Aliwan Antikey so Lima nen Jehova!

1. Akin et nibaga tayon mabisbiskeg so tiwala nen Moises ed si Jehova nen indaulo to ray Israelita papaway ed Ehipto?

SAKEY ed saray abitla ed libro na Hebreo ya mabisbiskeg so pananisia to et si Moises. (Heb. 3:​2-5; 11:​23-25) Nanengneng ya mabisbiskeg so pananisia to nen indaulo to ray Israelita papaway ed Ehipto. Agtinmakot ed Faraon tan ed armada to. Nanmatalek ed si Jehova kanian makmakpel ton inggiya iray Israelita diad Ambalangan Dayat. (Heb. 11:​27-29) Nen manaakar la ray Israelita paarap ed Insipan ya Dalin, dakel ed sikara so nanduaruwa no kasin asikasoen ira nen Jehova. Pero si Moises, nantiwala ed Dios to. Tan aga alingo-lingo ed impantiwala to. Sinegurado nen Jehova ya walay naakan tan nainum na saray Israelita pian nasarag day biahe ra diad kalawakan.a—Exo. 15:​22-25; Sal. 78:​23-25.

2. Akin et tinepetan nen Jehova si Moises ya: “Antiktikey ta so lima nen Jehova”? (Numeros 11:​21-23)

² Tua, mabisbiskeg so pananisia nen Moises. Pero kalabas na manga sakey taon manlapud impaway na saray Israelita ed Ehipto, nanduaruwaan to may imbaga nen Jehova ya ikdan To ray karne. Milyon-milyon iray Israelita tan ngalngali anggapoy naakan ed kawalaan dan pasen. Kanian inisip nen Moises no iner kasi pangalaan nen Jehova na karne parad ontan karakel ya totoo. Pero oniay intepet nen Jehova ed sikato: “Antiktikey ta so lima nen Jehova?” (Basaen so Numeros 11:​21-23.) Diad sayan teksto, say “lima nen Jehova” et ontutukoy ed masanton espiritu to, odino say pakapanyari to. Kanian singa ibabaga nen Jehova ed si Moises ya, ‘Agka sirin manisia ya sarasarag kon gawaen no antoy imbagak?’

3. Akin et importantin panisipan tayon maong may agawa nen kinmapuy so tiwala nen Moises tan saray Israelita ed si Jehova?

³ Asalim lay nanduaruwa no kasin itarya nen Jehova so materyal ya pankaukolan mo tan na pamilyam? Balanglan asalim la odino andi ni, marakep no pantongtongan tayo may agawa nen kinmapuy so tiwala nen Moises tan saray Israelita ed si Jehova. Pantongtongan tayo met iray prinsipyo ed Biblia ya ontulong pian lalo tayon nakombinse ya aliwan antikey so lima nen Jehova.

MAKAARAL TAYOD LINGO NEN MOISES TAN SARAY ISRAELITA

4. Akin et sinmabid punto ya nanduaruwa iray Israelita no kasin sarag nen Jehova ya itaryay pankaukolan da?

⁴ Akin et sinmabid punto ya nanduaruwa iray Israelita no kasin sarag nen Jehova ya itaryay pankaukolan da? Imanoen tayoy situasyon ed saman. Medyo abayag met lan manaakar iray Israelita paarap ed Insipan ya Dalin. Kaiba da iray “nanlalaok a totoo” ya nandurumay lahi da ya akilad sikara nen pinmaway irad Ehipto. (Exo. 12:38; Deu. 8:15) Nanreklamo irayan dayo ta sinmawa la rad mana, ya anggad nanreklamo met la iray Israelita. (Num. 11:​4-6) Nanailiw da la kuno iramay dati dan kakanen ed Ehipto. Aburidon maong si Moises kanian agto la amtay gawaen to. Inisip to ni ingen ya responsabilidad to ran pakaney karne, pero agto amta no iner so pangalaan to.—Num. 11:​13, 14.

5-6. Panon ya naimpluensyaan na saray dayo iray Israelita, tan antoy naaralan tayo ed satan?

⁵ Mapatnag ya naalisan iray Israelita na saramay kakaiba dan dayo. Agpinabli na sarayan dayo no antoy ginawa nen Jehova parad sikara, tan onman met lay nagmaliw ya ugali na saray Israelita. Nayarin nagawa met itan ed sikatayo. Aliwan maapresya so dakel ya totoo natan, tan ag-ira kontento ed no antoy walad sikara. Kanian no agtayo manalwar, ompan naalisan tayo na ontan ya ugali. Singa bilang, ompan nailiw tayo may datin kabibilay tayo, odino ompan nainggit tayod bilay na arum. Pero tandaan tayo ya mas maliket so bilay no kontento tayo, anggan anto ni tay situasyon tayo.

