Mapaabebam ya Awaten ya Wala ray Agmo Amta

1. Anto ran abilidad so inter nen Jehova ed sikatayo, tan akin et inter to itan?

MAKAPAKELKELAW so impanggawa nen Jehova ed sikatayo. Walay abilidad tayon mannonot tan manaral, natatalosan tayo met iray aaralen tayo, tan amta tayo no panon tayon niyaplika iratan. Akin et ontan so impanggawa nen Jehova ed sikatayo? On ta labay to ya nawalaan tayoy “kakabatan nipaakar ed Dios.” Labay to met ya usaren tayoy nonot tayo legan tayon manlilingkor ed sikato.—Pro. 2:​1-5; Roma 12:1.

2. (a) Antoy nepeg tayon awaten ed sarili tayo? (Job 37:​23, 24) (Nengnengen met so litrato.) (b) Akin et maabig no awaten tayo ya wala ran talagay agtayo amta?

² Tua, walay abilidad tayon mannonot tan makaaral, pero awaten tayo ya dakel nin siansiay agtayo amta tan agtayo natatalosan. (Basaen so Job 37:​23, 24.) Imanoen so alimbawa nen Job. Nen aminpigan tinepetan nen Aman Jehova, diman to atalosan ya dakdakel manayay agto amta. Lapud satan, apakiwas si Job ya manpaabeba tan umanen so panagnonot to. (Job 42:​3-6) Singa si Job, maabig no awaten tayo ya wala ran talagay bengatla ya agtayo amta. Atan so mamakiwas ed sikatayo ya manpaabeba tan mantiwala ya ibagan-ibaga ed sikatayo nen Jehova iray kaukolan tayon naamtaan pian makapandesisyon tayoy duga.—Pro. 2:6.

3. Anto ray pantongtongan tayo ed sayan artikulo?

³ Pantongtongan tayo ed sayan artikulo so pigaran bengatla ya agtayo amta, tan no antoy epekto ed sikatayo lapud agtayo iratan amta. Aralen tayo met no akin ya mas maabig ya agtayo la amta iratan. Makatulong irayan punto pian lalon ombiskeg so tiwala tayo ya saray kaukolan tayon naamtaan et impaamta lad sikatayo nen Jehova, “samay perpektoy kakabatan to.”—Job 37:16.

AGTAYO AMTA NO KAPIGAN SO ISABI NA ANGGAAN

4. Base ed Mateo 24:​36, antoy sakey ed saray agtayo amta?

⁴ Basaen so Mateo 24:36. Agtayo amta no kapigan so isabi na anggaan na sayan sistema na mundo. Diad tua nen walad dalin si Jesus, imbaga to ya anggan sikato et agto amtay “agew tan oras” ya isabi na anggaan.a Antis ya ompawil ed tawen, imbaga tod saray apostol to ya si Jehova labat so walaan na “pakauley” odino autoridad ya mandesisyon no kapigan nagawa iray bengabengatla. (Gawa 1:​6, 7) Tua, wala lay petsa ya inyeskedyul nen Jehova parad isabi na anggaan, pero anggapoy autoridad tayon amtaen no kapigan so eksakton pakagawa to ’tan.

5. Antoy nayarin nalikna o naisip tayo lapud agtayo amta so petsa na isabi na anggaan?

⁵ Lapud agtayo amta so eksakton petsa na isabi na anggaan, agtayo met sirin amta no pigaran taon ni panalagar tayo. Kanian ompan agtayo la makankaanos o nadismaya tayo la, lalo la no abaybayag tayo lan aalagaren so isabi na agew nen Jehova. Ompan agtayo met la nitepel so pamabalaw na saray kapamilya tayo o arum nin totoo ya mangibabagan abaybayag tayo la kunon ipupulong so anggaan pero anggad natan et agmet ni sinmabi. (2 Ped. 3:​3, 4) Seguro naisip mo, ‘No amtak labat komon so petsa na Armagedon, di mas makapananos ak tan agko pinunuyan iray mamabalaw ed siak.’

6. Akin et mas marakep ya agtayo amta no kapigan so eksakton isabi na anggaan?

⁶ Akin kasi et agla impaamta nen Jehova ed sikatayo so petsa na anggaan? On ta labay to tayon ikdan na pankanawnawa ya ipanengneng ya say rason no akin ya manlilingkor tayo et lapud sikatoy inar-aro tan pantitiwalaan tayo, aliwan lapud walay sankanonot tayon petsa. Ipanengneng tayo sirin ed si Jehova ya anggapoy deadline o expiration date na panlingkor tayod sikato. Kanian imbes ya say manunan sankanonot tayo et no kapigan so isabi na “agew nen Jehova,” mas marakep no say pampokusan tayo et saray balibalin nagawa diad satan ya mismon agew tan anggan kayari to ’tan. No atan so sankanonot tayo, mas napakiwas tayon usaren irayay nakekeran agew pian ipanengneng so debosyon tayo ed Dios, tan gawaen tayoy anggaay nayarian tayo pian paliketen si Aman Jehova.—2 Ped. 3:​11, 12.

