‘Manpili Kayo no Siopay Panlingkoran Yo’

1. Antoy gawaen tayo pian nalikna tayoy tuan liket, tan akin et segurado tayo ed satan? (Isaias 48:​17, 18)

INAR-ARO itayo na Ama tayod tawen tan labay to ya panliketan tayoy bilay natan tan diad arapen. (Ecl. 3:​12, 13) Pinalsa itayo nen Jehova ya walaan na nanduruman talento tan abilidad. Wala ra ingey nikadkaduma so abilidad da. Pero agto tayo inikdan na abilidad ya uleyan so sarili tayo, tan anggapoy kanepegan tayo ya mangibaga no antoy duga tan aliwa. (Ecl. 8:9; Jer. 10:23) Amta nen Aman Jehova ya nalikna tayo labat so tuan liket no manlingkor tayod sikato tan unoren tayo ray ganggan to.—Basaen so Isaias 48:​17, 18.

2. Antoy labay nen Satanas ya panisiaan tayo, tan antoy ginawa nen Jehova pian napruebaan ya matila si Satanas?

² Pero, papanisiaen itayo nen Satanas ya sarag tayoy magmaliw ya maliket anggano agtayo manlingkor ed si Jehova, tan sarag tayo kunon uleyan so sarili tayo. (Gen. 3:​4, 5) Antoy ginawa nen Jehova pian napruebaan ya matila si Satanas? Inikdan toy tsansa iray totoo ya uleyan day kapara dan too tan sikaray mandesisyon no antoy duga tan aliwa parad sarili da. Pero apaneknekan ya makapuy so uley na too. Diad kabaliktaran balet, nabasa ed Biblia ya maong so nansumpalan na saramay totoo ya pinili dan panlingkoran si Jehova. Say sankaliketan ed sikara et si Jesu-Kristo. Pantongtongan tayo ed sayan artikulo no akin ya pinili nen Jesus ya panlingkoran si Jehova. Pantongtongan tayo met no akin ya duga labat ya dayewen tayoy Jehova. Insan tayo sansakeyen iray rason no akin ya pinili tayoy manlingkor ed sikato.

NO AKIN YA PINILI NEN JESUS YA PANLINGKORAN SI JEHOVA

3. Antoy inyopresi nen Satanas ed si Jesus, pero antoy ginawa nen Jesus?

³ Nen wadiad dalin si Jesus, wala may situasyon ya kaukolan toy manpili no siopay panlingkoran to. Ag-abayag kayari ton abautismoan, inopresian nen Satanas ya iter to kunoy amin ya panarian na mundo basta mandayew ed sikato anggano maminsan labat. Pero oniay imbaga nen Jesus: “Arawi ka, Satanas! Ta walan nisulat: ‘Si Jehova a Dios mo so nepeg mon dayewen, tan sikato labat so nepeg mon panlingkoran.’” (Mat. 4:​8-10) Akin et ontay desisyon nen Jesus? Pantongtongan tayoy pigaran rason.

4-5. Anto ray rason akin et pinili nen Jesus ya panlingkoran si Jehova?

⁴ Akin et pinili nen Jesus ya panlingkoran si Jehova? Say manunan rason et lapud inar-aro toy Ama to. (Juan 14:31) Say sakey nin rason et lapud amta to ya atan so dugan gawaen. (Juan 8:​28, 29; Apo. 4:11) Amta nen Jesus ya si Jehova so nanlapuan na bilay. Sikatoy napantiwalaan tan maite-iter ya Dios. (Sal. 33:4; 36:9; Sant. 1:17) Lanang ya tua so ibabaga nen Jehova ed si Jesus, tan amin ya walad si Jesus et nanlapud Ama to. (Juan 1:14) Kabaliktaran balet si Satanas. Sikato so rason no akin ya ompapatey iray totoo. Matilatila, tan sarili to labat so sankanonot to. (Juan 8:44) On, amta nen Jesus ya maomaong si Jehova tan mauge-uges si Satanas. Kanian agton balot inisip ya aligen si Satanas tan manrebelde met ed si Jehova.—Fil. 2:​5-8.

⁵ Say sakey nin rason no akin ya pinili nen Jesus ya panlingkoran si Jehova et lapud sankanonot to iray balibalin resulta no ontan so gawaen to. (Heb. 12:2) Amta nen Jesus ya no manmatoor, napasanto toy ngaran na Ama to, tan atan met so paraan pian naandi so amin ya klase na paniirap ya inggapo na Diablo diad dalin.

NO AKIN YA DUGA LABAT YA DAYEWEN TAN PANLINGKORAN TAYOY JEHOVA

6-7. Akin et dakel ya totoo natan so agmanlilingkor ed si Jehova, pero akin et duga labat ya sikato so dayewen tayo?

