Panisiaan Mo ya Inar-aro Ka nen Jehova

1. Akin et indedikam so sarilim ed si Jehova? (Nengnengen met so litrato.)

NANONOTAN mo ni nen indedikam so sarilim ed si Jehova? Ginawam itan ta sikatoy akabkabat mo tan naar-arom ya maong. Insipan mod sikato ya sikato la so iyunam ed bilay mo tan tuloytuloy mon aroen dian interon pusom, kamarerwam, nonot mo, tan biskeg mo. (Mar. 12:30) Tan manlapu lad saman, inmaralem lan inmaralem so panangarom ed sikato. Kanian no walay mantepet ed sika ya “Segurado kan inarom si Jehova?” seguro say iyebat mon tampol, “Ay on! Inar-arok ya maong!”

2-3. Antoy labay nen Jehova ya panisiaan tayo, tan antoy pantongtongan tayo ed sayan artikulo? (Jeremias 31:3)

² Panon to balet no say intepet dad sika et, “Segurado ka ya inaro ka nen Jehova?” Antoy iyebat mo ey? Kasin manalangan kan onebat ta say pakaliknam et agka karapat-dapat ya aroen nen Jehova? Ontan so alikna na sakey ya sister ya aliwliway impanugaw to. Oniay imbaga to: “Amtak ed sarilik ya inarok si Jehova. Segurado ak ed satan. Pero say lanang kon iisipen, ‘Si Jehova ey, inaro to ak met kasi?’” Kasin naiisip mo met ’tan no maminsan? Anton talagay nalilikna nen Jehova parad sika?

³ Labay nen Jehova ya panisiaan mo ya inar-aro to ka. (Basaen so Jeremias 31:3.) Diad tua, sikato so nanggaway paraan pian onasingger so liknaan mod sikato. Nen indedikam so sarilim ed sikato tan nampabautismo ka, walay inter tod sika ya espisyal ya regalo—say matoor ya panangaro to. Atan may klase na panangaro ya agan balot manguman tan onkupas, tan agan balot onikban anggan antoy nagawa. Lapud inar-aro to tayo ran lingkor to, ipapasen to tayo bilang “pinabpablin kayarian” to. (Mal. 3:​17, paimanod leksab) Labay ton ibaga sirin, espisyal ka ed si Aman Jehova. Say sakey ed saray talagan kombinsido ed panangaro nen Jehova et si apostol Pablo. Oniay insulat to: “Kombinsido ak ya anggan say patey odino say bilay odino saray anghel odino saray gobierno odino saray bengatlan wala natan odino saray bengatlan onsabi odino saray pakayari odino say kaatagey odino say kaaralem odino anggan dinan nin pinalsa et agbalot makapangisian ed sikatayo ed panangaro na Dios.” (Roma 8:​38, 39) Labay nen Jehova ya ontan met so naliknam—amay agmo pandudaan ya inar-aro to ka. Pantongtongan tayod sayan artikulo no akin ya importantin kombinsido tayo ya inar-aro to tayo nen Jehova, tan no anto ray nepeg tayon gawaen pian agtayo pandudaan so panangaro to.

AKIN YA IMPORTANTIN PANISIAAN TAYO YA INAR-ARO TO TAYO NEN JEHOVA?

4. Antoy sakey ed saray agnaliklikas ya pakana nen Satanas, tan antoy sekreto pian agto tayo nabiktima?

⁴ No manisia tayo ya inar-aro to tayo nen Jehova, ag-itayo nabiktima na “masilib a pakana” nen Satanas. (Efe. 6:11) Gawaen nen Satanas so amin pian napatunda to tayon manlingkor ed si Jehova. Say sakey ed saray agnaliklikas ya pakana to et amay ikakayat ton katilaan ya ag-itayo inaro nen Jehova. Agtayon balot lilingwanan ya oportunista si Satanas. No naimano to ya nadidismaya tayo lapud saray aliwliwan agawad bilay tayo, nanairapan tayod dadalanen tayon subok, odino mapagpaga tayod arapen, agto itan palampasen! Samboten toy onataki! (Pro. 24:10) Singa leon si Satanas ya lanang ya manaanap na buagen to. Kanian no nalikas to ya onkakapuy so liknaan tayo, diman to tayo lalon detdetan ya anggad onsuko tayo la. Pero no kombinsido tayo ya inar-aro itayo nen Jehova, sarasarag tayon “sumpaen” si Satanas tan ag-itayo nabiktima na saray pakana to.—1 Ped. 5:​8, 9; Sant. 4:7.

