Panon Mon Natulongan so Iyaaralan Mo Pian Napakiwas ya Manlingkor ed si Jehova?

1-2. (a) Akin et manaalangan so arum ya iyaaralan tayo na Biblia ya manlingkor ed si Jehova? (b) Anto ray pantongtongan tayo ed sayan artikulo?

KASIN manaalangan ka nensaman ya magmaliw ya Tasi nen Jehova? Ompan natatakot kad ibaga odino reaksion na saray katrabahom, kakaarom, o kapamilyam ta nayarin busolen da ka. Odino iisipen mo ya agmo lanlamang naunor iray ganggan nen Jehova. No ontan so aliknam nensaman, seguradon natalosan mo no akin ya wala ray iyaaralan mo na Biblia ya manaalangan ya manlingkor ed si Jehova.

² Amta nen Jesus ya no wala ray ontan ya pampapagaan na sakey ya iyaaralan na Biblia, baleg itan ya makaamper ed iyaligwas tod espiritual. (Mat. 13:​20-22) Pero agbasta-basta susukoan nen Jesus iray ontan ya totoo. Diad tua, legan na ministeryo to diad dalin, tinulongan to ra pian (1) naamtaan da iray makakaamper ed iyaaligwas da, (2) mas lalo dan naaroy Jehova, (3) niyuna day Jehova ed bilay da, tan (4) nasarag da so panagbalaw tan isusumpa. Panon tayon naalig si Jesus legan tayon uusaren so libron Panliketan so Bilay ya Anggapoy Anggaan! pian tulongan tayo iray iyaaralan tayo na Biblia ya manlingkor ed si Jehova?

TULONGAN MOY IYAARALAN MO PIAN NAAMTAAN TO NO ANTOY MAKAKAAMPER ED IYAALIGWAS TO

3. Akin et nayarin nairapan si Nicodemo ya magmaliw ya disipulo nen Jesus?

³ Imanoen so sakey ya kabkabat ya lider na saray Judio ya si Nicodemo. Kayari labat na manga anem bulan manlapud impangigapo nen Jesus ed ministeryo to, amta la nen Nicodemo ya si Jesus so Mesias. (Juan 3:​1, 2) Pero iyaamot toy pitotongtong tod si Jesus ta ‘natatakot ed saray Judio.’ (Juan 7:13; 12:42) Seguro inisip to ya no naamtaan na saray kapara ton Judio ya sikatoy manisia ed si Jesus, ompan ekalen dad posisyon to tan dakel so naandin kayamanan to.a

4. Panon ya tinulongan nen Jesus si Nicodemo pian naamtaan to no antoy labay na Dios ya gawaen to?

⁴ Kabisado nen Nicodemo so Mosaikon Ganggan, pero kaukolan toy tulong pian natalosan to no antoy labay nen Jehova ya gawaen to. Kanian antoy ginawa nen Jesus pian natulongan toy Nicodemo? Angiganay panaon parad si Nicodemo. Akaparaan ya mitongtong anggano labi la. Impaamta met nen Jesus no antoy kaukolan ya gawaen nen Nicodemo pian magmaliw ya disipulo to: kaukolan toy magbabawi, manpabautismo ed danum, tan ipanengneng toy pananisia ed Anak na Dios.—Juan 3:​5, 14-21.

5. Panon mon natulongan so iyaaralan moy Biblia pian naamtaan to no anto ray makakaamper ed iyaaligwas to?

⁵ Anggano dakel lay amta to may iyaaralan moy Biblia, ompan kaukolan mo nin tulongan pian naamtaan to ray makakaamper ed iyaaligwas to. Singa bilang, kasin nauupot so panaon to lapud trabaho? Odino aglabay na pamilya to ya magmaliw ya Tasi nen Jehova? Maabig sirin no mangigana kay panaon pian makapantongtong kayon dua. Agmet kaukolan ya masyadon pormal. Sarag mon itagar ya mankape odino mangan ed paway. Manistoryaan kayo pian naamtaan mo no anto ran subok so dadalanen na iyaaralan mo. No antam lay dadalanen to, tulongan mo pian makapanggaway pananguman. Pero linew mod sikato ya gawaen to itan lapud panangaro tod si Jehova, aliwan lapud nababaingan ed sika.