⁶ Dakdakel natan so agmanlilingkor ed si Jehova ta agda amta iray balibalin ugali to, tan agda met amta so amin ya kamaongan ya ginawa to parad sikara. Ontan so situasyon na saray taga Atenas nen pinulongan ira nen apostol Pablo.—Gawa 17:​19, 20, 30, 34.

⁷ Impaliwawa nen Pablo ed saray taga Atenas ya say tuan Dios so “mangiiter ed amin a totoo na bilay tan linawa tan amin a bengatla.” Imbaga to met ya “lapud [Dios] et walay bilay tayo tan onggagalaw itayo tan wala itayo.” Say Dios so Amalsa, tan “manlapud sakey a too et ginawa toy amin a nasyon na totoo.” Kanian duga labat ya sikato so dayewen tayo.—Gawa 17:​25, 26, 28.

8. Antoy agbalot gawaen nen Jehova? Ipaliwawa.

⁸ Si Jehova so Amalsa tan Sankatagyan ed interon uniberso, kanian sarag to komon ya puersaen iray totoo ya manlingkor ed sikato. Pero ag-itan balot gawaen nen Jehova. Imbes ya piliten to tayon manlingkor ed sikato, dakdakel so ginawa to pian nakombinse tayo ya walay Dios ya mangaaro ed kada sakey ed sikatayo. Diad tua, labalabay to ya onapit ed sikato so amin a klase na totoo tan magmaliw iran kaaro to anggad angga. (1 Tim. 2:​3, 4) Atan so rason no akin ya ipapasal to tayo nen Jehova ya magmaliw ya epektibo ed panagpulong tan panagbangat. Labay to ya ipaamta tayod arum so gagala to tan saray balibalin gawaen to ed arapen parad totoo. (Mat. 10:​11-13; 28:​19, 20) Tan pian organisado tayon makapandayew ed si Jehova, inter toy kongregasyon tan saray maar-aron elder ya mangasikaso ed sikatayo.—Gawa 20:28.

9. Anto ray patunay ya talagan inar-aro nen Jehova so amin ya totoo?

⁹ Panon tayon nibaga ya talagan maar-aro si Jehova? Sikatoy maomaong tan maiter, anggan diad saramay agmanisia ed sikato. Isip mo pa ’ya: Manlapud gapoy-gapo, bilyon-bilyon lan totoo so agmanguunor ed si Jehova. No antoy amta ran duga, aman so gagawaen da. Pero, agsisibletan nen Jehova iramay ontan ya totoo. Iiter to nin siansia ed sikara iray kaukolan da pian nabilay ira. (Mat. 5:​44, 45; Gawa 14:​16, 17) Aliwan satan labat. Labay to met ya na-enjoy day bilay kanian agto insiblet ed sikara so abilidad ya mangaro, manpamilya, tan nawalaan na kakaaro. Tan diad tua, amay liket ya nalilikna da kada no nanengneng day bunga na impansagpot da, nanlapu pa met itan ed si Jehova. (Sal. 127:3; Ecl. 2:24) On, dakdakel so patunay ya talagan inar-aro nen Aman Jehova so amin ya totoo. (Exo. 34:6) Pantongtongan tayo natan iray rason no akin ya pinili tayon panlingkoran si Jehova tan no panon ton bebendisyonan iray lingkor to.

NO AKIN YA PINILI TAYON PANLINGKORAN SI JEHOVA

10. (a) Antoy manunan rason akin et manlilingkor tayod si Jehova? (Mateo 22:37) (b)  Panon mon nibaga ya maan-anos si Jehova ed sika? (Salmo 103:​13, 14)

¹⁰ Singa si Jesus, say manunan rason no akin ya manlilingkor tayod si Jehova et lapud inar-aro tayon maong. (Basaen so Mateo 22:37.) No diman tayo lalon nanaamtaan iray balibalin ugali nen Jehova, diman met mas onaasingger so liknaan tayod sikato. Singa bilang, isip mo pay inkaanos nen Jehova. Nen nanrebelde iray Israelita, sikato ni so akikasi ed sikara. Kuan to: “Ipangasi yo, pagbabawian yo so mauges iran dalan yo.” (Jer. 18:11) Amta nen Jehova ya agtayo perpekto, tan sankanonot to ya dabok itayo labat. (Basaen so Salmo 103:​13, 14.) No dalepdepen moy inkaanos nen Jehova tan arum ni ran balibalin ugali to, seguradon napakiwas ka ya manlingkor ed sikato diad andi-anggaan.

