⁹ No bilang ta wala ray subok ya makakaamper ed pampabautismom, lanang mo komon ya isipen ya inar-aro ka nen Jehova, tan labay to ya magmaliw kan parte na pamilya to. Oniay imbaga nen Jesus ed saray disipulo to nen inmunan siglo: “No walay pananisia yo a singa kamelag na bukel na mustasa, ibaga yo ed sayan palandey, ‘La kad man,’ et onalis itan, tan anggapo so imposible ed sikayo.” (Mat. 17:20) Sarayan disipulo et pigpigaran taon da ni labat ya akaiba si Jesus kanian peles ni labat ya ombabaleg so pananisia ra. Pero impaseguro ed sikara nen Jesus ya no itultuloy dan pabiskegen so pananisia ra, tulongan ira nen Jehova pian niyalis o nalampasan da iray pinmapalandey ya subok. Ontan met so gawaen nen Jehova parad sika!

20. Antoy epekto ed sika na saray apantongtongan tayon alimbawa na saray Kristiano nen inmunan siglo tan saray agagi ed panaon tayo?

²⁰ Antokaman so rason no akin ya manaalangan kan manpabautismo, agka komon ompapayag ya makaamper itan ed sika. Manggawa kan tampol na paraan pian magmaliw kan kualipikado parad bautismo. Komon ta apaseseg ka ed alimbawa na saray Kristiano nen inmunan siglo tan saray agagi diad panaon tayo. No asarag da, seguradon nasarag mo met! Lanang mo komon ya isipen so alimbawa ra pian napakiwas ka ya idedika so sarilim ed si Jehova tan pansagpotan moy onkualipika parad bautismo. Atan lay sankarakepan ya desisyon ya gawaen mod bilay mo. Agka la sirin manpapaleen!