Antoy Gawaen Ko Pian Minabang Ak ed Simbawa?

1. Antoy gawaen tayo pian maong so pansumpalan na saray desisyon tan plano tayo? (Proverbio 13:10; 15:22)

ANGGAPO tay too ya labay ton ompalpak so desisyon to. Say labay tayo et maong so pansumpalan na saray desisyon tan plano tayo. Ibabaga na Biblia ya ontan so nagawa no onkerew tayoy simbawa.—Basaen so Proverbio 13:10; 15:22.

2. Antoy insipan nen Jehova ya gawaen to parad sikatayo?

² Siopay sankaabigan ya kerewan tayoy simbawa? Siempre say Ama tayo, si Jehova. Akaparaan si Aman Jehova ya ontulong ed sikatayo. Diad tua, onia ni ingen so insipan to: “Bilinen ta ka legan ya akanengneng ak ed sika.” (Sal. 32:8) Labay ton ibaga, no mangiiter na simbawa si Jehova, aliwan basta binilin to tayo et duga la. Lapud iyaansakit to tayo, tutulongan to tayo met pian niyaplika tayoy bilin to.a

3. Antoy pantongtongan tayo ed sayan artikulo?

³ Diad sayan artikulo, amtaen tayo so ebat na Biblia ed apatiran tepet: (1) Anton kualidad so kaukolan kon ipanengneng pian talagan minabang ak ed nanaawat kon simbawa? (2) Siopay makapangiter ed siak na maong ya simbawa? (3) No onkekerew ak na simbawa, panon kon nipanengneng ya lukas so nonot tan pusok? (4) No mandedesisyon ak, akin et agak dapat mandedepende ed ibabaga tan gagawaen na arum?

ANTON KUALIDAD SO KAUKOLAN KON IPANENGNENG?

4. Anton kualidad so kaukolan tayon ipanengneng pian talagan minabang tayo ed simbawa?

⁴ Pian talagan minabang tayo ed simbawa, kaukolan ya mapaabeba tayo. Awaten tayo ya wala ray agtayo amta, tan bidbiren tayo ya kaukolan tayoy tulong na arum pian makapandesisyon tayoy duga, lalo la ed saray situasyon ya agtayo nin balot asali. No say sakey et aliwan mapaabeba, aga tulongan nen Jehova. Lapud aliwan maawat so puso to, aga onsepsep iray nababasa ton simbawa ed Biblia. (Miq. 6:8; 1 Ped. 5:5) Pero no say sakey et mapaabeba, anlemek so puso to, kanian mainomay ton awaten iray simbawa ed Biblia tan labalabay ton iyaplika iratan.

5. Anto ray maabig ya agawaan nen Arin David ya nayarin rason komon pian magmaliw ya mapaatagey?

⁵ Makaaral tayo ed alimbawa nen Arin David. Anggano dakdakel so maabig ya agawaan to, aga nagmaliw ya mapaatagey. Antis nin nagmaliw ya ari, kabkabat lay David lapud dunong ton mantogtog. Inala da ni ingen ya mantogtog parad ari. (1 Sam. 16:​18, 19) Tan diad tua, nen alanaan lay David bilang onsublay ya ari ed Israel, sikatoy pinabiskeg na masanton espiritu nen Jehova. (1 Sam. 16:​11-13) Pambiliban na saray Israelita ta dakel so apatey ton kalaban, kaiba lay higante ya Filisteo ya si Goliat. (1 Sam. 17:​37, 50; 18:7) Seguro no arum ya too man, ombaleg lay ulo da tan agla ra ondengel ed simbawa. Pero aliwan ontan si David.

