TEPET NA SARAY KABATAAN
Pidi-date—Part 1: Ready Ak La Kasin Mi-Date?
Diad sayan artikulo
Anto so pidi-date?
Parad arum, normal labat ya mi-date so anggan siopa. Pero antoy labay ya ibaga na salitan mi-date diad sayan artikulo? Aya may panaon ya mas kabaten na saninaro so sakey tan sakey kanian manistoryaan tan walay komunikasyon da. Mandi-date ira pian naamtaan da no kasin magmaliw iran maong ya asawa ed sakey tan sakey. Kanian aliwan gakgalaw so mi-date, ya gawaen mo labat itan pian walay mangipalikna ya importante ka.
No mi-date ka, kalabas na panaon et kailangan moy mandesisyon no kasin pakasalan mo odino i-break mo. Kanian no ready ka lan mi-date, ready ka met lan awaten no antoy magmaliw ya resulta.
Importantin tandaan: No parad sika et ready ka lan mi-date, dapat ready ka met lan mangasawa odino miasawa.
No midi-date ka la anta anggapo ni planom ya miasawa, singa ka nanaplay ed trabaho anta agmo manaya labay so mantrabaho
Kasin ready ka lan mi-date?
No mi-date ka, baleg so posibilidad ya mangasawa odino miasawa ka. Maabig sirin no isipen mon maong no anto ran ugali so mamaelet odino mamakapuy na relasyon yo na samay magmaliw ya asawam. Singa bilang:
Panagtrato ed pamilya. No antoy panagtratom ed saray atateng tan agagim, lalo la no nai-stress ka, malamang ya ontan met so magmaliw ya pantratom ed magmaliw ya asawam.
Prinsipyo ed Biblia: “Ekal yod inkasikayo so amin a klase na paneem-em na sakit na linawa, pasnok, sanok, paneyag, tan makapasakit ya salita, pati say amin a bengatlan makaderal.”—Efeso 4:31.
Tepetan moy sarilim: ‘Kasin nalilikna na saray atateng tan agagik ya rerespetoen ko ra? No walay agmi napankasundoan, kasin kalmado ak nin siansia odino ompetang ya tampol so ulok?’
No ebat-ebatan mo ray atateng mo, ompan ontan met so ugalim no wala lay asawam
Panagpalugar. No kasal ka la, aliwan puro sarilim labat so nonoten mo. Dapat mo met ya isipen no antoy labay na asawam tan manpalugar ka.
Prinsipyo ed Biblia: “Mantultuloy komon ya anapen na kada sakey so pankaabigan na arum a too, aliwan say dilin pankaabigan to.”—1 Corinto 10:24.
Tepetan moy sarilim: ‘Kasin ipapasoot kon lanang so labay ko? Kasin kabkabat ak ya mapalugar? Anto la ray ginawak pian ipanengneng ya talagan imamalasakit koy arum?’
Kapaabebaan. Say mapaabeban asawa et agnatatakot ya aminen so lingo to tan agnababaingan ya man-sorry.
Prinsipyo ed Biblia: “Amin tayo et naynay a nalilingo.”—Santiago 3:2.
Tepetan moy sarilim: ‘Kasin agak manaalangan ya aminen iray lingok, odino mandadahilan ak ni? No bagaan ak na arum, kasin ombarong ak ya tampol?’
Panag-badyet. Say maslak ya pankokolkolan na sanasawa et kuarta. Kanian pian naiwasan yo itan ya problema, dapat marunong kayon manbemben na kuarta.
Prinsipyo ed Biblia: “Siopad sikayo so malabay a mangipaalagey na tori ya agni onyurong ya unona tan kuentaen toy nagastos pian naseguro to no kasin walay magenap a panumpal tod satan?”—Lucas 14:28.
Tepetan moy sarilim: ‘Kasin napigilan koy sarilik ya manggastos lan manggastos, odino dakdakel so utang ko? Anto ray patunay ya sarag kon i-badyet so kuartak?’
Espiritualidad. No sakey kan Tasi nen Jehova, dapat walay eskedyul mo parad regular ya panag-aral na Biblia tan lanang kan mimiaral.
Prinsipyo ed Biblia: “Maliket iray manonot ed espiritual a pankaukolan da.”—Mateo 5:3.
Tepetan moy sarilim: ‘Talaga kasin mani-effort ak pian ombiskeg so relasyon kod si Jehova? Kasin iyuunak iray espiritual ya rotinak, odino ayos labat ya napalampas ko iratan?’
Importantin tandaan: Pian karapat-dapat ka ed samay piasawaan mo, dapat pansagpotan moy magmaliw ya maong ya asawa. No ontan so gawaen mo, baleg so posibilidad ya say napiasawaan mo et samay toon karapat-dapat met ed sika.