7. Anto ray amta tayo?

⁷ Mas maabig no manpokus tayo ed saray amta tayo la. Singa bilang, amta tayo ya say kaunoran iran agew et ginmapo nen 1914. Impaisulat nen Jehova so dakdakel ya propesiya ed Biblia ya manpatunay ya ginmapo itan diad satan ya taon. Impaamta to met lad sikatayo no anto ray ontutumbok ya nagawa kayari to ’tan ya taon. Kanian kombinsido tayo ya asingsingger lay “baleg ya agew nen Jehova.” (Sof. 1:14) Amta tayo met no antoy labay nen Jehova ya gawaen tayo legan tayon aalagaren so isabi na anggaan. Labay ton ipulong tayo so “maong a balita na Panarian” diad interon dalin. (Mat. 24:14) Makapaliket ta nipupulong la so mensahe na Panarian diad manga 240 ya bansa tan diad masulok ya 1,000 ya lenguahe. On, makulikuli tayon gagawaen itan ya kimey anggano agtayo amta so “agew tan oras” na anggaan.

AGTAYO AMTA NO PANON YA ONKIWAS SI JEHOVA PARAD SIKATAYO

8. Antoy tutukoyen na saray “kimey na tuan Dios”? (Eclesiastes 11:5)

⁸ Agtayo amta so amin ya “kimey na tuan Dios.” (Basaen so Eclesiastes 11:5.) No imbagan “kimey na tuan Dios,” atan iramay gagawaen nen Jehova o saray iyaabuloy ton nagawa pian nasumpal so linawa to. Agtayo amta so eksakton rason no akin ya iyaabuloy ton nagawa so sakey ya bengatla, tan agtayo met amta no antoy eksakton gawaen to parad sikatayo. (Sal. 37:5) Saray “kimey na tuan Dios” et inkompara na Biblia ed ibabaleg na ugaw diad eges na ina to. Anggan saray scientist et agda ni masyadon natatalosan anggad natan no panon itan ya nagagawa. Ontan tayo met. Anggan antoy gawaen tayo, agtayo natalosan so amin ya “kimey na tuan Dios.”

9. Antoy nayarin nalikna o naisip tayo lapud agtayo amta no panon so eksakton ikiwas nen Jehova parad sikatayo?

⁹ Lapud agtayo amta no panon so eksakton ikiwas nen Jehova parad sikatayo, ompan manalangan tayo laingen ya mansakripisyo parad sikato. Singa bilang, ompan manalangan kan pasimplien so bilay mo o manboluntaryo ed sakey ya lugar ya daiset so Tasi. Isipen pa met iray agagi ya agda nanaabot iray goal da anggano gagawaen da lay anggaay nayarian da; saray agagi ya pulong lan pulong pero anggapoy nanaalmo dan iyaralan na Biblia; odino saray agagi ya mankikimey ed proyekto na organisasyon tayo ya agnasutsumpal lapud dakel so makakaamper. Diad ontan iran situasyon, ompan isipen da ya anggapod sikaray pabor nen Jehova.

10. Anto ran kualidad so naaralan tayon ipanengneng lapud agtayo amta no panon so eksakton ikiwas nen Jehova parad sikatayo?

¹⁰ Lapud agtayo amta no panon so eksakton ikiwas nen Jehova parad sikatayo, naaralan tayoy magmaliw ya mapaabeba tan napakiwas tayon bidbiren ya mas atagey iray kanonotan to nen saray kanonotan tayo. (Isa. 55:​8, 9) Naaralan tayo met so mas mantiwala ed si Jehova ta amta tayo ya amin ya balibalin nagagawaan tayo et lapud tulong to. Kanian no mabunga so ministeryo tayo o maong so nansumpalan na proyekto na organisasyon tayo, duga labat ya ipaarap tayod sikato so dayew. (Sal. 127:1; 1 Cor. 3:7) Pero panon to no say nagawa et duma ed samay iilaloan tayo? Kaukolan tayon tandaan ya amta nen Jehova so amin ya nagagawa. (Isa. 26:12) Gawam labat no antoy betang mo, tan mantiwala ka ya gawaen met nen Jehova so betang to. Seguradon igiya to ka. Pero agmo iilaloan ya gawaen to itan diad makapakelkelaw ya paraan ya singa ginawa to nensaman.—Gawa 16:​6-10.

