Akin ya “Onla ka ed Gilata”?

SAYAN simbawa so inter nen makabat ya Arin Solomon na kadaanan ya Israel: “Onla ka ed gilata.” Akin a saya so imbaga to? Anto so naaralan tayo ed saray gilata?

Inyarum nen Solomon: “Isipen mo so saray dalan to [say gilata], tan onkabat ka. Sikato ya andian na manunaan, managimaton, odino makauley, itadia to so tinapay to ed tiagew, tan tiponen to so kanen to ed panagani.” (Uliran 6:6-8) Ibabalikas na saratan ya abayaglan salita iray katuaan ya adiskobre na saray modernon-agew a biologo.

Ipanengneng nen Agur a manag-anlong a saray gilata so “mapalalo a makabat.” (Uliran 30:24, 25) Siempre, say kakabatan da so aliwan produkto na matudion panagkatunongan noagta resulta na nisipor-iran-kakabatan ya inter na Manamalsa ed sikara. Alimbawa, lapud nisipor-a-kakabatan tiponen na saray gilata so tagano ra ed suston panaon.

Saray gilata so makapakelaw ya organisado. Agaylan matulong tan atentibo ed kapara ran kumikimey, tulongan da so asakitan odino apunaw iran gilata ya ompawil ed obong. Sikaray nisipor a sikakabat a manparaan parad arapen tan manggawa na antokaman a posibli pian sumpalen iray kimey da.

Say natural a kurang na gilata so mangipapanengneng a saray totoo so nepeg a manplanon masakbay tan magmaliw a makulin kumikimey. Saya so onaplika ed eskuelaan, diad trabaho, tan diad espiritual ya aktibidades. Unong a saray gilata so nagugunggunaan ed inkakuli ra, ontan met a kaliktan na Dios so totoo a “manliket a maong ed amin a kimey to.” (Eclesiastes 3:13, 22; 5:18) Singa saray okupadon gilata, saray tuan Kristianos so impasyan mankikimey ed sanagew. ‘Gagawaen [da] ed anggaay nayarian da so antokaman a naromog na saray lima ra a gawaen,’ aliwan lapud manbabantay so amo, noagta lapud inkamatua tan tekep na pilalek a magmaliw a makuli, mabungan kumikimey.​—Eclesiastes 9:10, NW; ipareng so Uliran 6:9-11; nengnengen met so Tito 2:9, 10.

Peteg a naliketan itayo no sikatayo so “onla ed gilata” tan iyaplika so naaralan tayo manlapud satan. Tan nakayarian tayo so sankabalgan a liket no siseseet a gawaen tayo so linawa nen Jehova a Dios, unong a niparungtal ed Biblia.