Manlingkor Bilang Sumisigay na Totoo
“Inkuan nen Jesus ed Simon: ‘Agka natatakot. Manlapud natan sika so mansigay na saray totoo.’”—LUCAS 5:10.
1, 2. (a) Anton betang so agawaan na panagsigay ed awaran na katooan? (b) Anton balon nengneng na panagsigay so niparungtal ngalngalin 2,000 taon lay apalabas?
DIAD loob na nilibulibon taon, say katooan so nansigay ed kadayatan, linok, tan saray ilog ed dalin a parad tagano. Saray sira ed Nilo so sakey ya importanten kabiangan na gendat a tagano ed kadaanan ya Ehipto. Sanen saray danum na Nilo so nagmaliw a dala ed panaon nen Moises, saray Ehipsios so nanirap aliwa lambengat ed agawan kakisiran na danum noagta ontan met ed impatey na saray sira, ya angapekta ed suplay dan tagano. Saginonor, diad Sinai, sanen inter nen Jehova so Ganggan ed Israel, inkuanto ed sikaran arum a sira so nayarin kanen balet saray arum so marutak, agnayarin kanen. Ipanengneng na saya a saray Israelitas so mangan na sira sano onsabi ra ed Nisipan a Dalin, kanian arum ed sikara so magmaliw a sumisigay.—Exodo 7:20, 21; Levitico 11:9-12.
2 Anggaman kuan, ngalngalin 2,000 taon so apalabas, sananey a nengneng na panagsigay so niparungtal ed katooan. Saya et sakey ya espiritual a nengneng na panagsigay a mangungguna aliwa lambengat ed saray sumisigay noagta ontan met ed saray sira! Sayan nengneng na panagsigay so siansian aagamilen natan, tekep na malaknab iran gungguna ed nilaksalaksa diad sankamundoan.
“Mansigay na Saray Totoo”
3, 4. Siopa so duaran sumisigay ya angipanengneng na baleg ya interes ed si Jesu-Kristo?
3 Diad taon 29 K.P., si Jesus, say Sakey a mangiparungtal ed sayan balon porma na panagsigay, so binautismoan nen Juan a Managbautismo ed ilog Jordan. Pigaran simba ed saginonor, impabitar nen Juan si Jesus ed saray duaran babangatan to tan kuanto: “Nia, say Kordero na Dios!” Sakey ed sarayan babangatan, a manngaran na Andres, so tampol ya angibaga’d si agi ton Simon Pedro: “Aromog mi so Mesias”! Makapasagyat, namparan say anapan nen Andres tan Simon et panagsigay.—Juan 1:35, 36, 40, 41; Mateo 4:18.
4 Pigaran agew ed saginonor, si Jesus so manpupulong ed saray ulop diad pangdel na Dayat na Galilea, asingger ed panaayaman nen Pedro tan Andres. Ibabaga to ed totoo: “Manpataoli, sikayon totoo, ta say panarian na katawenan so asingger la.” (Mateo 4:13, 17) Naisip tayo a si Pedro tan Andres so magunaet ya ontalineng ed mensahe to. Ingen, nayarin agda namoria a ngalngalilan ibaga nen Jesus ed sikara so bengatlan manguman ed saray bilay da ed ando lan ando. Niarum ni, say ibaga tan gawaen nen Jesus ed imaton da so walaan na importanten kabaliksan parad sikatayon amin natan.
5. Panon a si Pedro a sumisigay so akapanlingkor ed si Jesus?
5 Nabasa tayo: “Aminsan sanen nantitipon so ulop ed sikato tan ondedengel ed salita na Dios, sikato so nanalagey ed abay na linok na Genesaret. Tan anengneng to so duaran baloton akadoong ed gilig na linok, balet saray sumisigay so akalasor tan uurasan daray iket da.” (Lucas 5:1, 2) Nensaman, saray propesyonal a sumisigay so mabetbet a mansigay no labi, tan sarayan lalaki et lilinisan daray iket da kayari impansigay ed labi. Inusar nen Jesus so sakey ed saray baloto ra pian lalon epektibon manpulong ed ulop. “Linmugan diad sakey ed saray baloto, a kien nen Simon, kinerew to ed sikato a yarawi to na daiset ed pangdel. Et yinmurong, tan manlapud baloto ginapoan ton bangatan iray ulop.”—Lucas 5:3.
6, 7. Anton milagro a manasaglawi ed panagsigay so ginawa nen Jesus, ya angitonton ed anton balikas nipaakar ed panagsigay?
