Deuteronomio

24 “No asawaen na sakey a laki so sakey a bii, balet agnaliketan ed samay bii ta walay nalmoan ton mabanday nipaakar ed sikato, nepeg a sikatoy manggawa na kasulatan na diborsyo parad bii,+ iter to itan ed sikato, tan pataynanen tod abung to.+ 2 Kaalis tod abung na laki, nayarian to lay miasawa ed sananey a laki.+ 3 No sikatoy busolen* na samay komaduan laki insan manggawa na kasulatan na diborsyo parad sikato, iter itan na laki ed sikato, insan sikatoy pataynanen tod abung to, odino no inatey so komaduan laki ya angasawa ed sikato, 4 samay unonan asawa to ya amataynan ed sikato et agnaabuloyan a mangala lamet ed sikato bilang asawa to kayarin sikatoy nagmaliw ya agmalinis, ta makapadimla itan ed si Jehova. Agmo iyaakar so kasalanan diad dalin ya ipatawir ed sika nen Jehova a Dios mo.

5 “No kapkapangasawa na sakey a laki, sikatoy agnepeg a mansundalo odino ikdan na arum ni ran obligasyon. Sikatoy mansiansian bulos ed saratan diad loob na sakey taon tan manayam ed abung to tan paliketen toy asawa to.+

6 “Agyo nepeg a laen so gilingan odino samay walad tapew a bato na gilingan bilang garantiya ed utang,+ ta no alaen yo itan, aalaen yo so pambilay na sakey a too.*

7 “No nalmoan so sakey a too a puersaan ton inala so sakey* ed saray agagi ton Israelita, tan sikatoy minaltrato to tan inlako to,+ nepeg ya ompatey imay angala.+ Nepeg yon ekalen so mauges ed limog yo.+

8 “Sano walay napeketan na kating,* maal-alwar yon gawaen so amin ya iganggan ed sikayo na saray saserdoten Levita.+ Maalwar yon gawaen so amin ya ingganggan kod sikara. 9 Nonot yo so ginawa nen Jehova a Dios yo ed si Miriam diad dalan sanen papaway kayo ed Ehipto.+

10 “Sano pabayesen mo na antokaman so kaabay mo,+ agka onloloob ed abung to pian alaen mod sikato imay iiter ton garantiya. 11 Manalagey kad paway, tan iyakar ditan na samay toon binmayes so iiter tod sikan garantiya. 12 Tan no say too et mankakkaukolan, agka onuugip a wala nid sika imay inter ton garantiya.+ 13 Kaselek na agew, ipawil mod sikato imay inter ton garantiya, tan sikatoy onugip a walad sikato so kawes to,+ tan bendisyonan to ka; tan nibilang kan matunong ed arapan nen Jehova a Dios mo.

14 “Agmo sasaolen so sakey ya uupaan a trabahador a mankakkaukolan tan pobri, balanglan sakey ed saray agagim odino dayo ed dalin mo, diad loob na saray syudad* yo.+ 15 Nepeg mon iter so upa to ed saman a mismon agew,+ antis ya onselek so agew, ta sikatoy mankakkaukolan tan akadepende so bilay* to ed samay upa to. Ta no andi, sikatoy ontawag ed si Jehova lapud sika, tan mankasalanan ka.+

16 “Agnepeg a pateyen iray kaamaan lapud ginawa na saray ananak da, tan agnepeg a pateyen iray ananak lapud ginawa na saray kaamaan da.+ Nepeg a pateyen so sakey a too lapud dilin kasalanan to.+

17 “Agmo pipikeweten so hustisya parad dayo odino ugaw ya ulilad ama,*+ tan agmo aalaen so kawes na sakey a balon bii bilang garantiya ed utang.+ 18 Tandaan mo a nagmaliw kan aripen nensaman ed Ehipto, tan dinondon ka ditan nen Jehova a Dios mo.+ Kanian ontan so igaganggan kon gawaen mo.

19 “Sano anien mo so bunga na umam tan alingwanan mo ditan so sakey bedber, agmo la itan papawilen. Nepeg ya itilak itan parad dayo, ugaw ya ulilad ama, tan balon bii,+ pian bendisyonan ka nen Jehova a Dios mo ed amin a gawaen mo.+

20 “Sano manpaspas kay kiew mon olibo, agmo la uuliten a paspasen iray sanga to. Samay atilak et parad dayo, ugaw ya ulilad ama, tan balon bii.+

21 “Sano manburbor kay ubas ed kaubasan mo, agmo la papawilen iramay atilak. Nepeg ya itilak iratan parad dayo, ugaw ya ulilad ama, tan balon bii. 22 Tandaan mo a nagmaliw kan aripen nensaman ed dalin na Ehipto. Kanian ontan so igaganggan kon gawaen mo.