6. Panon mon napabiskeg so liknaan na iyaaralan mo pian nalikna to ya sarasarag ton iyaplika iray nanaaralan tod Biblia? (1 Corinto 16:13)

⁶ Panon mon napabiskeg so liknaan na iyaaralan mo pian nalikna to ya sarasarag ton iyaplika iray nanaaralan tod Biblia? Ipurek mo ya wadtan si Jehova ya ontulong ed sikato. (Basaen so 1 Corinto 16:13.) Sikatayo ran mangiyaaral na Biblia et singa teacher ed eskuelaan. Nen manaaral ka ni, seguro walay paboritom ya teacher. Ompan labalabay mo ’tan ya teacher ta maan-anos to kan imbangat tan impalikna tod sika ya walay tiwala tod abilidad mo. Ontan met so gawaen tayo ed saray iyaaralan tayo. Agtayo labat ibabangat ed sikara iray labay nen Jehova ya gawaen da. Magmaliw tayon mas epektibon managbangat no ipalikna tayo met ed sikara ya sarasarag day manguman diad tulong nen Jehova. Panon mo itan ya nagawaan?

TULONGAN MOY IYAARALAN MO PIAN MAS LALO TON NAAROY JEHOVA

7. Antoy ginawa nen Jesus pian mas lalon naar-aro na saray disipulo to si Jehova?

⁷ Amta nen Jesus ya no inaro tayoy Dios, mas mainomay tayon unoren iray ganggan To. Kanian nen wadiad dalin, dakdakel so imbangat tod saray disipulo to pian lalo dan naaroy Jehova tan ituring da bilang Ama. Singa bilang, inkompara toy Jehova ed sakey ya ama ya iiter toy pankaukolan na saray ananak to. (Mat. 7:​9-11) Seguro atenyeg so puso na saray disipulo nen Jesus ta say arum ed sikara et agda aliknay panangaro na mismon ama ra. Isipen pa met imay ilustrasyon nen Jesus nipaakar ed managdarak ya anak. Anggano dakdakel so ginawa ton kaugsan may anak, kinasian nin siansia nen ama to, tan maar-aro ton inawat nen nagbabawi tan pinmawil ed abung da. Seguro legan itan ya iistoryaen nen Jesus, aliklikna na saray disipulo to ya maar-aro tan makasin Ama si Jehova.—Luc. 15:​20-24.

8. Panon mon natulongan so iyaaralan mo pian lalo ton naar-aroy Jehova?

⁸ Singa si Jesus, natulongan mo met so iyaaralan mo na Biblia ya mas lalo ton naaroy Jehova no lanang mon ipaimano iray balibalin kualidad na Dios. Kada no manaaral kayo, ipanengneng mod sikato no antoy koneksion to may aaralen yo ed panangaro nen Jehova. No asabi yo la may leksion nipaakar ed dondon, idanet mo ya regalo iman nen Jehova ed sikato. (Roma 5:8; 1 Juan 4:10) No nalikna na iyaaralan mo ya sikatoy inar-aro nen Jehova bilang indibidual, mas lalon onapit so liknaan tod si Jehova tan lalo ton naar-aro.—Gal. 2:20.

9. Antoy amakiwas ed si Michael ya umaney bilay to?

⁹ Imanoen so eksperiensya nen Michael ya taga Indonesia. Binmaleg ed katuaan si Michael, pero agnampabautismo. Nen 18 to, nan-abroad tan nantrabaho bilang drayber na truck. Ag-abayag, angasawa tan awalaan iray anak, pero akaarawi ed sikara ta nan-abroad lamet. Legan ya walad abroad si Michael, nanaral na Biblia so asawa tan anak to, tan inmaligwas ira ed espiritual. Nen inatey si nanay to, sinmempet pian walay mangasikaso ed si tatay to, tan nanaral met la na Biblia si Michael. Nen wala la rad leksion 27 na libron Panliketan so Bilay ya Anggapoy Anggaan!, asabi puso nen Michael ed samay parten “Dakel Ni Naaralan Mo.” Akaakis ta naimadyin toy sakit ya alikna nen Jehova nen nanenengneng Ton maniirap so Anak to. Misatsalamat ya maong si Michael ed impangiter nen Jehova ed dondon, kanian apakiwas ya manguman tan manpabautismo.