5. Akin et importantin nalikna tayo ya inar-aro tan papablien to tayo nen Jehova?

⁵ No manisia tayo ya inaro-aro to tayo nen Jehova, lalo tayon onapit ed sikato. Akin et ontay nibaga tayo? On ta say too et ginawa nen Jehova ya kaukolan toy mangaro tan naaro. Kanian di ba, no walay mangipanengneng na panangaro ed sika, labalabay mo met ya balesen so panangaro to? Ontan met ed relasyon tayod si Jehova. No diman tayo nalilikna ya inar-aro tan papablien to tayo, diman tayo met mas napakiwas ya balesen so panangaro to. (1 Juan 4:19) Say kuan na Biblia: “Onapit kayo ed Dios, tan sikatoy onapit ed sikayo.” (Sant. 4:8) Kanian no diman mas ombibiskeg so panangaro tayod si Jehova, diman met mas ombibiskeg so panangaro to ed sikatayo. Pero say tepet, antoy gawaen tayo pian magmaliw tayon mas kombinsido ya inar-aro to tayo nen Jehova?

ANTOY MAKATULONG PIAN PANISIAAN TAYO YA INAR-ARO TO TAYO NEN JEHOVA?

6. Antoy nepeg tayon ipikasi no nanairapan tayon panisiaan ya inaro to tayo nen Jehova?

⁶ Nepeg ya espisipiko iray pikakasim tan agka onsasawan manpikasi. (Luc. 18:1; Roma 12:12) Diad kada agew, ipikasim ed si Jehova ya komon ta say pakanengneng mod sarilim et pareho ed pakanengneng tod sika. Anggano maminpigam itan ya ipikasi diad loob na sanagew. No bilang ta say ididikta na pusom et agka karapat-dapat ya aroen, tandaan mo ya mas baleg si Jehova nen say puso tayo. (1 Juan 3:​19, 20) Kabkabat to ka kanian nanenengneng to ray balibalin ugalim ya ompan agmo nanenengneng ed sarilim. (1 Sam. 16:7; 2 Awa. 6:30) Agka sirin nababaingan ya ‘ibalikas ed sikato so amin ya walad pusom.’ (Sal. 62:8) Ipikasim ya tulongan to ka pian panisiaan mo ya inar-aro to ka. Insan kayarim ya manpikasi, marakep no gawam irayay ontutumbok ya suhestion.

7-8. Anto ran teksto ed Salmo so mangipapaseguro ya inar-aro to tayo nen Jehova?

⁷ Mantiwala ka ya walay sakey ya salita nen Jehova. Inggiya nen Jehova iray nansulat ed Biblia. Kanian no walay nabasa tayod Biblia nipaakar ed si Jehova, makaseguro tayon tua itan. Singa bilang, oniay insulat nen David: “Si Jehova et asingger ed samay asugatay puso to; ililiktar to iramay nadidismaya.” (Sal. 34:​18, paimanod leksab) No nadidismaya kan maong ed sarilim, ompan say pakaliknam et bukbukor mo. Pero insipan nen Jehova ya diad ontan iran situasyon, sikato lan mismoy onasingger ed abay mo ta amta to ya kakkaukolan moy tulong. Nia ni sakey ya insulat nen David: “Tipon mo pa ray luak ed katat a pananginan mo.” (Sal. 56:8) Antoy labay ton ibaga ’tan? Nensaman no manbiahe iray totoo ed desierto, manbabalon iray danum diad katat ya pananginan. Mabmabli ed sikara so kada terter to ’tan ya danum! Ontan so pakanengneng nen Jehova ed saray luam. No onaakis ka lapud ermen tan sakit na linawa, singa titiponen nen Jehova iray luam diad katat ya pananginan to. Labay ton ibaga sirin, amta to so irap ya dadalanen mo tan nasasakitan met lapud iyaansakit to ka. Diad Salmo 139:​3, onia ni insulat nen David nipaakar ed si Jehova: “Babantayan mo ak . . . Kabisadom so amin a dalan ko.” On, amta nen Jehova so amin ya gagawaen mo, pero say pampopokusan to et saray maong ya nagagawaan mo. (Heb. 6:10) Akin et atan so iimanoen to? On ta aapresyaen to so pansasagpot mo ya paliketen so puso to.a