6 Imanoen a wala so bengatlan iisipen nen Jesus a nagkalalo nen say pangibangat ed saray ulop: “Sanen tinmundan nansalita, inkuanto ed Simon: ‘Ontaewka, tan ipelag yoray iket yo a pansigay.’” Tandaan, sarayan sumisigay so sanlabi lan mansisigay. Agpankelawan, inmebat si Pedro: “Managbangat, sanlabi kami lan nansagpot tan anggapoy nala mi, ingen lapud salitam ipelag ko so saray iket.” Anto so agawa sanen saya so ginawa ra? “Akapangipukok iray amayamay a sira. Diad tua, saray iket da so ginmapon napilat. Kanian inandawesan daray ibiba ra ed sananey a baloto pian ondago tan tulongan dara; et dinmago ra, tan nanpadparan pinano daray baloto, a saraya so ngalngalin onlereg.”—Lucas 5:4-7.
7 Si Jesus so nanggawa na milagro. Atan a panat na dayat so sanlabin andian na sira; natan et kimayasamas ed sira. Sayan milagro so walaan na mabiskeg ya epekto ed si Pedro. “Tinmalimukor si Simon Pedro ed arap nen Jesus, a kuanto: ‘Katawan, onarawi ka ed siak ta too ak a managkasalanan.’ Ta diad ginawa ran impansigay sikato tan amin na saramay kakaiba to, a pati si Santiago tan Juan, ya ilalak nen Zebedeo, a kaiba nen Simon so nikelawan a tuloy.” Si Pedro so pinakalmada nen Jesus tan insan imbalikas toray salita a manguman ed bilay nen Pedro. “Agka natatakot. Manlapud natan sika so mansigay na saray totoo.”—Lucas 5:8-10.
Sumisigay na Totoo
8. Panon so inkiwas na apatiran propesyonal a sumisigay ed imbitasyon a ‘mansigay na totoo’?
8 Sirin impareng nen Jesus iray totoo ed saray sira, tan sayan mapaabeban sumisigay so inimbitaan ton mangikaindan ed anapan to parad mas babaleg a porma na panagsigay—pansigay na totoo. Sayan imbitasyon so inawat nen Pedro tan si agi ton Andres. “Tampol tinaynan daray iket da, tan tinmumbok ira ed sikato.” (Mateo 4:18-20) Insan tinawag nen Jesus si Santiago tan Juan, a walarad baloto ra ya aayomaan daray iket da. Saraya met so inimbitaan ton magmaliw a sumisigay na totoo. Panon so inkiwas da? “Tampol a tinaynan da so baloto tan si ama ra, et tinmumbok ira ed sikato.” (Mateo 4:21, 22) Impanengneng nen Jesus so abilidad bilang sakey a sumisigay na kakamarerwa. Diad sayan pankanawnawa et apatiran totoo so asigay to.
9, 10. Anton pananisia so impanengneng nen Pedro tan saray kakaiba to, tan panon iran nipasal ed espiritual a panagsigay?
9 Say sakey a propesyonal a sumisigay so manbilay diad pangilako ed asigay to, balet say espiritual a sumisigay so agmakapanggawa na ontan. Kanian, impanengneng na sarayan babangatan so baleg a pananisia sanen amin et tinaynan da pian tumboken si Jesus. Anggaman kuan, sikaray andian na duaruwa a say espiritual a pansigay da so magmaliw a matalona. Sarag nen Jesus ya ikdan na dakerakel a literal iran sira so danudanum ya andian na ontan. Mipadpara, sanen impelag daray iket da ed danudanum na nasyon na Israel, saray babangatan so maseguron, diad tulong na Dios, sikaray makasigay na totoo. Say kimey ya espiritual a panagsigay a ginmapo ed saman so mantutultuloy, tan siansian iiter nen Jehova so mayaman a panagtipon.
10 Diad loob na masulok a duaran taon, saraman a babangatan so impasal nen Jesus diad pansigay na totoo. Aminsan sikaray inikdan to na maalwar a bilibilin tan imbaki toran masakbay pian manpulong. (Mateo 10:1-7; Lucas 10:1-11) Sanen si Jesus so nitapat tan pinatey, saray babangatan so nikelawan. Balet kasin say impatey nen Jesus et kabaliksan ton tinmunda la so panagsigay ed totoo? Saray tinmumbok ya agawa so angiter na ebat.
Panagsigay ed Dayat na Katooan
11, 12. Kayari inkioli to, anton milagro so ginawa nen Jesus nipaakar ed panagsigay?