TULONGAN MOY IYAARALAN MO PIAN NIYUNA TOY JEHOVA ED BILAY TO

10. Panon ya tinulongan nen Jesus iray disipulo to pian napakiwas iran iyunay Jehova ed bilay da? (Lucas 5:​5-11) (Nengnengen met so litrato.)

¹⁰ Wala ray disipulo nen Jesus ya anisian tampol ya sikato so Mesias, pero aliwan manunad bilay da so kimey ya panagpulong. Ontan so situasyon nen Pedro tan Andres. Medyo abayag met la ran disipulo, tan asali da met lay akila ed si Jesus ya nampulong. Pero sinmabi panaon ya inimbitaan ira nen Jesus ya lanang la ran mila ed sikato. (Mat. 4:​18, 19) Managsigay ira tan maksil so anap da. Tan nayarin kasosyo day Santiago tan Juan ed sayan negosyo ra. (Mar. 1:​16-20) Nen intagar nen Jesus si Pedro tan Andres, “tinaynan dan tampol iray iket da.” Pero seguradon implano da met ya maong no panon dan nataryaan nin siansia so pamilya da anggano mas dakel lay panaon da ed panagpulong. Akin et mabulbulos dan tinaynan so negosyo ra? Base ed salaysay nen Lucas, nanggawa na milagro si Jesus pian ipanengneng ed sikara ya sarasarag nen Jehova ya itaryay pankaukolan da tan na pamilya ra. Kanian binmiskeg so tiwala ra ya no iyuna day Jehova ed bilay da, agto ran balot paulyanan.—Basaen so Lucas 5:​5-11.

11. Antoy sarag mon gawaen pian napabiskeg moy pananisia na iyaaralan mo?

¹¹ Agtayo sarag so manggaway milagro ya singa ginawa nen Jesus. Pero anto kasi nagawaan tayo pian ombiskeg so pananisia na iyaaralan tayo? Istoryam iray eksperiensya no panon ya tutulongan nen Jehova iramay mangiyuunad sikato. Singa bilang, kasin walay nanonotan mon situasyon ya tinulongan ka nen Jehova nen onggagapo ka lan miaral ed Kingdom Hall? Ompan akitongtong kad boss mo, tan impaliwawam no akin ya agka la nayarin man-overtime no eskedyul na aral. Legan mon iistoryaen iratan ed samay iyaaralan mo, ibagam no panon ya binmiskeg so pananisiam nen anengneng mon mismo ya tinulongan ka nen Jehova nen nandesisyon ka ya sikato lay iyunam ed bilay mo.

12. (a) Akin et marakep no mangitagar tayoy nanduruman agagi no mangiyaaral tayoy Biblia? (b) Anto ni sarag mon usaren pian natulongan moy iyaaralan mo ya niyuna toy Jehova ed bilay to? Mangiter na alimbawa.

¹² Marakep met no naamtaan na iyaaralan mo no antoy ginawa na arum pian niyuna day Jehova ed bilay da. Kanian mangitagar kay nanduruman agagi no manaaral kayo. Ipaistoryam ed sikara no panon dan naamtaan so katuaan tan no anto ran pananguman so ginawa ra pian makapanlingkor ira ed si Jehova. Maabig met no bantayan tan pantongtongan yon maong iramay video ed “Dakel Ni Naaralan Mo” diad libron Panliketan so Bilay ya Anggapoy Anggaan!, tan anggan saramay video ed “Diskobrien” no nalikas mon dugaruga ed situasyon na samay iyaaralan mo. Singa bilang, no wala kayo lad “Dakel Ni Naaralan Mo” diad leksion 37, idanet mo iray prinsipyo ya walad samay video ya Iter nen Jehova Iray Pankaukolan Tayo.

TULONGAN MOY IYAARALAN MO PIAN NASARAG TO SO PANAGBALAW TAN ISUSUMPA

13. Antoy ginawa nen Jesus pian niparaan to iray disipulo to ed isusumpa?

¹³ Aminpigan pinasakbayan nen Jesus iray papatumbok to ya kontraen tan balawen ira na arum, anggan saray mismon kakanayon da. (Mat. 5:11; 10:​22, 36) Tan nen asingger lan manampot so ministeryo to, imbaga tod saray disipulo to ya nayarin pateyen ni ra ingen na saray mamubusol ed sikara. (Mat. 24:9; Juan 15:20; 16:2) Kanian binilin to ra ya kaukolan day magmaliw ya malikas no manpupulong ira. Singa bilang, binagaan to ra ya ag-ira midedebati no walay onsusumpad sikara. Importantin manalwar ira pian nituloy day pampupulong da.