11. Anto ni ray arum ya rason akin et pinili tayon panlingkoran si Aman Jehova?

¹¹ Say sakey nin rason no akin ya manlilingkor tayod si Jehova et lapud amta tayo ya atan so dugan gawaen. (Mat. 4:10) Amta tayo met iray balibalin resulta no manmatoor tayod sikato—napasanto tayoy ngaran nen Jehova, napaneknekan tayon matila so Diablo, tan napaliket tayoy puso na Ama tayo. Tan no pilien tayoy manlingkor ed si Jehova natan, walay ilalo tayon manlingkor ed sikato diad andi-anggaan!—Juan 17:3.

12-13. Antoy naaralan tayo ed eksperiensya nen Jane tan Pam?

¹² Anggano ugaw o kabataan ka ni labat, sarag mo lan aroen si Jehova. Tan atan ya panangarom ed sikato et lalon onaralem diad ilalabas na panaon. Imanoen so eksperiensya na sanagin si Jane tan Pam.a Nen ginmapo ran nanaral na Biblia, 11 ni labat so taon nen Jane tan 10 nen Pam. Aga interesadon manaral na Biblia iray atateng da. Pero pinayagan day Jane tan Pam ya iyaralan na saray Tasi, basta say kondisyon et mila met si Jane tan si Pam no mimisa so pamilya ra ed simbaan da. Oniay imbaga nen Jane: “Baleg ya akatulong ed siak imay impanaral koy Biblia pian nalabanan koy mauges ya impluensya na saray kaparak ya kabataan, singa say pan-drugs tan panggaway imoral.”

¹³ Kalabas na pigaran taon, abautismoan si Jane tan Pam, insan ira nampayunir legan dan aasikasoen iray maedad lan atateng da. No pawilen kuno nen Jane so amin ya agawad sikara diad apalabas, oniay nibaga to: “Anengneng kon mismo ya talagan aasikasoen nen Jehova iray kakaaro to, tan ‘kabat [to] iramay kayarian to,’ ya singa ibabaga na 2 Timoteo 2:19.” On, no pilien tayon aroen tan panlingkoran si Jehova, agto tayon balot paulyanan.

14. Panon tayon naiyagel si Jehova? (Nengnengen met so litrato.)

¹⁴ No wala ray mamabalaw ed si Jehova, antoy gawaen mo? Imadyin mo pa yan situasyon: Walay malet ya kaarom ya maomaong, maite-iter, tan sikato may toon mapasensya tan agmantatanem na sakit na linawa. Pero aminsan, arengel mo ya walay manederal ed sikato, tan ibabaga ra ya matilatila may kaarom tan anggapo kunoy panangasi to. Antoy gawaen mo ey? Siempre, natural labat ya iyagel mo. Mipadpara, dederalan nen Satanas tan saray alipores to so ngaran nen Jehova. Dakdakel so ikakayat dan katilaan nipaakar ed sikato. Kanian anto met so gawaen mo ey? Iyagel moy Aman Jehova. Ibagam no antoy tua. Agka ompapayag ya deralen day reputasyon to! (Sal. 34:1; Isa. 43:10) Komon ta ipanengneng tayod saray ibabaga tan gagawaen tayo ya si Jehova so pinili tayon panlingkoran.

15. Anto ran bendisyon so naawat nen apostol Pablo lapud mabulos ton inuman iray plano tod bilay? (Filipos 3:​7, 8)

¹⁵ Komon ta akaparaan tayo met ya umanen iray pangarap o plano tayod bilay pian napaliket tayoy Jehova tan niiter tayoy sankaabigan tayo ed sikato. Ontan so ginawa nen apostol Pablo. Atagey so posisyon to ed relihyon na saray Judio. Pero tinaynan to itan pian magmaliw ya patumbok nen Kristo tan makapanlingkor ed si Jehova. (Gal. 1:14) Antoy resulta na satan ya desisyon to? Alikna toy tuan liket ta inusar toy bilay to parad si Jehova, tan pribilehyo to ya nakaibay Jesus ya manuley diad tawen! Kanian anggano baleg so insakripisyo nen Pablo pian makapanlingkor ed si Jehova, anggapon balot so pagbabawian to. No aligen moy ginawa nen Pablo, seguradon anggapo met so pagbabawian mo.—Basaen so Filipos 3:​7, 8.