⁸ No dalepdepen mo irayan teksto ed Biblia, antoy nanengneng mon mensahe nen Jehova ed sika? Singa to ibabaga ya: “Labay kon naamtaan mo ya inar-aro ta kan maong tan mabmabli kad siak.” Pero singa apantongtongan tayo nen niman, papapawayen nen Satanas ya ag-itayo inaro nen Jehova. Kanian no wala ray panaon ya pandududaan moy panangaro nen Jehova ed sika, tunda kan magano tan tepetan moy sarilim: ‘Siopay panisiaan ko ey—say “ama na tila” o say “Dios na katuaan”?’—Juan 8:44; Sal. 31:5.

9. Antoy insipan nen Jehova ya gawaen to parad saramay mangaaro ed sikato? (Exodo 20:​5, 6)

⁹ Isip mo no antoy reaksion nen Jehova no walay mangipanengneng na panangaro ed sikato. Imanoen pa may imbaga nen Jehova ed si Moises tan ed saray Israelita. (Basaen so Exodo 20:​5, 6.) Insipan nen Jehova ya ipanengneng toy matoor ya panangaro ed saramay mangaaro ed sikato. Labay ton ibaga, no panengnengan tayoy panangaro si Jehova, aga ompayag ya agto tayo met panengnengan na panangaro. (Neh. 1:5) Kanian no say pakaliknam et agka inaro nen Jehova, tunda kan magano tan tepetan moy sarilim, ‘Kasin inarok si Jehova?’ No say ebat mo et “on” tan gagawaen moy anggaay nayarian mo ya paliketen so puso to, makaseguro ka sirin ya inar-aro to ka met. (Dan. 9:4; 1 Cor. 8:3) On, no sikan mismo et agmo pandududaan ya inarom si Jehova, di agmo met sirin pandududaan ya inaro to ka. Matoor ya Dios si Jehova, kanian balesen ton balesen na panangaro so ipapanengneng mon panangaro ed sikato.

10-11. Antoy labay nen Jehova ya pangipasen mo ed dondon? (Galacia 2:20)

¹⁰ Dalepdep mo so dondon. Say dondon bagat nen Jesu-Kristo so sankarakepan ya regalo ya inter nen Jehova ed saray totoo. Imbaki toy Anak to pian ompatey parad sikatayo. (Juan 3:16) Pero, duga kasi no isipen mo ya inatey si Jesus parad sika? On! Imanoen pay eksperiensya nen apostol Pablo. Dakel so agawaan ton kasalanan antis ya nagmaliw ya Kristiano, tan wala ni ran siansiay kakapuyan ya lalabanan to anggano Kristiano la. (Roma 7:​24, 25; 1 Tim. 1:​12-14) Pero anggano makasalanan, impasen to ya say dondon et personal ya regalo nen Jehova ed sikato. (Basaen so Galacia 2:20.) Atan ya imbaga nen Pablo et impaipila nen Jehova diad Biblia pian pakaaralan tayo. (Roma 15:4) Impaisulat itan nen Jehova ta labay ton ipasen mo met ya say dondon et personal ya regalo to ed sika. No lanang mon isipen ya inatey si Jesus parad sika, diman mo lalon natalosan ya inar-aro ka nen Jehova.