6. Panon tayon amta ya madengel si David ed simbawa? (Nengnengen met so litrato.)

⁶ Nen nitrono lan ari si David, say lanang ton kaiba et saray kakaaro ton maong ya mansimbawa. (1 Awa. 27:​32-34) Agtayo la ’tan pankelawan ta talagan madengel si David ed simbawa anggan sanen aliwa nin ari. Ondengel anggano bii so mansimbawa ed sikato. Singa bilang, dinmengel ed simbawa nen Abigail ya asawa nen Nabal—sakey ya lakin malastog, anggapoy utang na linawa to, tan atagtagey so pakanengneng tod sarili to. Maong labat ta mapaabeban inawat nen David so simbawa nen Abigail kanian apaliisan toy makagawa na seryoson kasalanan.—1 Sam. 25:​2, 3, 21-25, 32-34.

7. Anto ray naaralan tayo ed si David? (Eclesiastes 4:13) (Nengnengen met so litrato.)

⁷ Dakel so naaralan tayo ed si David. Singa bilang, anggano maabilidad tayo tan walay pribilehyo odino autoridad tayo, agtayo komon iisipen ya amta tayo lan amin tan agtayo la kaukolay simbawa. Tan singa si David, komon ta mabulos tayon ondengel anggan siopa ni tay mansimbawa ed sikatayo. (Basaen so Eclesiastes 4:13.) On, no maawat kay simbawa tan bilin, napaliisan moy makagawa na seryoson lingo ya pakaproblemaan mo lanlamang tan nayarin nadamay met so arum.

SIOPAY MAKAPANGITER ED SIAK NA MAONG YA SIMBAWA?

8. Akin et duga labat ya si Jonatan so kinerewan nen David na simbawa?

⁸ Wala ni sakey ya naaralan tayo ed si David. Say kinerewan toy simbawa et saramay maong so relasyon dad si Jehova tan natatalosan da so situasyon ya dadalanen to. Singa bilang, nen iisipen nen David no kasin makapikareenan ni ed si Arin Saul, kinmerew na simbawa ed si Jonatan, ya anak nen Saul. Akin et duga labat ya si Jonatan so kinerewan toy simbawa? On ta maong so relasyon nen Jonatan ed si Jehova tan kabkabisado toy ugali nen ama to. (1 Sam. 20:​9-13) Antoy naaralan tayod saya?

9. Siopa dapat so kerewan tayoy simbawa? Mangiter na alimbawa. (Proverbio 13:20)

⁹ Singa si David, marakep no say kerewan moy simbawa et amay maong so relasyon tod si Jehova tan natatalosan to odino asali to la so situasyon ya dadalanen mo.b (Basaen so Proverbio 13:20.) Singa bilang, isipen pa so sakey ya brother ya plano to lay mangasawa. Siopay sankaabigan ya kerewan toy simbawa? No say tepetan to et kaaro to ya single ni, ayos met labat, basta say simbawa na kaaro to et base ed Biblia. Pero mas maabig no say asinggeran to et amay maespiritual tan abayag lan sanasawa ya ka-close to. Lapud maespiritual ira, seguradon nanlapud Biblia so simbawa ra. Tan aliwan satan labat. Dakel so naibaga rad sikato ya tips ya akatulong ed sikara pian magmaliw ya maliket so ulopan da.

10. Antoy onsublay ya pantongtongan tayo?

¹⁰ Apantongtongan tayo la no anton kualidad so kaukolan tayon ipanengneng pian talagan minabang tayo ed simbawa tan no siopa ray makapangiter ed sikatayo na maong ya simbawa. Say onsublay ya pantongtongan tayo et no panon tayon nipanengneng ya lukas so nonot tan puso tayo no onkekerew tayoy simbawa. Insan tayo met pantongtongan no akin ya agtayo dapat papaidesisyonan ed arum.

PANON KON NIPANENGNENG YA LUKAS SO NONOT TAN PUSOK?

11-12. (a) Antoy agtayo dapat gagawaen? (b) Antoy ginawa nen Arin Rehoboam nen walay kaukolan ton desisyonan?

¹¹ No maminsan, walay onkerew ed sikatayo na advice, pero diad tua et wala lay abuon desisyon ed isip to. Kunwari et mantetepet, pero manaanap labat manaya na arum ya kompormi ed desisyon to. Say ontan ya too et aliwan lukas so nonot tan puso to. Komon ta agtayo ontan. Agtayo labay ya nagawad sikatayo imay agawad si Arin Rehoboam.