14. Antoy gawaen mo pian niparaan mo lay iyaaralan mo ed isusumpa? (2 Timoteo 3:12)

¹⁴ Singa si Jesus, marakep no iparaan tayo la so iyaaralan tayo ed isusumpa. Ibaga tayo lad sikato no anto ray posiblin reaksion na saray katrabaho, kakaaro, tan saray kapamilya to lapud panaaral toy Biblia. (Basaen so 2 Timoteo 3:12.) Singa bilang, ompan elek-elekan na saray katrabaho to ta agto la gagawaen iray datin gagawaen to. Ompan balawen ni ingen na saray kapamilya to lapud balon papanisiaan to. No imparaan tayo la ray iyaaralan tayo ed isusumpa, agla ra nabigla tan amta da lay ibaga o gawaen da ed ontan iran situasyon.

15. Panon mon natulongan so iyaaralan mo no kokontraen na kapamilya to?

¹⁵ Panon to no amay iyaaralan mo et kokontraen na mismon pamilya to? Paseseg mo ya talosan to akin et onman so reaksion da. Ompan mapaga labat ira ed sikato ta say amta ra et aloko labat na sakey ya relihyon, odino ompan wala ray narerengelan dan palson impormasyon nipaakar ed Saray Tasi nen Jehova. Ibagam ed iyaaralan mo ya anggan si Jesus et kinontra met na saray kapamilya to, tan imbaga da ni ingen ya nadederal lay ulo to. (Mar. 3:21; Juan 7:5) Bilin moy iyaaralan mo ya no walay ansakit ya ibaga na kapamilya to odino na arum, itepel to la, tan panengnengan to ni ran siansia na kamaongan.

16. Panon tayon natulongan so iyaaralan tayo pian ninabang toy katuaan ed mataktikan paraan?

¹⁶ No bilang ta interesado met ed Biblia so kapamilya na iyaaralan mo, panonotan mo ya agto maminpinsan ya ibagad sikara iray nanaaralan to, ta no buntonan to ra na impormasyon, ompan onsawa ra tan agla ra ondengel no ontumbok. Kanian marakep no simpli tan antikey labat so panginabang tod saray nanaaralan to pian diad ontumbok et dengelen da lamet. (Col. 4:6) Sarag to met ya ipanengneng ed saray kapamilya to so website tayo ya jw.org. Dakel so nabasa da ditan nipaakar ed Saray Tasi nen Jehova, tan sikara so akauley no kapigan da itan basaen tan no panon karakel ya impormasyon so basaen da.

17. Panon mon nipasal ya onebat so iyaaralan mo no walay mantepet ed sikato nipaakar ed Saray Tasi nen Jehova? (Nengnengen met so litrato.)

¹⁷ Sarag mo met ya ipanengneng ed iyaaralan mo may serye ed jw.org ya “Mabetbet ya Itetepet.” Makatulong itan ed sikato pian makapanparaan na simplin ebat ed saray tepet na saray kakanayon o katrabaho to. (2 Tim. 2:​24, 25) Kada no nasumpal yoy leksion ed libron Panliketan so Bilay ya Anggapoy Anggaan!, rebyu yo may seksion ya “Ibabaga na Arum.” Ipraktis moy iyaaralan mo no panon so iyebat to diad sarili ton salita. No wala ni kaukolan ton paaligwasen ed ebat to, agka manaalangan ya ibangat. No ipasal mon mitongtong so iyaaralan mo, agla nababaingan ya ipaliwawa ed arum iray papanisiaan to.