11. Anggano agtayo amta so eksakton ikiwas nen Jehova, anto balet so amta tayo?

¹¹ Anggano agtayo amta no panon so eksakton ikikiwas nen Jehova, amta tayo balet ya sikatoy maar-aro, patas, tan marundunong ya Dios. Amta tayo met ya papablien ton maong iray gagawaen tayo parad sikato tan parad saray agagi. Tan amta tayo ya si Jehova et Dios ya amta toy ombales. Aga ompayag ya agto natumangan o nabendisyonan iray matoor ed sikato.—Heb. 11:6.

AGTAYO AMTA NO ANTOY NAGAWA NABUAS

12. Antoy ibabaga na Santiago 4:​13, 14 ya agtayo amta?

¹² Basaen so Santiago 4:​13, 14. Agtayo bemben so bilay tayo, kanian agtayo amta no antoy nagawad sikatayo nabuas. Diad sayan mundo, dakel ed sikatayo so nabibiktima na “panaon tan saray ag-iilaloan a nagawa.” (Ecl. 9:11) Kanian anggano dakdakel so plano tayod bilay, agtayo amta no kasin nasumpal o nagawaan tayo iratan ya amin.

13. Antoy nayarin nalikna o naisip tayo lapud agtayo amtay nagawad arapen?

¹³ Lapud agtayo amtay nagawad arapen, makaaru-arum itan ed saray nononoten tayo. Ompan panaaburidoan tayon lanang iray posiblin nagawa kanian nabalang laingen so liket tayo. No wala ray ag-iilaloan ya nagawa, singa say aksidente o kalamidad, seguradon naproblema tan naermenan tayo. Diad kabaliktaran balet, no walay iilaloan tayon nagawa pero ag-agawa, ompan nadismaya tayo met tan onkapuy so liknaan tayo.—Pro. 13:12.

14. Iner akadepende so liket tayo? (Nengnengen met so litrato.)

¹⁴ No manmamatoor tayod si Jehova anggano agtayo amtay nagawa nabuas, ipapanengneng tayo ya say rason no akin ya manlilingkor tayo et lapud panangaro tayod sikato. Dakel so salaysay ed Biblia ya mangipapanengneng ya aglanang ya ipapaliis nen Jehova iray lingkor to ed saray subok o problema. Agmet ibabangat na Biblia imay papanisiaan na arum ya kapalaran—ya implano la kuno na Dios so amin ya nagawad bilay tayo. Amta nen Jehova ya say liket tayo et ag-akadepende ed no kasin amta tayoy nagawad arapen o andi. Imbes, akadepende itan ed pangunor tayod sikato tan ed panmatalek tayod panangigiya to. (Jer. 10:23) No lanang kan manpapaigiya ed si Jehova kada no mandedesisyon ka, singa ibabagam ya: ‘No linawa nen Jehova, gawaen ko iya.’—Sant. 4:15.

15. Anggano agtayo amtay nagawa kada agew, anto balet so amta tayo?

¹⁵ Anggano agtayo amta no antoy nagawa kada agew, amta tayo balet ya walay ipaparaan nen Jehova parad sikatayo ya bilay ya andi-anggaan—balanglan diad tawen o diad dalin. Amta tayo ya agto nayarian so mantila kanian sumpalen ton sumpalen so amin ya insipan to. (Tito 1:2) Ibabaga na Biblia ya ‘diad gapo ni labat et impasakbay to lay pansumpalan, tan nensaman ni et impasakbay to la ray agni agawa.’ Si Jehova labat so makagawa ed satan! Dakel la ray impropesiya to ya agawa la, kanian makaseguro tayo ya ontua so amin ya impropesiya to ya nagawa ni diad arapen. (Isa. 46:10) Amta tayo met ya anggano anto ni tay nagawa, tuloytuloy itayon aroen nen Jehova. (Roma 8:​35-39) Makaseguro tayo ya ikdan to tayoy karunongan, ligliwa, tan biskeg pian nitepel tayoy anggan anton subok ya onsabi. On, nailaloan tayoy tulong tan panamendisyon to.—Jer. 17:​7, 8.

AGTAYO MASYADON NATATALOSAN SO KATUAAN YA KABKABAT TO TAYO NEN JEHOVA

16. Antoy amta nen Jehova nipaakar ed sikatayo, tan antoy nalilikna na arum ed satan?

¹⁶ Basaen so Salmo 139:​1-6. Kabkabat to tayo nen Jehova ta sikato so Amalsa. Amta toy amin ya walad nonot tan puso tayo. Amta to ray ibabaga tayo tan no akin ya imbaga tayo itan. Amta to met so amin ya gagawaen tayo tan no akin ya onmay ginawa tayo. On, walad sikatayoy atension nen Jehova. Singa imbaga nen Arin David, babantayan to tayo nen Jehova tan singa wala labat ed abay tayo, kanian mainomay tayon naasinggeran no kaukolan tayoy tulong to. Isip mo pa: Kabkabat tan iimanoen ka na Sankatagyan ed interon uniberso, say Amalsa ed tawen tan dalin! Antoy naliliknam ed satan? Seguro agka makapanisia! Ontan met so alikna nen David. Kuan to: “Satan a kakabatan et makapakelkelaw ed siak. Atagtagey itan kanian agko natalosan.”—Sal. 139:​6, paimanod leksab.