¹² Nen inatey si Arin Solomon, si Rehoboam so sinmublay ya ari ed Israel. Mainaway bilay na saray totoo ed Israel diad saman ya panaon. Pero inmasingger irad si Rehoboam tan imbaga ra ya abelatan ira ed karakel na impagawa nen Solomon ed sikara. Akikasi rad si Rehoboam ya palemewen to komoy kimey da. Imbaga to ya pannonotan to ni. Maong may ginawa to nen unaan ta kinmonsulta ed saray mamasiken ya nanlingkor ed si Solomon. (1 Ara. 12:2-7) Pero agto lanlamang dinengel so simbawa rad sikato. Akin kasi? Seguro antis ya kinmonsulta ed sikara, akapandesisyon la tan iilaloan to ya say ibaga ra et pareho ed samay iisipen to. Pero dumay insimbawa ra ed samay iilaloan to kanian kinmonsulta ed saray kakaaro to ya kaedaran to, tan say imbaga ra et no anto may labay ton narengel. Tan aman so inunor to! (1 Ara. 12:​8-14) Antoy resulta? Nanrebelde iray sakop to, naapag so bansan Israel, tan aga tinmunday gulo legan na uley nen Rehoboam.—1 Ara. 12:​16-19.

13. Panon tayon nibaga no kasin lukas so nonot tan puso tayo?

¹³ Antoy naaralan tayo ed samay agawad si Rehoboam? No onkerew tayoy simbawa, dapat anggapo ni abuon desisyon ed isip tayo pian lukas ni nonot tan puso tayo ed antokaman ya narengel tayon simbawa. Tepetan moy sarilim, ‘Panon to no kinmerew ak na advice pero say advice dad siak et aliwan samay labay kon narengel? Kasin ibabaliwalak itan ya tampol?’ No ‘on’ so ebat mo, labay ton ibaga, ompan sarado lay nonot tan pusom.

14. Antoy nepeg tayon tandaan no makaawat tayoy simbawa? Mangiter na alimbawa. (Nengnengen met so litrato.)

¹⁴ Imanoen iyan alimbawa: Walay sakey ya brother ya naopresian na trabaho ya baleg so sueldo. Antis ton awaten itan, kinmerew na simbawa ed sakey ya elder. Imbaga to may brother ya no awaten to may trabaho, wala ray panaon ya makaarawi na pigaran simba ed pamilya to. Kanian impanonot ed sikato na elder imay prinsipyo ed Biblia ya say manunan responsabilidad to et say pangitarya ed espiritual ya pankaukolan na pamilya to. (Efe. 6:4; 1 Tim. 5:8) Pero ag-agustoan na brother may imbaga na elder. Kanian nantepet ed arum ya agagi, ya anggad walay angibagad sikato ya ayos labat ya awaten to man ya trabaho. Parad sika, talaga kasin onkekerew na advice imay brother? Odino akapandesisyon la antis ya kinmerew na simbawa tan manaanap labat na agin kompormi ed desisyon to? Tandaan tayo ya agnapanmatalkan so puso tayo. (Jer. 17:9) No maminsan, amay simbawa ya agtayo labalabay ya narengel, aman may simbawa ya kakkaukolan tayo.

AKIN ET AGAK DAPAT PAPAIDESISYONAN ED ARUM?

15. Antoy agtayo dapat gagawaen, tan akin?

¹⁵ Responsabilidad tayon mismo so mandesisyon parad sarili tayo. (Gal. 6:​4, 5) Singa apantongtongan tayo la, mas makapanggawa tayoy dugan desisyon no onkonsulta tayo ni ed Salita na Dios tan onkerew tayoy advice ed maespiritual ya agagi. Pero agtayo dapat papaidesisyonan ed arum. Agtayo ra tetepetan ya, “No sikay walad situasyon ko, antoy gawaen mo ey?” Balet panon to no agtayo met ira tepetan na ontan, pero alig-alig tayod desisyon da tan agtayo la nannonot ya maong antis tayon nandesisyon? No ontan so gawaen mo, singa ka met la papaidesisyonan ed arum.

