Antoy Ibabaga na Biblia Tungkol ed Natural Iran Kalamidad?

Say ebat na Biblia

Aliwan say Dios so panlalapuan na saray nagagawan kalamidad natan. Pero imamalasakit to iramay biktima na satan. Ekalen na Panarian na Dios so amin ya mamapairap ed sikatayo, kaiba la ray natural ya kalamidad. Anggano diad arapen ni nagawa itan, natan ni labat et liligliwaen la na Dios iramay biktima na kalamidad.​—2 Corinto 1:3.

• Akin et segurado tayon aliwan parusa na Dios iray natural ya kalamidad?

• Kasin sinyales iray natural ya kalamidad?

• Panon ya tutulongan na Dios iray biktima na natural ya kalamidad?

• Kasin makatulong so Biblia pian makapan-ready tayo ed saray natural ya kalamidad?

• Bersikulo ed Biblia parad saray biktima na natural iran kalamidad

Akin et segurado tayon aliwan parusa na Dios iray natural ya kalamidad?

Samay nabasa tayo ed Biblia ya impangusar na Dios na natural iran puersa pian ukomen iray totoo nensaman et duma ed saray nagagawan natural ya kalamidad natan.

• No wala ray natural ya kalamidad, anggan siopa et nayarin ompatey. Pero no uusaren na Dios iray natural ya puersa pian mangukom, seseguradoen to ya saramay mauges labat so naderal. Singa bilang, nen dineral na Dios so syudad na Sodoma tan Gomorra, agto indamay so maomaong ya toon si Lot tan say duaran ananak ton bibii. (Genesis 19:29, 30) Amta na Dios so walad puso na kada sakey diad saman a panaon, kanian say dineral to labat et saramay talagan mauges.​—Genesis 18:23-32; 1 Samuel 16:7.

• Saray natural ya kalamidad et mabetbet ya bigbiglan onsabi. Pero antis ya ukomen na Dios iray mauges, wa-warningan to ni ra. Kanian saramay ondengel ed warning to et walay chance da ya makaligtas.​—Genesis 7:1-5; Mateo 24:38, 39.

• Diad tua, saray totoo lanlamang so rason no akin ya wala ray natural ya kalamidad. Akin ey? Wala ray gagawaen dan manederal ed kalikasan tan manpapaalagey iray bilding ed lugar ya natatamaan na yegyeg, midedelap, tan nasasalantay bagyo. (Apocalipsis 11:18) Kanian aliwan say Dios so natetel no aanien na totoo iray resulta na makapuy ya desisyon da.​—Proverbio 19:3.

Kasin sinyales iray natural ya kalamidad?

On, impropesiya la na Biblia ya wala ray nagawan natural iran kalamidad diad “kaunoran a parte na sistema na mundo,” odino “kaunoran iran agew.” (Mateo 24:3; 2 Timoteo 3:1) Singa bilang, oniay imbaga nen Jesus tungkol ed panaon tayo: “Wala ray eras tan yegyeg ed nanduruman pasen.” (Mateo 24:7) Agmanbayag, ekalen na Dios so amin ya rason na paneermen tan paniirap tayo, kaiba la ray natural ya kalamidad.​—Apocalipsis 21:3, 4.

Panon ya tutulongan na Dios iray biktima na natural ya kalamidad?

• Uusaren na Dios so Salita to, say Biblia, pian ligliwaen iray biktima. Ipapaseguro na Biblia ya imamalasakit itayo na Dios. Tan no naiirapan tayo, natatalosan to so nalilikna tayo. (Isaias 63:9; 1 Pedro 5:6, 7) Nabasa tayo met ed Biblia so promise na Dios ya onsabi panaon et anggapo la ray natural ya kalamidad.​—Nengnengen so “Bersikulo ed Biblia parad saray biktima na natural iran kalamidad.”

• Uusaren na Dios iray lingkor to pian tulongan iray biktima. Uusaren na Dios iray lingkor to ya mangaalig ed alimbawa nen Jesus pian tulongan iray biktima na kalamidad. Impropesiya ya ligliwaen nen Jesus “so amin a maneermen” tan ‘asugatan so puso ra.’ (Isaias 61:1, 2) Ontan met so gagawaen na saray lingkor na Dios.​—Juan 13:15.

  Uusaren met na Dios iray lingkor to pian mangiter na tulong tan onalalay ed saray biktima na natural ya kalamidad.​—Gawa 11:28-30; Galacia 6:10.

Kasin makatulong so Biblia pian makapan-ready tayo ed saray natural ya kalamidad?

On. Anggano say Biblia et aliwan manual parad natural iran kalamidad, wala ray nabasa tayo ditan ya makatulong iran prinsipyo. Nia ray pigara:

• Manplano. “Say marunong et ompapaliis no nanenengneng toy peligro,” so kuan na Biblia. (Proverbio 22:3) Nibagan marunong tayo no natan ni labat et manre-ready tayo la. Singa bilang, man-ready kayo lay emergency kit tan pantongtongan yo lan pamilya no iner kayo manbabana no walay nagawan kalamidad.

• Mas importante so bilay nen saray kaykayarian. Oniay ibabaga na Biblia: “Anggapon balot so inawit tayo diad mundo, tan anggapon balot so naawit tayo manlapu dia.” (1 Timoteo 6:7, 8) Agtayo kawkawanan iray kaykayarian tayo tan dapat akaparaan tayon taynan so abung tayo no atan so paraan pian makaligtas tayo. Tandaan tayo ya mas importante so bilay tayo nen say anggan anton materyal ya bagay.​—Mateo 6:25.