11 Kayarin tuloy na impatey nen Jesus ed paway na Jerusalem tan inkioli to, saray babangatan so pinmawil ed Galilea. Aminsan pitora ed sikara so nanuulop diad asingger ed Dayat na Galilea. Inkuan nen Pedro a sikatoy onlan mansigay, tan arum so akiulop ed sikato. Singa gendat, sikara so nansigay ed labi. Diad tua, sanlabin impelag da lamet iray iket da ed dayat balet anggapoy asigay da. Et diad palbangon, sakey a piguran akaalagey ed pangdel so tinmawag ed sikara a manlapu ed danum: “Ugugaw, agta andian kayo na bengatlan naakan?” Inmebat iray babangatan: “Anggapo!” Kanian say akaalagey ed pangdel so angikuan ed sikara: “‘Ipelag yo so iket ed nikawanan na baloto et makaromog kayo.’ Kanian impelag da, balet agda la nayarian itan a goyoren lapud kinarakel na sirasira.”—Juan 21:5, 6.
12 Agaylan makapakelaw ya eksperiensia! Nayarin anonotan na saray babangatan so asasakbay a milagro nipaakar ed panagsigay, tan anggan panon et amoria na sakey ed sikara no siopa so piguran walad pangdel. “Saman a babangatan ya inadaro nen Jesus so angikuan ed si Pedro: ‘Sikato so Katawan!’ Kanian sanen nadngel nen Simon Pedro a sikato so Katawan, insulong to so kawes to, ta sikato so lakseb, tan tinmaboy ed dayat. Balet arum iran babangatan so dinmago ed melag a baloto, ta ag-ira arawi ed dalin, ngalngalin talonlasus piye lambengat ed kaarawi.”—Juan 21:7, 8.
13. Kayari intokotok nen Jesus ed tawen, anton internasyonal a programan panagsigay so ginmapo?
13 Antoy ipanengneng na sayan milagro? A say kimey na panagsigay ed totoo so agni asumpal. Nidanet iyan katuaan sanen amitlon danay ya inkuan nen Jesus ed si Pedro—tan ed amin a babangatan ed panamegley to—a pakanen iray karnero nen Jesus. (Juan 21:15-17) On, wala so programa na espiritual a panamakan ed arapen. Sakbay ya ompatey et impropesiya to: “Sayan maong a balita na panarian so nipulong ed amin a panaayaman a dalin a pantasi ed amin a nasyones.” (Mateo 24:14) Natan so panaon diad igapo na atan ya inmunan-siglon kasumpalan na propesiya. Saray babangatan to so ngalngalilan mangipelag na saray iket da ed dayat na katooan, tan saray iket so agnaandian na iyan.—Mateo 28:19, 20.
14. Diad anton dalan ya abendisyonan so panagsigay na saray babangatan nen Jesus diad saray taon sakbay na inkaderal na Jerusalem?
14 Sakbay a tinmokotok ed trono nen Ama to diad tawen, inkuan nen Jesus ed saray babangatan to: “Awaten yo so pakayari sano onsabi ed sikayo so masanton espiritu, tan magmaliw kayon tastasik namparan ed Jerusalem tan ed amin a Judea tan Samaria tan anggad kasampotan na dalin.” (Gawa 1:8) Sanen nikalbo so masanton espiritu ed saray babangatan nen Pentecostes 33 K.P., say baleg a kimey na espiritual a panagsigay so ginmapo ed sankamundoan. Dia lambengat ed agew na Pentecostes, talon libon kakamarerwa so asigay, tan ag-abayag kayari to “say bilang na totoo so nagmaliw a ngalngali liman libo.” (Gawa 2:41; 4:4) Say indaak so nantultuloy. Ibaga ed sikatayo na rekord: “Saray mananisia ed Katawan so nantultuloy a naaruman, dakerakel namparan ed lalaki tan bibii.” (Gawa 5:14) Ag-abayag, saray Samaritanos so kinmiwas ed maong a balita, tan kayarin tuloy et diad ag-agalsiman iran Hentil. (Gawa 8:4-8; 10:24, 44-48) Ngalngalin 27 taon kayari na Pentecostes, insulat nen apostol Pablo ed saray Kristianon taga-Colosas a say maong a balita so “nipulong ed amin a pinalsan walad leksab na tawen.” (Colosas 1:23) Malinew, saray babangatan nen Jesus so malaknab a nansigay manlapud danudanum na Galilea. Impelag daray iket da ed limog na saray Judios a nitaytayak ed Imperyo na Roma, ontan met ed singa agmabungan kadayatan na saray aliwan-Judion totoo. Tan saray iket da so apano. Parad saray pankaukolan na inmunan-siglon Kristianos, say propesiya nen Jesus ed Mateo 24:14 so asumpal sakbay ya aderal so Jerusalem nen 70 K.P.
