Anto ray Prinsipyon Uunoren na Saray Tasi nen Jehova ed Piiinaroan?

Papanisiaan na saray Tasi nen Jehova ya saray prinsipyo tan ganggan ed Biblia et makatulong ed sikatayon manggawa na saray desisyon ya makapaliket ed Dios tan parad pankaabigan tayo. (Isaias 48:17, 18) Aliwan sikami nanggawa ed sarayan prinsipyo tan ganggan, balet uunoren mi iraya. Arum ed saraya et walay koneksion to ed piiinaroan.a

• Say panangasawa et permanente. (Mateo 19:6) Lapud ipapasen na saray Tasi nen Jehova a say piiinaroan et mangitonton ed panangasawa, ipapasen mi itan a seryoso.

• Say piiinaroan et para labat ed saramay wala lad edad ya mangasawa o miasawa. Saraya imay “aliwa lan kabataan,” odino alampasan da lay panaon ya pinasyay pampilalek dad sekso.​—1 Corinto 7:​36.

• Say piiinaroan et para labat ed saramay bulos a mangasawa o miasawa. Wala ray legal ya nandiborsyo balet ag-ira ipapasen na Dios ya bulos a mangasawa o miasawa, ta diad estandarte to, say alenleneg a basiyan na diborsyo et seksual ya imoralidad.​—Mateo 19:9.

• Saray Kristianon labay day mangasawa o miasawa et ingganggan ya pilien labat iray kapara dan mananisia. (1 Corinto 7:39) Parad saray Tasi nen Jehova, sayan ganggan et agmanutukoy ed toon manrerespeto labat ed saray papanisiaan mi, noagta sakey ya abautismoan a Tasi a manisia tan manggagawa ed saratan. (2 Corinto 6:​14) Lanang ya igaganggan na Dios iray mandadayew ed sikato ya mangasawa o miasawa labat ed saramay kapara day pananisia. (Genesis 24:3; Malaquias 2:​11) Praktikal met iyan ganggan, a singa nalmoan na saray manag-research natan.b

• Nepeg ya unoren na ananak iray atateng da. (Uliran 1:8; Colosas 3:​20) No say anak et wala nid pudir na ateng, kaibad satan so pangunor ed desisyon na atateng nipaakar ed piiinaroan. Nayarin kaibad saya no anton edad a naabuloyan iray anak ya miinaroan tan antoy nayari tan agda nayarin gawaen.

• Personal ya desisyon na saray Tasi no miinaroan ira odino no siopay pilien da, basta paigiya irad Biblia. Mikonektaan iya ed prinsipyon: “Nepeg a sakbaten na kada sakey so awit ton dili.” (Galacia 6:5) Anggaman ontan, diad piinaroan, dakel so onkekerew na makabat a panangigiya ed saray eksperiensyadon Tasi ya malabay ya ontulong ed sikara.​—Uliran 1:5.

• Diad piiinaroan, wala ray nagagawaan na saninaro ya diad tua et seryoson kasalanan. Alimbawa, igaganggan itayo na Biblia ya paliisay seksual ya imoralidad. Aglabat iya ontutukoy ed aktual a pisekso noagta ed arum nin marutak a kagagawa na saray agni kasal, ya singa say pankarapas ed kayarian na arum odino say oral odino anal sex. (1 Corinto 6:9-11) Anggan saray kagagawan mangisasagyat na pilalek ed sekso ya ngalngali la manresultad panggaway seksual ya imoralidad et “karutakan” ya bubusolen na Dios. (Galacia 5:19-21) Saray imoral ya tongtongan tan saray mabanday a panagsalita et kokondenaen met na Biblia.​—Colosas 3:8.

• Say puso et mapalikdo. (Jeremias 17:9) Nayarin pakiwasen na satan so too ya manggawa na saray bengatla ya amta ton aliwa. Pian napaliisan itan, agmanbubukbukor iray saninaro pian ag-ira natukso. Maslak et manaalwar ira, ya mimila irad grupo odino mangitatagar iray responsablin tsaperon. (Uliran 28:26) Saray anggapo ni asawan Kristiano ya manaanap na kapareha et amta day peligro na saray online dating site, lalo ed pirerelasyon ed sakey ya agda masyadon kabat.​—Salmo 26:4.