17. Anto ray rason akin et wala ray totoo ya mairap dan panisiaan ya kabkabat tan iimanoen ira nen Jehova?

¹⁷ Anto ray posiblin rason akin et mairap tayon panisiaan ya si Jehova et maar-aron Ama tan iimanoen to tayo? Seguro lapud binalegan tayon pamilya, kultura, o abangonan tayon relihyon. Ompan iisipen met na arum ya agla ran balot imanoen nen Jehova lapud graben kasalanan ya agawaan da nensaman. Pakalikna ra et arawrawi lay Dios ed sikara, ya singa alikna met nen David. (Sal. 38:​18, 21) Tan isipen pa met so sakey ya too ya pansasagpotan ton umanen so kabibilay to pian naunor toy Dios. Seguro naisip to, ‘Akin et kaukolan ko ni manguman? No talagan kabkabat tan natatalosan ak nen Jehova, akin et agto la tanggapen no siopa ak?’

18. Akin et maabig no awaten tayo so katuaan ya kabkabat to tayo nen Jehova? (Nengnengen met so litrato.)

¹⁸ Anggano mairap ya panisiaan ya kabkabat itayo nen Jehova, akin et maabig no awaten tayo itan ya katuaan? On ta no kombinsido tayo ed satan, diman tayo natalosan ya mas kabkabat to tayo nen say pakapikabat tayod sarili tayo, tan wala ray nanenengneng ton kamaongan ed sikatayo ya agtayo nanenengneng. Tua, amta to ray kakapuyan tayo, pero tandaan tayo ya amta to met no akin ya wala ray ontan ya kakapuyan tayo. On, natatalosan to ka, tan labalabay to kan tulongan ya manguman ta inar-aro to ka. (Roma 7:15) Baleg so tiwala to ya labay mon gawaen so duga. No isipen mo iratan ya amin, magmaliw kan maliket ed panlilingkor mod si Jehova tan makapanmatoor kad sikato.

19. Anto ray amta tayo nipaakar ed si Jehova?

¹⁹ Antoy makatulong pian naawat tayo so katuaan ya talagan kabkabat tan iimanoen to tayo nen Jehova? Isipen tayo iray ibabangat na Biblia nipaakar ed sikato. Singa bilang, amta tayo ya si Jehova et aro. Segurado tayo ed satan. (1 Juan 4:8) Amta tayo met ya maong so pansumpalan tayo no unoren tayo ray ganggan to. Inter to iratan ta inar-aro to tayo. Say sakey nin amta tayo et labalabay nen Jehova ya manbilay tayo na andi-anggaan. Diad tua, inter to ingen so mismon Anak to ya ompatey parad sikatayo pian nawalaan tayo na ontan ya ilalo. Lapud dondon bagat nen Jesus, makakapanlingkor tayod si Jehova anggano wala ray kakapuyan tayo. (Roma 7:​24, 25) Amta tayo met ya “say Dios et mas baleg nen say puso tayo tan amta to so amin a bengatla.” (1 Juan 3:​19, 20) On, si Jehova labat so talagan makapikabat ed sikatayo, tan walay kompiyansa to ya nagawaan tayoy panlabayan to.

20. Antoy makatulong pian agtayo masyadon panaburidoan iray agtayo amta?

²⁰ On, mapaabeba tayon awaten ya wala ran talagay agtayo amta. Makaseguro tayo balet ya impaamta la nen Jehova ed sikatayo so amin ya kaukolan tayon naamtaan. Kanian imbes ya panaburidoan tayo iray agtayo amta, mas maabig no manpokus tayo la ed saray amta tayo. No ontan so gawaen tayo, ipapanengneng tayo ya buo so tiwala tayod si Jehova, “samay perpektoy kakabatan to.” (Job 36:4) Anggano wala ray agtayo masyadon natatalosan natan, andi bale ta diad arapen et seguradon dakdakel so ibangat nen Jehova ed sikatayo. Tan lapud andi-anggaan lay bilay tayo, agtayo la naupotan na panaon ya kabaten nin maong so makapadinayew ya Dios tayo!—Ecl. 3:11.