¹¹ Misatsalamat tayod si Jehova ta imbaki toy Jesus diad dalin pian ompatey parad sikatayo. Pero say sakey nin rason no akin ya linmad dalin si Jesus et pian ibangat ed saray totoo so katuaan nipaakar ed si Jehova. (Juan 18:37) Labay nen Jesus ya natalosan tayo ya maar-aron Ama si Jehova.

IMBANGAT NEN JESUS YA MAR-ARON AMA SI JEHOVA

12. Akin et makapantiwala tayo ya tua so amin ya imbaga nen Jesus nipaakar ed si Jehova?

¹² Nen wadiad dalin si Jesus, bungay sangi to si Aman Jehova ta labay ton nakabkabat na totoo so Ama to. (Luc. 10:22) Akin et makapantiwala tayo ya tua so amin ya imbaga nen Jesus nipaakar ed si Jehova? On ta antis ya linma diad dalin, abaybayag to lan akaiba so Ama to diad tawen. (Col. 1:15) Aliklikna toy panangaro nen Ama to, tan anengneng to met ya mismo so agaylan panangaro nen Jehova ed saray matoor ya anghel tan ed amin ya matoor ya ananak To diad dalin. Labalabay to tayon tulongan nen Jesus pian natalosan tayo ya inar-aro itayo na Dios. Panon ton ginawa itan?

13. Antoy labay nen Jesus ya turing tayo ed si Jehova?

¹³ Maap-apit so liknaan nen Jesus ed si Jehova tan labay to ya ontan tayo met. Diad Ebanghelyo, masulok ya 160 ya beses ya tinukoy nen Jesus si Jehova ya “Ama.” Tan no katongtong to ray papatumbok to, maslak et tutukoyen toy Jehova ya “Ama yo” odino “Ama yod tawen.” (Mat. 6:​8, 26) Antis ya linmad dalin si Jesus, nanduruman titulo so uusaren na saray lingkor nen Jehova no mitotongtong ira ed Sikato odino no dedeskribien da, singa say “Makapanyarin-amin,” “Sankatagyan,” tan “Makapadinayew a Manamalsa.” Pero nen wadiad dalin si Jesus, say mabetbet ya inusar to et say simpli tan kabkabat ya termino ya “Ama” pian ipanengneng ya maap-apit so liknaan nen Jehova ed saray lingkor To. On, labay nen Jesus ya Ama met so turing tayo ed si Jehova—sakey ya Ama ya inar-aro to ray ananak to. Pantongtongan tayo so duaran pankanawnawa ya inusar nen Jesus so terminon “Ama.”

14. Antoy imbaga nen Jesus ya pakanengnengan ya mabmabli ed si Aman Jehova so kada sakey ed sikatayo? (Mateo 10:​29-31) (Nengnengen met so litrato.)

¹⁴ Say unonan pantongtongan tayo et amay imbaga nen Jesus ya nabasad Mateo 10:​29-31. (Basaen.) Saray anuyaw et angkekelag ya siwit. Siempre, anggapoy abilidad na saray siwit ya dayewen o aroen si Jehova. Pero imbaga nen Jesus ya amta na Ama tayo no walay anggan sakey ya anuyaw ya napelag ed dalin. No iimanoen tan papablien nen Jehova so sakey ya siwit, di mas laloy panamabli to ed kada lingkor to ya mangaaro ed sikato. Anto met so naaralan tayod samay imbaga nen Jesus ya “anggan saray buek yo et abilang ya amin”? No anggan sayan melmelag ya detalye et amta nen Jehova, labay ton ibaga sirin, interesadon maong ed sikatayo. On, labay nen Jesus ya natalosan tayo ya mabmabli ed si Aman Jehova so kada sakey ed sikatayo.

