Say Biblia—Kasin Salita na Dios Odino Too?
Kapitulo 12
Atagtagey a Lapuan na Kakabatan
“O Jehova, agayla so karaklan na saray gawam! Sarayan amin so ginawam ed kakabatan. Say dalin so napno na kaykayamanan mo.” (Salmo 104:24) On, manlapud karakpan na baleg a talba ya anggad kalimgasan na sakey a rosas, say palsa so mantasi ed agnaparaan a kakabatan na Manamalsa to. Say teknolohiya na sayan koma-20 siglo so naandian na kabaliksan sano ipareng ed saray gawa na Dios. No say Biblia so Salita na Dios, ilaloan tayo met itan a mangiter na ebidensya ed kakabatan a labas ed saray pakayari na too. Kasin ontan?
1. (Ilaktip so introduksion.) (a) Iner so pakanengnengan tayo na ebidensya na agnaparengan a kakabatan na Dios? (b) Anton konseho so iter na Biblia nipaakar ed kakabatan?
1 Idadanet na Biblia so kaimportantian na kakabatan. Ikuanto: “Say kakabatan so manunan bengatla. Gamoran so kakabatan; tan ed simoon a panangamor mo, gamoran mo so pakatalos.” (Uliran 4:7) Bibidbiren met na saya a sikatayon totoo so mabetbet ya onkulang na kakabatan, tan papasesegen to itayo: “No siopaman ed sikayo so makulang na kakabatan, pakerewen ed Dios, ta sikato so mangiter a sibubunlok ed amin.”—Santiago 1:5.
2. Panon na sakey a toon padaaken so kakabatan to?
2 Panon na Dios ya ‘iter so kakabatan a sibubunlok’? Sakey a paraan et say pamaseseg ed sikatayon mamasa ed Biblia tan makaaral ditan. Ipapaseseg na libro na Biblian Uliran: “Anako, no awaten mo so saray salitak tan yatol mo so saray ganggan ko ed sika, pian imanoen mo so kakabatan . . . natalosan mo so takot ed si Jehova, tan naromog mo so mismon pikakabat ed Dios. Ta si Jehova a mismo mangiter na kakabatan.” (Uliran 2:1, 2, 5, 6) Sano iyaplika tayo so konseho ed Biblia tan nengnengen no panon inkaepektibo itan, namoria tayon peteg a mangilalaman itan na madibinon kakabatan.
Makabat iran Uliran
3, 4. (a) Anto so ibabaga na Biblia nipaakar ed kaapaan na aro ed kuarta? (b) Anton maabig ya inkasimbang so ipaparungtal na Biblia diad panisimbawa’d sikatayo ed kablian na kuarta?
3 Pian saya so lalon naapresya, usisaen tayo pa so pigaran bersikulo na Biblia. Kunsideraen iyan makabat ya uliran: “Saramay manpirawat ya onyaman napelag ira ed katuksoan tan patit tan diad dakel ya agum a maksay tan makaderal iran pilalek . . . Ta say aro ed kuarta so lamot na saray amin a nengneng na makaderal a bengatla.” (1 Timoteo 6:9, 10) Ipareng iya ed modernon panmoria—anggan diad Mamasagur a sosyedad lambengat—a mamapaseseg ed totoon mangegemtan a manuna ed panag-anap na kuarta. Makapaermen, dakel so akagamor na kayamanan ya aanapen da ingen siansian nalilikna ra so kakulangan tan ag-inkakontento. Inkuan na sakey a sikologo: “Say pagmaliw a No. 1 tan mayaman so agmanggawad sikan manliknan napno, napnek, peteg a galgalngen odino inararo.”
4 Agkabaliksan na saya a say praktikal a too so sigpot lan mangibeneg ed kuarta. Ipapanengneng na Biblia so maabig inkasimbang a kakabatan sanen ikuanto: “Say kakabatan so sakey a sakurong a singa met say kuarta so sakey a sakurong; balet say katagyan na pikakabat sikato a say kakabatan kawaloen to so bilay na walaan ed sikato.” (Eclesiastes 7:12) Kanian, say Biblia so ontulong ed sikatayon onnengneng ed kuarta ya anggaman importante, et aliwan sankaimportantian. Sakey lambengat iyan panlegpet ed pankaukolan, tan atan so ageteran ed balor no andian itayo na kakabatan diad suston pangusar ed atan.
5, 6. (a) Akin a makabat so konseho na Biblia a paliisan iray mauges a kalimog? (b) Panon itayon nagunggunaan diad “piulop ed makabat a totoo”?
5 Sayan balikas na Biblia so tua met: “Say miulop ed makabat a totoo so magmaliw a makabat, balet say kaiba na saray maatiw manlikna na segsegang.” (Uliran 13:20) Kasin naimano yo so mabiskeg ya epekto ed sikatayo na saray kaulop tayo? Say desdes na kaederan so angitonton ed tobonbalon totoo ed panagbuanges, panag-abuso ed druga, tan imoralidad. No milimog itayo ed saramay manguusar na mabanday a salita, agmabayag et mansasalita itayo met la na mabanday. Say piulop ed saray managsaol so manggawad sikatayon masaol. On, unong ya ibabaga met na Biblia, “Saray mauges a kalimog deralen da so maong iran ugali.”—1 Corinto 15:33.
6 Diad biek a dapag, saray maong a kalimog so mamaaligwas ed sikatayo. Diad “piulop ed makabat a totoo,” sikatayon mismo so magmaliw a mas makabat. Saray maong ya ugali so makaalis, a singa met say makapuy. Lamet, ipapanengneng na Biblia so kakabatan diad pamaseseg ed sikatayon pilien a maalwar iray kalimog tayo.
7. Anto so manggawa ed Biblian nikadkaduma a bilang lapuan na simbawa?
7 Say Biblia so walaan na dakel ya ontan iran panontunan ya ontulong a mangigiya ed saray bilay tayo. Bilang lapuan na simbawa, atan so nikadkaduma. Say konseho to so lawas makagungguna. Atan so aliwa lambengat a teorya, tan agbalot itan mamasakit ed sikatayo. Say malaknab a konseho na Biblia so agnaparaan. Saramay mangiyaaplika’d saya ed saray bilay da, tan makakanengneng a saya so lawas diad pankaabiganan da, so angapresya ed Biblia bilang nikadkaduman lapuan na kakabatan.