16. Antoy naaralan tayo ed eksperiensya nen Julia? (Nengnengen met so litrato.)

¹⁶ No manuna ed bilay tayo so panlingkor ed si Jehova, natan ni labat et bendisyonan to tayo la, tan nagkalalo la diad arapen. Imanoen so eksperiensya nen Sister Julia. Nen ugaw ni si Julia tan agto ni amta so katuaan, kaibad choir na simbaan da. Balibali boses to kanian walay akadiskobre ed sikato, tan in-train da pian magmaliw ya professional opera singer. Nagmaliw ya sikat si Julia tan ag-abayag et manpe-perform met la ed saray kabkabat ya music hall. Nen manaaral si Julia ed sikat ya music school, akatongtong toy sakey ya kaklase to nipaakar ed Dios. Tan imbaga na sayan kaklase to ya walay ngaran na Dios—say ngaran to et Jehova. Ag-abayag, ginmapo lan nanaral na Biblia si Julia ya mamidua ed sakey simba. Sinmabid punto ya nandesisyon si Julia ya manpokus lad panlingkor ed si Jehova imbes ya diad propesyon to bilang singer. Kasin mainomay iman parad si Julia? Andi! Kuan to: “Dakel so angibagad siak ya sasayangen koy talentok. Pero talagan desidido ak ya usarey bilay ko parad si Jehova tan iter so sankaabigan ko parad sikato.” No pawilen nen Julia iman ya desisyon to masulok lan 30 taon so linmabas, anto kasi nalilikna to? Kuan to: “Malikeliket ak ta si Jehova so pinilik ya panlingkoran, tan baleg so tiwalak ya iter to lanlamang so amin ya pirawat na pusok diad arapen.”—Sal. 145:16.

ITULTULOY TAYON PANLINGKORAN SI JEHOVA

17. Lapud asingger lay anggaan, antoy epekto to ’tan ed sikatayo ran manlilingkor lad si Jehova tan ed saramay andi ni?

¹⁷ Asingsingger tayo lad anggaan. Oniay insulat nen apostol Pablo: “‘Daiset labat lay panaon,’ tan ‘samay sakey ya onla dia et onsabi tan agnaatrasado.’” (Heb. 10:37) Labay ton ibaga sirin, kaukolan lan mandesisyon ya tampol iray totoo no kasin manlingkor ira ed si Jehova, ta antiktikey la so nakekeran panaon! (1 Cor. 7:29) Sikatayo ran manlilingkor lad si Jehova ey? Anggano nanduruman subok so aarapen tayo natan, itepel tayo labat ta amta tayon ‘daiset lay panaon’ na pananos tayo.

18. Antoy labay nen Jesus tan nen Jehova ya gawaen tayo?

¹⁸ Seguradon maliket si Jesus nen nandesisyon tayon magmaliw ya disipulo to. Pero papasesegen to tayo met ya mantultuloy tayon ontumbok ed sikato. (Mat. 16:24) Kanian no abaybayag ka lan manlilingkor ed si Jehova, komon ta agka onsusuko. Gawam so anggaay nayarian mon mantultuloy. On tua, aliwa itan ya mainomay. Kaukolan tayoy mansagpot pian tuloytuloy tayon makapanlingkor ed sikato. Pero no ontan so gawaen tayo, seguradon bendisyonan to tayo nen Jehova tan maliket so bilay tayo!—Sal. 35:27.

19. Antoy naaralan tayo ed eksperiensya nen Gene?

¹⁹ Iisipen na arum ya agda na-enjoy so bilay da no manlingkor ira ed si Jehova ta dakel so kaukolan dan isakripisyo. No sakey kan kabataan, kasin no maminsan et naliliknam ya singa ka nasisibletan lapud panlilingkor mo ed si Jehova? Oniay imbaga na sakey ya kabataan ya brother ya si Gene: “Pakaliknak et maer-ermen so bilay ko ta Tasi ak nen Jehova. Agko nagagawaan iramay gagawaen na arum ya kabataan. Manpa-party ra, maganggano day miinaroan, tan galaw la ran galaw na saray video game ya puros pateyan. Samantalang siak, miaral tan manpulong labat so gagawaen ko.” Antoy epekto to ’tan ed si Gene? Kuan to: “Nagmaliw ya doble so panagbilay ko. Diad gapo, maliket ak, pero ataptapew tan temporaryo labat ya liket. Kanian apaisip ak tan anonotan ko iramay katuaan ed Biblia ya dati et ibabaliwalak labat. Nandesisyon ak ya panlingkoran ko lay Jehova diad interon pusok. Manlapu lad saman, pakaliknak et eebatan nen Jehova so amin ya pikakasik.”

20. Antoy determinado tayon gawaen?

²⁰ Oniay inkansion nen David ed si Jehova: “Maliket so toon pipilien tan iyaasingger mo pian manayam ed saray sular na templom.” (Sal. 65:4) Komon ta determinado tayon manlingkor ed si Jehova, tan singa si Josue, ibaga tayo met ya: “Parad siak tan say pamilyak, manlingkor kamid si Jehova.”—Jos. 24:15.