Levitico

8 Onia ni inkuan nen Jehova ed si Moises: 2 “Awit moy Aaron tan saray ananak to,+ saray kawes,+ say larak a panaglana,+ say kalakian a baka ya apay parad kasalanan, say duaran kalakian a karnero, tan say baskit a nankargay andi-lebaduran tinapay,+ 3 tan pantitipon mo so amin a totoo diad lolooban na tolda a pantitiponan.”

4 Insan ginawa nen Moises so ingganggan nen Jehova ed sikato, tan nantitipon iray totoo diad lolooban na tolda a pantitiponan. 5 Inkuan natan nen Moises ed saray nantitipon a totoo: “Oniay ingganggan nen Jehova a gawaen tayo.” 6 Kanian inyasingger nen Moises si Aaron tan saray ananak to tan inames to ra.*+ 7 Kayari na satan et sinulongan toy Aaron na andukey a kawes,+ binalkesan to,+ kinawesan to na andiay-taklay a latop,+ tan sinulongan to na efod+ tan intaker to itan ed panamegley na nilagan balkes+ na efod, ya insinger to itan a malet ed sikato. 8 Insan insulong tod sikato so apis na pagew+ tan inkarga to ed apis na pagew so Urim tan Tumim.+ 9 Insan to inyan ed ulo to so turbante,+ tan inyan tod arap na turbante so masileng a metal a balitok, say masanton tanda na dedikasyon,*+ unong ya ingganggan nen Jehova ed si Moises.

10 Insan inala nen Moises so larak a panaglana tan nilanaan to so tabernakulo tan amin a wadtan+ tan pinasanto to iratan. 11 Kayari na satan et sikatoy aminpiton angiwalsik na daiset ed satan diad tapew na altar tan nilanaan to so altar tan amin a kagawaan na satan, tan say palanggana tan patoonan na satan ta pian napasanto iratan. 12 Insan inkalbo to so arum a larak a panaglana ed ulo nen Aaron tan nilanaan to pian sikatoy napasanto.+

13 Insan inyasingger nen Moises iray ananak nen Aaron tan sinulongan to ra na andukey iran kawes tan binalkesan to ra tan inyan* tod sikara so sakbong na ulo ra,+ unong ya ingganggan nen Jehova ed si Moises.

14 Insan to inyakar so kalakian a baka ya apay parad kasalanan, tan intapew nen Aaron tan saray ananak to so lima ra ed ulo na kalakian a baka ya apay parad kasalanan.+ 15 Pinakgeran itan nen Moises tan angala na dala+ ed panamegley na gamet to tan inyan to ed saray saklor na altar diad amin a diking, tan nilinisan to so altar ed kasalanan, balet say akeran dala et inkalbo to ed leksab na altar, diad ontan et napasanto itan pian makapanggaway pananakbong ditan. 16 Kayari na satan et inala to so amin a taba a walad pait, say taba na altey, tan say duaran bato tan taba na saratan, tan pinaasewek nen Moises iratan diad altar.+ 17 Insan to pinoolan ed paway na kampo so akeran kabiangan na kalakian a baka, say katat, karne, tan say dutak na satan,+ unong ya ingganggan nen Jehova ed si Moises.

18 Inyasingger to natan so kalakian a karnero ya apay a popoolan, tan intapew nen Aaron tan saray ananak to so lima ra ed ulo na kalakian a karnero.+ 19 Insan pinakgeran itan nen Moises tan inwalsik to so dala diad amin a diking na altar. 20 Tinetegteg nen Moises so kalakian a karnero, tan pinoolan to so ulo, saray tegteg, tan say taba.* 21 Inurasan to so pait tan saray sali, insan pinaasewek nen Moises so interon kalakian a karnero diad tapew na altar. Sakey itan ya apay a popoolan a walaay ambalingit* ya angob. Satan et apay a pinoolan parad si Jehova, unong ya ingganggan nen Jehova ed si Moises.

22 Insan inyakar to so komaduan kalakian a karnero, say kalakian a karnero parad inkaturo,+ tan intapew nen Aaron tan saray ananak to so lima ra ed ulo na kalakian a karnero.+ 23 Pinakgeran itan nen Moises tan angala na daiset a dala na satan tan inyan tod kawanan a layag nen Aaron tan ed tangan na kawanan a lima to tan ed tangan na kawanan a sali to. 24 Insan inyasingger nen Moises iray ananak nen Aaron tan angiyan na daiset a dala ed kawanan a layag da tan ed tangan na kawanan a lima ra tan ed tangan na kawanan a sali ra; balet inwalsik nen Moises so akeran dala diad amin a diking na altar.+

25 Insan inala to so taba, say mataban ikol, amin a taba a walad pait, taba na altey, duaran bato tan taba na saratan, tan say kawanan a sali.+ 26 Sikatoy angala na sakey ya andi-lebaduran tinapay a kurti-singsing,+ sakey a kurti-singsing a tinapay a nilarakan,+ tan sakey a maimpis a tinapay manlapud baskit na andi-lebaduran tinapay a walad arapan nen Jehova. Insan to intapew iratan ed saramay taba tan ed kawanan a sali. 27 Kayari na satan et inyan to iratan ya amin ed saray dakulap nen Aaron tan saray dakulap na ananak to, tan impayapay da iratan bilang apay ya ipapayapay diad arapan nen Jehova. 28 Insan inala nen Moises iratan ed lima ra tan pinaasewek to iratan ed altar diad tapew na apay a popoolan. Saratan et bagat parad inkaturo a walaay ambalingit* ya angob. Sakey itan ya apay a pinoolan parad si Jehova.

29 Insan inala nen Moises so pagew tan impayapay to itan bilang apay ya ipapayapay diad arapan nen Jehova.+ Nagmaliw itan ya apag nen Moises manlapud samay kalakian a karnero parad inkaturo, unong ya ingganggan nen Jehova ed si Moises.+

30 Tan angalay Moises na daiset a larak a panaglana+ tan daiset a dala a walad tapew na altar tan inwalsik to itan ed si Aaron tan saray kawes to tan saray ananak to tan saray kawes na ananak ton kaiba to. Kanian pinasanto toy Aaron tan saray kawes to tan saray ananak to+ tan saray kawes da.+

31 Insan inkuan nen Moises ed si Aaron tan saray ananak to: “Ilambong yo+ so karne diad lolooban na tolda a pantitiponan, tan ditan yo kanen a kaiba na tinapay a walad baskit parad inkaturo, unong a niganggan ed siak, ‘Kanen itan nen Aaron tan saray ananak to.’+ 32 Poolan yo so akeran karne tan tinapay.+ 33 Agkayo ompapaway ed lolooban na tolda a pantitiponan ed loob na pitoy agew, anggad kasumpal na saray agew na inkaturo yo, ta say pakaturo yo bilang saserdote* et nagawa ed loob na pitoy agew.+ 34 Ingganggan nen Jehova a gawaen tayo so singa ginawa tayo natan pian makapanggawa na pananakbong parad sikayo.+ 35 Pitoy agew kayon mansiansia ed lolooban na tolda a pantitiponan ed agew tan labi+ tan sumpal yoy obligasyon yo ed si Jehova,+ pian agkayo ompatey; ta ontan so niganggan ed siak.”

36 Tan ginawa nen Aaron tan saray ananak to so amin ya ingganggan nen Jehova ed panamegley nen Moises.