Pian Naalig si Jesus, Magmaliw ya . . .
MAABAGEY
Lapud perpektoy Jesus, agto asali so dakel a problema tan kairapan ya naeeksperiensya na arum a totoo. Balet kinasian to ra. Mabulos ya nansakripisyo parad sikara pian gawaen iray bengatlan mas ni nen say nakaukolan. On, lapud maabagey, sikatoy apakiwas ya tulongay arum. Nengnengen iray alimbawa diad Kapitulo 32, 37, 57, 99.
MAINOMAY YA ASINGGERAN
Agnatatakot ya onkerew na tulong ed si Jesus iray totoo, ugugaw man o mamatatken, lapud aliwan mairap ya asinggeran tan aliwan paimportante. Lapud amta ran interesado si Jesus ed sikara, alemlemew so liknaan dad sikato. Pian napaneknekan iya, nengnengen so Kapitulo 25, 27, 95.
MAPIKASI
Regular ya manpipikasin impapuso si Jesus ed Ama to, no bukbukor to tan no kaiba to ray tuan managdayew. Maminpigan manpipikasi, aliwa labat ya no panangan. Nampikasi pian pisalamatan, idayew, tan kerewey panangiwanwan na Ama to antis ya manggaway importantin desisyon. Imanoen iray alimbawa ed Kapitulo 24, 34, 91, 122, 123.
AGMAKASARILI
Wala ray panaon ya kakkaukolan toy manpainawa tan manrelaks balet inyuna toy itulong ed totoo. Agto inyunay sarili to. Angipanengneng na alimbawan aligen tayo. Amtaen no panon ton impanengneng itan diad Kapitulo 19, 41, 52.
MANAMERDONA
Aglabat imbangat nen Jesus a kaukolan so mamerdona—sikaton mismo et pinerdona to ray disipulo to tan saray arum. Dalepdepen iray alimbawa to diad Kapitulo 26, 40, 64, 85, 131.
MASESEG
Nipropesiyan ag-awaten na maslak a Judio so Mesias tan pateyen na saray mamubusol ed sikato. Kanian nayari komon ya anggan agla tanton tulongan nen Jesus iray totoo. Balet, maseseg ton imbangat so dugan panagdayew. Angipanengneng na alimbaway inkaseseg parad amin ya papatumbok ton napapairap odino napapasegsegang. Nengnengen so Kapitulo 16, 72, 103.
MAPAABEBA
Diad dakel a bengatla et mas atagey si Jesus nen saray imperpekton totoo, singa diad kakabatan tan karunongan. Sikatoy perpekto kanian mas mabiskeg so laman to tan mas marunong nen say siopaman. Balet, mapaabeban nanlingkor ed arum. Nabasam iratan diad Kapitulo 10, 62, 66, 94, 116.
MAANOS
Anggano agda aaligey alimbawa to odino agda iyaaplikay ibabaga to, maan-anos si Jesus ed saray apostol to tan ed arum. Maanos ton inulit ya imbangat iray leksion ya kaukolan da pian mas onapit irad si Jehova. Nengnengey alimbawa na inkaanos nen Jesus diad Kapitulo 74, 98, 118, 135.