Panagsigay ed Totoo diad “Agew na Katawan”
15. Diad libro na Apocalipsis, anton malaknab a kimey na panagsigay so nipropesiya, tan kapigan so nepeg a panumpal ed atan?
15 Anggaman kuan, malaknab ni so walad arapen. Diad ngalngalin kasampotan na inmunan siglo, impagamor nen Jehova ed mabilay nin unor ya apostol, si Juan, so pangiparungtal ed saray bengatlan nagawa legan na “agew na Katawan.” (Apocalipsis 1:1, 10) Sakey a matalonggaring a kabiangan et say pangipulong na maong a balita ed sankamundoan. Nabasa tayo: “Anengneng ko so sananey ya anghel a mantekkiab ed pegley-tawen, tan walad sikato so andi-anggaan a maong a balita pian iyabawag ed saramay manaayam ed dalin, tan ed balang nasyon tan tribu tan pansasalita tan totoo.” (Apocalipsis 14:6) Diad anghelikon panangiwanwan saray ariripen na Dios so literal a mangipulong na maong a balita diad amin a panaayaman a dalin, aliwa lambengat ed interon Imperyo na Roma. Sakey ya englobon kimey na panagsigay na kakamarerwa so nepeg a gawaen, tan anengneng na agew tayo so kasumpalan na atan a pasingawey.
16, 17. Kapigan so inggapo na saginonor-agew a kimey na espiritual a panagsigay, tan panon nen Jehova a benindisyonan itan?
16 Panon so panagsigay legan na sayan koma-20 siglo? Diad asasakbay et daiset lambengat iray sumisigay. Kayari impanampot na Guerra Mundial I, wala lambengat so ngalngali apatiran libo ya aktibon managpulong na maong a balita, maseseg a lalaki tan bibii a kaslakan et alanaan. Impelag daray iket da ed inerman a dalan ya inlukas nen Jehova, tan dakel a kakamarerwa so asigay. Kayari komaduan guerra mundial, nilukasan nen Jehova so balon danudanum a pansigayan. Saray misioneron nanaral ed Watchtower Bible School of Gilead so angiyuna na kimey ed dakel a daldalin. Saray bansan singa say Hapon, Italya, tan Espanya, a nen inmuna et singa agmabungan tuloy, so diad kaunoran et amawala na mayaman iran panagtipon na kakamarerwa. Agano ni et naaralan tayo met no panon kaaligwas so panagsigay ed Mamabukig a Europa.
17 Natan, diad dakel iran bansa et ngalngalilan napilat iray iket. Say baleg a panagtipon na kakamarerwa so nankaukolan ed pangorganisa na saray balon kongregasyon tan sirkito. Pian saraya so naabrasa, saray balon Kingdom Hall tan Assembly Hall so mabetbet a nipapaalagey. Kinaukolan iray dakel a mamatatken tan ministeryal ya ariripen a mangasikaso ed indaak. Sakey a mabiskeg a kimey so inggapo na saraman a matoor nen 1919. Diad literal a dalan et asumpal so Isaias 60:22. ‘Say melag so magmaliw a sanlibo,’ unong a saraman ya apat a libon sumisigay so natan et nagmaliw a masulok ya apatiran laksa. Tan aliwan nin anggaan.
18. Panon tayon naalig so maabig ya ehemplo na saray inmunan-siglon espiritual a sumisigay na totoo?
18 Anto so kabaliksan na sayan amin ed sikatayo bilang indibidual? Ibaga na kasulatan a sanen si Pedro, Andres, Santiago, tan Juan so naimbitaan a magmaliw a sumisigay na totoo, “sikara . . . so anaynan ed amin tan tinumbok da si [Jesus].” (Lucas 5:11) Agaylay abig ya ehemplo na pananisia tan dedikasyon! Kasin nabayuboan tayo so parehon espiritu na dilin-panagsakripisyo, parehon inkamaparaan pian lingkoran si Jehova ed anggan anton nagawa? Nilaksa so inmebat a nayarian da. Nen inmunan siglo, saray babangatan so nansigay na totoo ed inerman ya abuloyan nen Jehova. Balanglan ed limog na saray Judios odino Hentiles, sikaray andi-baraan a nansigay. Manpulong itayo met komon ed amin ya andian na inkamasuyat odino panangibiig.