⁶ Anto ni naaralan tayod sayan agawa? Aga komon nilingwanan na saray Israelita imay imbaga nen Jehova ya say pangiter tod sikara na mainawan bilay et no akasabi la rad Insipan ya Dalin, aliwan legan ya paarap ni ra labat ditan. Ontan met ed sikatayo natan. Tandaan tayo ya say insipan nen Jehova ya mainawan bilay et dia nid balon mundo. No ontan so sankanonot tayo, agtayo panaburidoan iray bengatlan anggapod sikatayo diad sayan sistema na mundo. Marakep met no dalepdepen tayo ray teksto ed Biblia ya makatulong pian lalon ombiskeg so tiwala tayo ed saray sipan nen Jehova.

7. Akin et makapantiwala tayo ya talagan aga antikey so lima nen Jehova?

⁷ Pero ompan naisip mo, akin kasi et intepet nen Jehova ed si Moises ya, “Antiktikey ta so lima nen Jehova?” Amta pa nen Moises ya makapanyari si Jehova. Pero aliwan satan labat so labay nen Jehova ya isipen to. Labay nen Jehova ya natalosan nen Moises ya nasabi ira na lima To anggan iner so kawalaan da. Kanian sarasarag To ran ikdan na dakdakel ya karne anggano wala rad arawrawi tan nisulinek ya lugar. Ontan ya ontan so ginawa nen Jehova. Anengneng na saray Israelita ya inusar nen Jehova so ‘mabiskeg ya lima to tan inyunat toy taklay to’ pian itaryay pankaukolan da. (Sal. 136:​11, 12) Kanian no ondadalan kad subok, agmo komon iisipen ya agka nasabi na lima nen Jehova.—Sal. 138:​6, 7.

8. Antoy gawaen tayo pian agtayo naalig may agawa ed dakel ya Israelita? (Nengnengen met so litrato.)

⁸ Tinoor nen Jehova may imbaga to ya ikdan toy karne iray Israelita. Angibaki na dakdakel ya pugo ya agda nasabaan. Antoy reaksion na saray Israelita? Singa ag-ira akakkanengneng na pugo! Sanagew tan sanlabi ran nanerel! Ag-ira anggan akisalamat ed si Jehova diad sayan milagro to. Sinmanok si Jehova ed inkaagum na sarayan Israelita, kanian dinusa to ra tan dakel ed sikara so inatey. (Num. 11:​31-34) Antoy naaralan tayod satan ey? Manalwar tayo ta ompan agtayo naliklikas ya magmamaliw ti la manayan maagum. Mayaman man odino mairap itayo, komon ta say manunad bilay tayo et say pantipon na “kayamanan ed tawen,” tan lanang tayon sankanonot no panon tayon napaelet so pikakaaro tayo ed si Jehova tan ed si Jesus. (Mat. 6:​19, 20; Luc. 16:9) No ontan so gawaen tayo, seguradoen nen Jehova ya ag-itayo onkulang na antokaman.

9. Antoy seguradon gawaen nen Jehova parad saray lingkor to natan?

⁹ Amta tayo ya lanang ya akaparaan si Jehova ya ontulong ed saray lingkor to. Pero labay to kasin ibaga et agti lan balot manirap tan naerasan?b Andi met. Pero no bilang ta naeksperiensya tayo iratan, tandaan tayo ya ag-itayon balot paulyanan nen Jehova. Iter toy biskeg ya kaukolan tayo pian nasarag tayoy antokaman ya subok. Pero say tepet, panon mon nipanengneng ya mantitiwala kad si Jehova? Pantongtongan tayoy duaran situasyon: (1) no manproproblema ka ed kuarta tan (2) no sankanonot moy materyal ya pankaukolan mo no matatken ka la.