18. Antoy gawaen mo pian napaseseg moy iyaaralan mo ya i-goal toy magmaliw ya agbautismadon manangipalapag? (Mateo 10:27)

¹⁸ Ingganggan nen Jesus iray disipulo to ya ipulong day maong a balita ed saray totoo. (Basaen so Mateo 10:27.) No mila lan manpulong so iyaaralan mo kaibay kongregasyon, mas naaralan toy mantiwala ed si Jehova. Anto sirin so gawaen mo pian natulongan mon i-goal to itan? No walay inyanunsio ed kongregasyon yo ya espisyal ya kampanya, singa say pangibunog na imbitasyon parad Memoryal o kombension, sambot mo itan pian ipaliwawa ed iyaaralan mo no anto ray sarag ton gawaen pian onkualipika bilang agbautismadon manangipalapag. Ipaliwawam met no akin ya mas mainomay so manpulong legan na sarayan kampanya. Paseseg mo met ya i-goal toy nawalaan na parte diad midweek ya aral pian naipasal ya mansalita tan mitongtong ed arum nipaakar ed papanisiaan to.

MANTIWALA KA YA GAWAEN LANLAMANG NA IYAARALAN MO SO PANLABAYAN NEN JEHOVA

19. Panon ya impanengneng nen Jesus ya walay tiwala to ed saray disipulo to, tan panon tayon naalig so alimbawa to?

¹⁹ Antis ya ompawil si Jesus ed tawen, imbaga tod saray disipulo to ya onsabi panaon et makapaniiba ira lamet. Diad saman et agda ni natatalosan ya say tutukoyen nen Jesus et say iyakar dad tawen. Pero baleg so tiwala nen Jesus ya manmatoor ira tan tuloytuloy dan gawaen so panlabayan nen Jehova. (Juan 14:​1-5, 8) Amta to ya natalosan da lanlamang iray ibabangat tod sikara, singa say pambilay dad tawen. (Juan 16:12) Singa si Jesus, mantiwala tayo ya onkiwas lanlamang so iyaaralan tayo tan gawaen toy panlabayan nen Jehova.

20. Panon ya impanengneng nen Sister Chifundo ya walay tiwala to ed samay iyaaralan to?

²⁰ Agtayo nanaekalan na ilalo ya gawaen lanlamang na iyaaralan tayo so panlabayan nen Jehova. Makaaral tayod alimbawa nen Sister Chifundo ya taga Malawi. Walay inyaralan ton kabataan ya Katoliko ya say ngaran to et Alinafe. Nen wala la rad leksion 14 na libron Panliketan so Bilay ya Anggapoy Anggaan!, tinepetan nen Chifundo si Alinafe no antoy nibaga to ed pandayew ed saray imahen. Asyodotan si Alinafe tan say kuan to, “Wala lad too ’tan!” Say amta nen Chifundo, sampot la man ya pam-Bible study da. Pero maong labat ta inanosan nen Chifundo ya inyaralan si Alinafe. Kalabas na pigaran bulan, nen wala la rad leksion 34, intepet nen Chifundo may walad punto 6 ya: “Anto la ray nitulong ed sika na panaaral mo na Biblia tan say impikabat mo ed tuan Dios ya si Jehova?” Oniay inistorya nen Chifundo ya ebat nen Alinafe: “Dakdakel so balibalin punto ya imbaga to. Say sakey et anengneng to kuno ya talagan uunoren na saray Tasi no antoy ibabaga na Biblia.” Ag-abayag, intunda la nen Alinafe so pandadayew tod saray imahen tan nampabautismo la.

21. Panon tayon napabiskeg so liknaan na iyaaralan tayo pian napakiwas ya manlingkor ed si Jehova?

²¹ On tua ya ibabaga na Biblia ya ‘si Jehova so mamapabaleg,’ pero walay nitulong tayo pian onaligwas ed espiritual so iyaaralan tayo. (1 Cor. 3:7) Agtayo labat ibabangat ed sikato iray labay nen Jehova ya gawaen to. Tulongan tayo met pian naar-aro toy Jehova. Pasesegen tayo ya iyuna toy Jehova ed bilay to ta atan so paraan pian nipanengneng to ya inar-aro toy Dios. Lanang tayo met ya ipanonot ed sikato ya mantiwala ed si Jehova no wala ray onkokontra ed sikato. Tan ipalikna tayod iyaaralan tayo ya walay tiwala tayon gawaen to lanlamang so panlabayan nen Jehova. No ontan so gawaen tayo, seguradon ombiskeg so liknaan to tan napakiwas ya manlingkor ed si Jehova.