19. Anto so nepeg tayon gawaen no say danudanum a pansisigayan tayo et aliwan mabunga?
19 Anggaman kuan, anto no aliwan mabunga so peles a teritorya yo? Agnadidismaya. Tandaan, pinano nen Jesus iray iket na saray babangatan kayari sanlabin impansigay dan andian na resulta. Pareho met so nayarin nagawa ed espiritual a paraan. Alimbawa, diad Ireland saray matoor a Tastasi so nansagpot ed loob na dakel iran taon tekep na ageteran iran resulta. Ingen, agano ni et anguman itan. Ireport na 1991 Yearbook of Jehovah’s Witnesses a diad sampot na 1990 serbisyon taon, nangayagaan na Ireland so 29 nantutumbokan iran pantok! Nasabi panaon et nayarin mipadpara so pawalaen na teritorya yo. Legan ya iyabuloy nen Jehova, mantultuloy a mansigay!
20. Kapigan so nepeg a pibiang tayo ed panagsigay na totoo?
20 Diad Israel, saray sumisigay so onlan mansigay no labi, sano balang sakey et maikeb tan komportable ed dokolan. Sikaray linma, aliwan sano kumbiniente ed sikara, noagta sano makasigay ira na dakel a sira. Nepeg ya aralen tayo met so teritorya tayo pian makapansigay itayo, a singa panangibaga, sano kaslakan a totoo et walad abung tan matinonos ya ontalineng. Saya so nayarin diad labi, diad saray sampot-simba, odino diad arum nin panaon. Anggan kapigan itan, gawaen tayo komon so amin a nayarian tayo pian anapen iray maptek-impanpuson totoo.
21. Anto so nepeg tayon tandaan no say teritorya tayo so mabetbet lan nakimeyan?
21 Anto no say teritorya tayo et mabetbet a nakokobrian? Saray propesyonal a sumisigay ed mundo so mabetbet a manreklamo a saray pansisigayan da so alablabas lan atanek. Balet kasin alablabas a natanek so espiritual a pansisigayan tayo? Andin peteg! Dakel iran teritorya so amawala na indaak anggaman mabetbet lan akobrian. Arum so amawala na magmaong lapud kinimeyan a tuloy. Anggaman kuan, sano mabetbet a nadalaw iray kaabungan, seguroen a tuloy ya amin ya andi-ed-ayaman so ninota tan pitongtongan ed saginonor. Manaral na nanduruman tema parad tongtongan. Tandaan a walay sananey ya ondalaw lamet ed magano, kanian agbabayagen a tuloy so pansiansia yo odino agnaliklikas a pasanoken so unabong. Tan bayuboan iray abilidad yo diad panagtasi ed lansangan ontan met ed inpormal a panagtasi. Ipelag iray espiritual ya iket yo ed amin a pankanawnawa tan ed amin a posiblen paraan.
22. Anton engranden pribelihyo so napangayagaan tayo ed sayan panaon?
22 Tandaan, diad sayan panagsigay saray sumisigay tan saray sira so namparan nagunggunaan. No mansiansian malet iramay nasigay tayo, sikaray makapambilay na ando lan ando. Pinaseseg nen Pablo si Timoteo: “Mansiansia ka ed sarayan bengatla, ta diad panggawam ed saya nilaban mo so inkasika tan saramay ondengel ed sika.” (1 Timoteo 4:16) Si Jesus so inmunan angipasal ed saray babangatan to diad espiritual a panagsigay, tan sayan kimey so siansian gagawaen diad silong na panangiwanwan to. (Ipareng so Apocalipsis 14:14-16.) Agaylan engranden pribelihyo tayo so pankimey ed panangiwanwan to pian sumpalen itan! Komon ta pansiansiaen tayon akapelag iray iket tayo legan ya iyabuloy ni nen Jehova. Anto nin babaleg a kimey so posiblen wadtan nen say diad pansigay na kakamarerwa?
Kasin Nanonotan Yo?
◻ Anton kimey so impasal nen Jesus ed saray babangatan to a gawaen?
◻ Panon nen Jesus ya impanengneng a say espiritual a kimey na panagsigay so ag-angangga ed impatey to?
◻ Panon nen Jehova a benindisyonan so espiritual a kimey na panagsigay nen inmunan siglo?
◻ Anton mayaman a panagtipon na sira so agamoran legan na “agew na Katawan”?
◻ Bilang sinansakey panon so pagmaliw tayo a nagkalalon matalonan sumisigay na totoo?
[Litrato ed pahina 11]
Kayari inkioli nen Jesus, innatnat na saray apostoles to so madibinon kimey a panagsigay na totoo