15. Antoy naaralan tayo ed samay imbaga nen Jesus diad Juan 6:44 nipaakar ed si Aman Jehova?

¹⁵ Say sakey nin pakabasaan ya inusar nen Jesus so terminon “Ama” et amay walad Juan 6:44. (Basaen.) Si Jehova ya mismo so angiyasingger ed sika ed katuaan. Kalkalna ton impaamta ed sika iray katuaan ya anggad sikatoy naar-arom. Akin kasi et ginawa itan nen Jehova? On ta walay anengneng ton kamaongan ed pusom. (Gawa 13:48) Nen imbaga nen Jesus imay nabasa ed Juan 6:​44, nayarin say sankanonot to et amay walad Jeremias 31:3 ya pinagkateman teksto na sayan artikulo. Diad satan ya teksto, oniay imbaga nen Jehova ed saray lingkor to: “Inyasingger ta kad siak tekep na matoor a panangaro [odino, intultuloy kon impanengneng ed sika so matoor a panangaro].” (Jer. 31:3; paimanod leksab; ikompara so Oseas 11:4.) Antoy ipapaseguro na satan? Matoor so panangaro nen Jehova kanian tuloytuloy ton iimanoen iray balibalin ugalim tan saray maong ya nagagawaan mo, anggano no maminsan et agmo iratan nanenengneng ed sarilim.

16. (a) Antoy labay ya ibaga nen Jesus nen imbangat ton ituring tayon Ama si Jehova, tan akin et panisiaan tayo itan ya imbaga to? (b) Antoy gawaen mo pian napabiskeg moy pananisiam ya Amam si Jehova tan sikato so sankamaongan ya Ama? (Nengnengen so kahon ya “Say Ama ya Kailangan Tayon Amin.”)

¹⁶ Nen imbangat nen Jesus ya ituring tayo si Jehova bilang Ama tayo, singa to ibabaga ya, “Aliwan siak labat so akan-Ama ed si Jehova, Amam met. Siak lay mangibabaga ya inar-aro to ka tan papablien to kan maong.” Kanian no wala ray panaon ya pakaliknam et agka inaro nen Jehova, tunda kan magano tan tepetan moy sarilim: ‘No si Jesus lan mismoy angibaga ya inaro ak nen Jehova, akin et agko panisiaan ey anta kabkabat ton maong so Ama to tan aliwan matila si Jesus?’—1 Ped. 2:22.

ITULTULOY MON PABISKEGEN SO PANANISIAM YA INAR-ARO KA NEN JEHOVA

17. Akin et kaukolan ya tuloytuloy tayon pabiskegen so pananisia tayo ya inar-aro to tayo nen Jehova?

¹⁷ Tuloytuloy tayon pabiskegen so pananisia tayo ya inar-aro to tayo nen Jehova. Singa naaralan tayo nen niman, gawaen nen Satanas so amin pian onkapuy tayod espiritual, ya anggad ontunda tayo lan manlingkor ed si Jehova. Lanang ya manaanap na pankanawnawa pian napanisia to tayon ag-itayo inaro nen Jehova. Agka sirin ompapayag ya nabiktima to ka!—Job 27:5.

18. Antoy gawaen mo pian tuloytuloy ya ombiskeg so pananisiam ya inar-aro ka nen Jehova?

¹⁸ Pian tuloytuloy ya ombiskeg so pananisiam ya inar-aro ka nen Jehova, lanang mon ipikasi ed sikato ya nanengneng mo komon iray kamaongan ya nanenengneng tod sika. Isip mo iray teksto ed Biblia ya mangipapaseguron inar-aro to kan maong tan mabmabli ka ed sikato. Dalepdep moy reaksion nen Jehova no panengnengan moy panangaro. No aroen mo, imposible ya agto ka met aroen. Tandaan mo ya say dondon et personal ya regalo to ed sika. Tan panisiaan mo may imbaga nen Jesus ya Amam si Jehova. No gawaen mo irayan amin, diad ontumbok ya walay mantepet ed sika ya, “Segurado ka ya inaro ka nen Jehova?” agka la manalangan ya onebat. Ibagam ya, “Ay on! Inar-aro ak nen Jehova! Tan labay ko met ya ipanengneng ed sikato kada agew ya talagan inar-arok!”