Marcos 11:24—“Amin a Bengatlan Ipipikasi tan Kekerewen Yo, Manisia Kayo a Singano Inawat Yo La”

“Saya so rason no akin ya ibabagak ed sikayo, amin a bengatlan ipipikasi tan kekerewen yo, manisia kayo a singano inawat yo la, tan nagamoran yo iratan.”—Marcos 11:24, Balon Mundo a Patalos.

“Kanian kuan ko ed sikayo, amin a bengabengatla a pikasi yo tan kerewen yo, sisiaen yo ya awaten yo, et wala ra naani ed sikayo.”—Marcos 11:24, Say Biblia.

Say labay ya ibaga na Marcos 11:24

Ipapanengneng na sarayan imbaga nen Jesus ed saray papatumbok to ya importantin mabiskeg so pananisia ra ya walay nagawaan na pikakasi. Impaseguro tod sikara ya aglabat dengelen na Dios so pikakasi ra noagta ebatan to met iratan. No impapuso tan unong ed linawa na Dios so ipipikasi tayo, makaseguro tayo ya nagawa itan. Aliling to et singa naebatan lay pikakasi tayo.

Indanet nen Jesus ya importante so pananisia no manpipikasi tayo. Impaliwawa to ya no manpipikasi tayo, dapat et “agmanduaruwa so puso” tayo tan dapat “manisia [tayo] a nagawa so ibabaga” tayo. (Marcos 11:23) Akin ey? Ta saramay manduaruwa et anggapoy “antokaman a naawat [da] ed si Jehova.”a—Santiago 1:5-8.

Say toon mabiskeg so pananisia to et tuloytuloy ya manpipikasi. (Lucas 11:9, 10; Roma 12:12) Ipapanengneng to ya talagan kaukolan to so ipipikasi to, tan talagan manisia ya ebatan na Dios so pikakasi to. Siempre, natatalosan to ya nayarin ebatan na Dios so pikakasi to diad paraan ya duma ed iisipen to, tan ompan aliwan diad panaon ya iilaloan to.—Efeso 3:20; Hebreo 11:6.

Balet aglabay ya ibaga nen Jesus ya amin ya toon manpipikasi ed Dios et naebatan so pikakasi da. Say katongtong dia nen Jesus et saray papatumbok to, walay pananisia ra tan gagawaen day anggaay nayarian dan dayewen si Jehova a Dios diad paraan ya labay to. Ibabaga na Biblia ya say dedengelen labat nen Jehova ya pikakasi et saraman labat so unong ed linawa to. (1 Juan 5:14) Agto eebatan so pikakasi na saramay gagagalaen dan ag-unoren so ganggan to tan manggagawa ray mauges tan anggapoy pagbabawi ra. (Isaias 1:15; Miqueas 3:4; Juan 9:31) Pian naaruman ni antam ed saray pikakasin dedengelen na Dios, bantayan iyan video.

Say konteksto na Marcos 11:24

Diad sampot la ran agew na ministeryo nen Jesus, impaliwawa tod saray disipulo to ya importantin ipanengneng da so mabiskeg ya pananisia ed Dios. Walay inusar ton ilustrasyon pian idanet iyan leksion. Legan ya manbiabiahe paonlad Jerusalem, naimano nen Jesus so kiew ya igos ya asakbay ya nambulong. Balet anggapo manayay bunga to, kanian insumpa itan nen Jesus. (Marcos 11:12-14) Inyilustra na mapalikdon itsura na satan ya kiew so nasyon na Israel nensaman. Kunkunwari iran mandadayew ed Dios, balet diad tua et anggapoy pananisia da. (Mateo 21:43) Ag-abayag et nalnes so kiew ya igos, tan ontan met so nagawa ed nasyon na Israel ta anggapoy pananisia da.—Marcos 11:19-21.

Balet kombinsido si Jesus ya sarag na saray papatumbok to so nawalaan na pananisia ya ontulong ed sikaran nasarag iray subok tan nagawaan da iray makapakelaw ya bengatla. (Marcos 11:22, 23) Dugaruga so bilin nen Jesus nipaakar ed pikakasi ta kayari to itan et nasubok so pananisia ra. Kaukolan dan arapen so ipatey nen Jesus tan say graben panamasegsegang ed ministeryo da. (Lucas 24:17-20; Gawa 5:17, 18, 40) Nasarag met na saray papatumbok nen Jesus natan iray mair-irap ya kipapasen no ipanengneng day pananisia ed Dios tan ed pakayari na pikakasi.—Santiago 2:26.

Bantayan iyan antikey ya video pian nawalaan kay ideya ed libro na Marcos.