Levitico

7 “‘Oniay ganggan nipaakar ed apay parad impakasumlang:+ Saya et bengatlan sankasantosan. 2 Nepeg dan pakgeran so apay parad impakasumlang diad pasen a pamapakgeran ed saray apay a popoolan, tan nepeg ya iwalsik so dala+ na satan diad amin a diking na altar.+ 3 Iyapay to so amin a taba+ na satan, pati say mataban ikol, say taba ya akabalkot ed pait, 4 tan say duaran bato a kaibay taba a walad abay na saray tapi. Ekalen to met so taba na altey a kaiba iray bato.+ 5 Paaseweken iratan na saserdote diad altar bilang apay a pinoolan parad si Jehova.+ Sakey itan ya apay parad impakasumlang. 6 Kanen itan na balang laki a saserdote,+ tan nepeg a kanen itan diad masanton pasen. Satan et bengatlan sankasantosan.+ 7 Say ganggan nipaakar ed apay parad kasalanan et onaplika met ed apay parad impakasumlang; kien itan na saserdote a manggawa na pananakbong ed panamegley na satan.+

8 “‘Sano iyapay na saserdote so apay a popoolan parad sakey a too, magmaliw a kien na saserdote so katat+ na apay a popoolan ya inyakar ed sikato.

9 “‘Amin ya apay a kakanen ya inluto ed pugon odino ed aralem a kawali odino ed tirampiak a kawali+ et kien na saserdoten angiyapay ed satan. Magmaliw itan a kien to.+ 10 Balet amin ya apay a kakanen a nilaokay larak+ odino amaga+ et parad amin ya ananak nen Aaron; nampapara so apag na balang sakey.

11 “‘Natan saya so ganggan nipaakar ed bagat a pandurungoan+ a nayarin iyapay na sakey ed si Jehova: 12 No iyapay to itan bilang balikas na pisasalamat,+ iyapay to itan a kaibay bagat parad pisasalamat a kurti-singsing ya andi-lebadura iran tinapay ya alaokan na larak, andi-lebaduran maimpis iran tinapay a pinuraporan na larak, tan kurti-singsing iran tinapay a gawad pinon arina, ya inkames a maong tan atimplaan na larak. 13 Iyapay toy apay to a kaibay kurti-singsing ya alebaduraan iran tinapay tan saray bagat to a pandurungoan bilang bagat a pisasalamat. 14 Sikatoy mangiyapay manlapud satan na sansakey ed balang apay bilang sagradon kabiangan na bagat parad si Jehova; magmaliw itan a kien na saserdote a mangiwalsik ed dala na saray bagat a pandurungoan.+ 15 Say karne na saray bagat to a pandurungoan bilang bagat a pisasalamat et kanen diad agew ya iyapay to itan. Anggapoy ikekera to ed satan ya anggad kabuasan.+

16 “‘No say iyapay ton bagat et sakey a sipan+ odino boluntaryon apay,+ kanen itan diad agew ya iyapay to so bagat to, tan nayarin kanen met ed ontumbok ya agew so nakera. 17 Balet, nepeg a poolan ed komatlon agew so antokaman ya akeran karne na bagat.+ 18 Ingen, no kinan ed komatlon agew so antokaman a karne na saray bagat to a pandurungoan, samay mangiyaapay ed satan et ag-abobonan na Dios. Agto itan pakagunggonaan; makapadimla itan a bengatla, tan say too* a mangan ed satan et ebatan toy impakalingo to.+ 19 Agnepeg a kanen so karne a nisapigar ed antokaman ya agmalinis. Nepeg itan a poolan. Siopaman a malinis et nayarin mangan ed malinis a karne.

20 “‘Balet siopaman a too* ya agmalinis a mangan ed karne na bagat a pandurungoan, a parad si Jehova, satan a too* et nepeg ya ekalen* ed saray kabaleyan to.+ 21 No walay sakey* a makadiwit ed antokaman ya agmalinis, balanglan say karutakan na too,+ agmalinis ya ayep,+ odino antokaman ya agmalinis a makapadimlan bengatla,+ tan mangan ed karne na bagat a pandurungoan a parad si Jehova, satan a too* et nepeg ya ekalen* ed saray kabaleyan to.’”

22 Onia ni inkuan nen Jehova ed si Moises: 23 “Ibagam ed saray Israelita, ‘Agkayo mamangan na taba+ na kalakian a baka odino kilaw a kalakian a karnero odino kanding. 24 Say taba na inatey lan ayep tan taba na ayep a pinatey na sananey ya ayep et nayarin usaren ed arum a gagala, balet agyon balot kakanen itan.+ 25 Ta siopaman a mangay taba na ayep ya iyaapay to bilang apay a pinoolan parad si Jehova et nepeg ya ekalen* ed saray kabaleyan to.

26 “‘Agkayo mamangan na dala+ ed inerman a panaayaman yo, balanglan nanlapud saray manok odino ayayep. 27 Siopaman* a mangan na dala et nepeg ya ekalen*+ ed saray kabaleyan to.’”

28 Onia ni inkuan nen Jehova ed si Moises: 29 “Ibagam ed saray Israelita, ‘Siopaman a mangiyapay na bagat to a pandurungoan parad si Jehova et mangawit na kabiangay apay manlapud bagat to a pandurungoan parad si Jehova.+ 30 Awiten ton mismo so taba+ tan samay pagew bilang apay a pinoolan parad si Jehova, tan ipayapay to itan bilang apay ya ipapayapay+ ed arapan nen Jehova. 31 Paaseweken na saserdote so taba diad altar,+ balet say pagew et magmaliw a kien nen Aaron tan saray ananak to.+

32 “‘Iter yod saserdote so kawanan ya ulpo bilang sagradon kabiangan na bagat manlapud saray bagat yo a pandurungoan.+ 33 Say kawanan ya ulpo so apag na anak nen Aaron a mangiyapay ed dala na saray bagat a pandurungoan tan taba.+ 34 Ta alaen ko so pagew na apay ya ipapayapay tan say ulpo na sagradon kabiangan na bagat manlapud saray bagat a pandurungoan na saray Israelita, tan iter ko iratan ed si Aaron a saserdote tan saray ananak to bilang manbayag a totontonen parad saray Israelita.+

35 “‘Saya so kabiangan a nanlapud saray apay a pinoolan parad si Jehova a nibiig parad saray saserdote, parad si Aaron tan saray ananak to, diad agew ya inyarap to ra pian manlingkor ed si Jehova bilang saserdote.+ 36 Ingganggan nen Jehova ya iter ed sikara iyan kabiangan a nanlapud saray Israelita diad agew a nilanaan to ra.+ Sakey itan a permanentin ganggan parad saray henerasyon da.’”

37 Saya so ganggan nipaakar ed apay a popoolan,+ apay a kakanen,+ apay parad kasalanan,+ apay parad impakasumlang,+ bagat parad inkaturo,+ tan bagat a pandurungoan,+ 38 unong ya ingganggan nen Jehova ed si Moises diad Palandey Sinai+ ed samay agew ya ingganggan to iray Israelita pian iyapay da iray apay da ed si Jehova diad kalawakan na Sinai.+