NO MANPROPROBLEMA KA ED KUARTA

10. Legan ya manasingger so anggaan, anto ray situasyon ya lapud satan et manproblema tayo ed kuarta?

¹⁰ Legan ya manasingger so anggaan, segurado ya lalon onirap so bilay tan ombagsak so ekonomiya. Ilaloan tayo met ya lalon ompetang so isyu ed politika, wala ray onlesan guerra, ondakel so kalamidad, tan ompan wala lamet so nagawan pandemic. Kanian ompan naandian itayo na trabaho, tan naderal iray kaykayarian tan abung tayo. No ontan so nagawa, nayarin napilitan tayon mananap na balon trabaho odino onalis ed arum ya lugar kaibay pamilya tayo. Diad ontan iran situasyon, panon tayon nipanengneng ya mantitiwala tayo ya aliwan antikey so lima nen Jehova?

11. Antoy makatulong ed sika no walay problemam ed pinansyal? (Lucas 12:​29-31)

¹¹ No mapagpaga kad materyal, say sankaabigan ya gawaen mo et ibagam itan ed si Jehova. (Pro. 16:3) Ipikasim ed sikato ya ikdan to kay karunongan pian makapandesisyon kay duga. Kerew mo met ya pakalmaen toy pusom pian agka abupburidon maong. (Basaen so Lucas 12:​29-31.) Ibagam met ed si Jehova ya tulongan to ka pian naaralan moy mankontento tan agmo anapen iray bengatlan agmo met kaukolan. (1 Tim. 6:​7, 8) Marakep met no man-research kad saray publikasyon tayo, ta wala rad tay praktikal ya suhestion ya makatulong ed sika no walay problemam ed pinansyal. Dakel so mangibabaga ya atulongan ira na saray video tan saray artikulo ya walad jw.org nipaakar ed no panon ya napaliisan so problema ed kuarta.

12. Anto ran tepet so makatulong ed sakey ya Kristiano pian makapanggawa na dugan desisyon parad pamilya to?

¹² Wala ray agagi ya nandesisyon ya mantrabaho ed arum ya lugar kanian akaarawi ra ed pamilya da. Pero apruebaan na maslak ed sikara ya aliwan saman so sankaabigan ya desisyon. Kanian antis mon awaten so sakey ya trabaho, aliwa labat komon ya amay almoen mon kuarta so ikonsideram. Nonot mo met no antoy magmaliw ya epekto to ’tan ed espiritualidad mo tan ed espiritualidad na pamilyam. (Luc. 14:28) Antis kan mandesisyon, tepetan mo ni sarilim: ‘No makaarawi ak, anto kasi epekto to ’ya ed relasyon mi nen asawak? Say espiritual ya rotinak ey? Makapiaral tan makapanpulong ak ni kasi? Wala ni kasi panaon ko parad saray agagi?’ No wala ray ananak mo, pannonotan mo met iyan importantin tepet: ‘Panon kon napabaleg iray ananak ko “diad disiplina tan panamilin nen Jehova” no agda ak kaiba?’ (Efe. 6:4) No mandedesisyon ka, manpaigiya ka ed si Jehova tan dengel kad sikato, aliwan diad ibabaga na saray kakanayon tan kakaarom ya agda uunoren iray prinsipyo ed Biblia.c Imanoey eksperiensya nen Tony, ya manaayam ed western Asia. Dakel so nan-offer ed sikato na balibalin trabaho diad arum ya bansa, tan baleg so sueldoen to. Impikasi itan nen Tony tan nantongtongan da itan ya sanasawa. Antoy desisyon to ey? Anggapoy anggan sakey ya inawat tod saraman ya trabaho. Imbes ya man-abroad, nanggawa iray paraan pian nabawasay gastos na pamilya ra. Nagbabawian kasi nen Tony itan ya desisyon to? Oniay kuan to: “Lapud saman ya desisyon ko, pigaran totoo so atulongan kon nakabat day Jehova. Tan apabaleg ko ray ananak ko ya inar-aro day katuaan. Naaralan min pamilya ya basta iyaplika mi may ibabaga na Mateo 6:​33, si Jehova lay akauley ed amin ya pankaukolan mi.”

NO SANKANONOT MOY MATERYAL YA PANKAUKOLAN MO NO MATATKEN KA LA

13. Anto ray praktikal ya gawaen tayo natan pian walay kuarta tayo no matatken tayo la?

¹³ Legan tayon ontatatken, normal labat ya sankanonot tayoy arapen, tan lapud satan et ompan nasubok so tiwala tayo ed si Jehova. Papasesegen itayo na Biblia ya mankuli tayo pian walay kuartan nausar tayo no mankaukolan itayo. (Pro. 6:​6-11) Tan no iyabuloy na situasyon, mantipon tayo parad arapen. Ibabaga na Biblia ya say kuarta et proteksion. (Ecl. 7:12) Pero aliwan satan so nepeg ya manuna ed bilay tayo.