16. Antoy linmesan isyu ed kongregasyon na Corinto, tan antoy impaseseg nen Pablo ya gawaen na kada sakey ed sikara? (1 Corinto 8:7; 10:​25, 26)

¹⁶ Imanoen so linmesan isyu ed kongregasyon na Corinto nen inmunan siglo. Nandurumay opinyon na agagi nipaakar ed pangan na karne ya inyapay ed saray idolo. Kanian oniay impanonot ed sikara nen Pablo: “Amta tayon anggapoy kakanaan na sakey ya idolo diad mundo tan saksakey labat so Dios.” (1 Cor. 8:4) Lapud satan ya imbaga nen Pablo, nandesisyon so arum ya agagi ed satan ya kongregasyon ya sarag day mangan na karne ya nasaliw ed tindaan anggano inyapay itan ed idolo. Say arum balet et nandesisyon ya ag-ira mangan na ontan ya karne ta agnaawat na konsiensia ra. (Basaen so 1 Corinto 8:7; 10:25, 26.) Personal itan ya desisyon. Agbinagaan nen Pablo iray agagi ed Corinto ya idesisyonan day arum, tan agto met ira binagaan ya aligen da labat so desisyon na arum. Akin ey? On ta amta nen Pablo ya “kada sakey ed sikatayo et walaan na eebatan ed Dios.”—Roma 14:​10-12.

17. Antoy epekto ed sikatayo no alig-alig tayo labat ed desisyon na arum? Mangiter na alimbawa. (Nengnengen met so litrato.)

¹⁷ Anto ran situasyon natan so mipara ed samay agawa ed kongregasyon na Corinto nensaman? Say sakey ya situasyon et no mandedesisyon tayo nipaakar ed blood fraction. Personal ya desisyon na kada Kristiano no kasin awaten to odino andi iray blood fraction.c Ompan agtayo masyadon natatalosan iya, pero kaukolan tayon aralen tan talosan ta sakey iya ed saray nepeg tayon desisyonan ya mismo. (Roma 14:4) No alig-alig tayo labat ed gagawaen na arum, onepel so abilidad tayon mannonot tan agtayo ontatken ed espiritual. Pero no sikatayon mismo so mandesisyon tan ibabase tayo ray desisyon tayo ed saray prinsipyo na Biblia, ontarem so panagnonot tan pakatebek tayo. (Heb. 5:14) Kapigan tayo sirin onkerew na advice? No kayari tayon nan-research et agtayo ni masyadon natatalosan no panon tayon niyaplika iray prinsipyo ed Biblia, insan diman tayo labat onkerew na advice ed saray maespiritual ya Kristiano.

ITULTULOY MOY ONKEREW NA SIMBAWA

18. Panon to tayon tutulongan nen Jehova pian makapandesisyon tayoy duga?

¹⁸ On, inikdan to tayo nen Jehova na kalayaan ya mandesisyon parad sarili tayo. Pakapatnagan itan ya baleg so tiwala to ed sikatayo. Maar-aron Ama si Jehova kanian labalabay to tayon tulongan pian makapandesisyon tayoy duga. Inter tod sikatayoy Salita to, say Biblia. Tan inikdan to tayo na saray maespiritual ya kakaaro ya ontulong ed sikatayo pian natalosan tan niyaplika tayo iray prinsipyo ed Biblia. (Pro. 3:​21-23) Panon tayon nipanengneng ed si Jehova ya misatsalamat tayod tulong to?

19. Antoy gawaen tayo pian lanang tayon napaliket si Jehova?

¹⁹ No nanenengneng na atateng ya ontatatken lay nonot na anak da tan inar-aro toy Jehova, malikeliket ira. Ontan met si Aman Jehova. Seguradon naliliketan no gagawaen tayoy anggaay nayarian tayo ya ontatken ed espiritual, no onkekerew tayoy simbawa, tan no seseguroen tayo ya parad kirayewan to iray desisyon tayo.