14. Panon ya makatulong so Hebreo 13:5 pian agtayo mapagpagad arapen?

¹⁴ Diad sakey ya ilustrasyon nen Jesus, indanet to ya andi-kakanaan so pantipon na kuarta no aliwa ka lanlamang ya “mayaman ed pakanengneng na Dios.” (Luc. 12:​16-21) Akin ey? On ta agtayo amta no antoy nagawa ed sikatayo nabuas. (Pro. 23:​4, 5; Sant. 4:​13-15) Sakey ni, imbaga nen Jesus ya saray papatumbok to et nepeg ya akaparaan ya mansakripisyo tan mabulos dan “taynanan” iray kaykayarian da. (Luc. 14:33) Ontan so ginawa na saray Kristiano nen inmunan siglo diad Judea. Maliket ni ran siansia anggano naandi iray kaykayarian da. (Heb. 10:34) Diad panaon tayo natan, dakel met iray agagi tayo ya naandian na kaykayarian tan nakal ed trabaho ta pinili day mansiansian neutral ed politika. (Apo. 13:​16, 17) Antoy akatulong ed sikaran manmatoor tan agda pampagaay materyal ya pankaukolan da? Kombinsido ira ed samay sipan nen Jehova ya: “Agta kan balot taynanan, tan agta kan balot paulyanan.” (Basaen so Hebreo 13:5.) Duga met labat ya manplano tayo parad arapen. Pero no bilang ta walay ag-iilaloan ya nagawa, agtayo komon lilingwanan ya agto tayo paulyanan nen Jehova.

15. Anto dapat so rason na saray Kristianon atateng diad pamapabaleg dad ananak da? (Nengnengen met so litrato.)

¹⁵ Diad arum ya bansa, say manunan rason no akin ya labay na sanasawa so nawalaay anak et pian walay mangasikaso ed sikara tan mangitarya na pankaukolan da no matatken la ra. Pero ibabaga na Biblia ya saray atateng so dapat ya mangitarya na pankaukolan na saray ananak da. (2 Cor. 12:14) Natural met labat ya no ontatatken la ray atateng, ompan kaukolan da met so tulong na saray ananak da. Tan siempre, maliket met iray ananak ya ontulong. (1 Tim. 5:4) Pero niay tandaan yo, sikayo ran Kristianon atateng: Mas nalikna yoy liket no say rason no akin ya papabalegen tan aasikasoen yo ray ananak yo et pian natulongan yo ran magmaliw ya lingkor nen Jehova, aliwan pian walay mansuportad sikayo ed pinansyal.—3 Juan 4.

16. Panon ya naiparaan na saray atateng iray ananak da pian no ombaleg ira et sarag dan suportaay sarili da? (Efeso 4:28)

¹⁶ Sikayo ran atateng, anggano ugugaw ni ray ananak yo, iparaan yo la ra pian no ombaleg ira et sarag dan suportaay sarili ra. Ipanengneng yod mismon alimbawa yo ya manmamatalek kayod si Jehova. Anggano angkelag ni ra, ipasal yo la ran mankimey pian naaralan day mankuli. (Pro. 29:21; basaen so Efeso 4:28.) Legan iran ombabaleg, tulongan yo ran magmaliw ya responsable ed eskuelaan. I-research tan iyaplika yo iray prinsipyo na Biblia pian natulongan yo ray ananak yon mandesisyon no anton klase na edukasyon so alaen da. Basta ipurek yod sikara ya say importante et amay nasuportaan day sarili da, niyuna da nin siansiay panaglingkor ed si Jehova, tan nagawaan da ray goal dad espiritual, singa say pampayunir.

17. Antoy seguradon gawaen nen Jehova?

¹⁷ On, sarasarag tan labalabay nen Jehova ya itarya so materyal ya pankaukolan na amin ya matoor ya lingkor to. Legan ya manasingger so anggaan, seguradon nasubok so tiwala tayod si Jehova. Pero anggan antoy nagawa, komon ta agtayo pandududaan so pakayari to. Tandaan mo ya anggano iner so kawalaan mo tan anggano anto ni tay situasyon mo, usaren nen Jehova so mabiskeg ya lima to tan iyunat toy taklay to pian niiter toy pankaukolan mo. On, aliwan antikey so lima nen Jehova!