Siopa so Makaliktar ed “Panaon na Gonigon”?

“Siopaman ya ontawag ed ngaran nen Jehova so nilaban naani.”​—JOEL 2:32.

1. Unong ed si Daniel tan Malaquias, antoray pakabidbiran ed saramay nilinya parad kilalaban legan na onsasabin “panaon na gonigon”?

MANIILALO ed agew tayo, insulat nen propetan Daniel: “Et wala naani sakey a panaon na gonigon a sikato so agni agawa nanlapulad inkiwala na nasyon anggad saman a panaon. Tan legan na atan a panaon say baley mo nilaban naani, balang sakey a naromog naani a nisulat ed libro.” (Daniel 12:1) Peteg a makaligliwa iran salita! Saray naabobonan a totoo nen Jehova so nanonotan to, unong ya iyaabawag met na Malaquias 3:16: “Saman la saramay tinmakot ed Jehova et nansasalita ra ed sakey tan sakey, ed balang kaulop to, et si Jehova tinmalineng tan dinmengel. Et sakey a libro a pakanodnonotan so sinulatan ed arap to nipaakar ed saramay tinmakot ed Jehova tan saramay sinononot ed ngaran to.”

2. Anto iray resulta diad pannonot ed ngaran nen Jehova?

² Say pannonot ed ngaran nen Jehova so mangipaarap ed suston pikakabat nipaakar ed sikato, say Kristo to, tan amin ya engranden gagala to ed Panarian. Kanian, naaralan na totoo ton sikato so respetoen, ya onloob ed maapit a dedikadon siglaotan ed sikato, tan sikato so arowen ‘ed amin a puso ra tan ed amin a pakatalos da tan ed amin a biskeg da.’ (Marcos 12:33; Apocalipsis 4:11) Ginawa nen Jehova so mabunlok a probisyon, diad panamegley na bagat nen Jesu-Kristo, pian naromog na saray mauyamo ed dalin so andi-anggaan a bilay. Kanian, saraya so nayarin sitatalek a mangiyaniweng ed saray salita na mangatatawen ya ehersitos ya angigalang ed Dios ed panaon na kiyanak nen Jesus, ya angikuan: “Gloria ed Dios ed sankatageyan tan dia ed dalin kareenan ed saray totoon abig-linawa.”​—Lucas 2:14.

3. Sakbay na isabi na kareenan ed sayan dalin, anton kiwas nen Jehova so nepeg a nagawa?

³ Atan a kareenan so mas asingger nen say iisipen na maslak a totoo. Balet onsabi nin ununa so kidapo na panangukom nen Jehova ed abulok a mundo. Iyaabawag na propeta ton Sofonias: “Say baleg ya agew nen Jehova so asingger. Sikato so asingger, tan masiglat a maomaong.” Anton nengneng na agew itan? Ituloy na propesiya: “Say tanol na agew nen Jehova so ampait. Say mabayani a laki onakis ya ampaipait a tuloy diman. Atan ya agew sikato so agew na sanok, agew na gonigon tan irap, agew na kabagbag tan pankibalatar, agew na bilunget tan udiem, agew a malurem tan makapal a bilunget, agew na tambuyog tan pangibalap na bakal sumpa ed saray syudad a kinutaan tan sumpa ed saray atagey a bakor. Et gonigonen ko naani iray totoo, et manakar ira naani a singa bulag a totoo; lapu ed nankasalanan ira a sumpa ed si Jehova.”​—Sofonias 1:14-17; nengnengen met so Habakuk 2:3; 3:1-6, 16-19.

4. Siopa natan iray onkikiwas ed imbitasyon a kabaten tan lingkoran so Dios?

⁴ Makapaliket, nilaksalaksa natan so oneebat ed imbitasyon a mangamta tan manlingkor ed Dios. Nipaakar ed alanaan iran Kristianos, a nitarok ed balon sipanan, et nipropesiyan: “‘Et sikara amtara ak naani, manlapu ed kamelagan ed sikara angga ed kabalbalgan ed sikara,’ kuan nen Jehova.” (Jeremias 31:34) Saraya so angipangulo ed modernon-agew a panagtasin kimey. Tan natan legan ya ondarakel ed alanaan a nakdaan so manusumpal ed mangaraldalin a kurang da, say “baleg ya ulop” na “arum a karnero” so pinmarungtal a ‘mangisaklang na sagradon lingkor ed Dios ed agew tan labi’ ed singa-templon oksuyan to. (Apocalipsis 7:9, 15; Juan 10:16) Kasin sakey kan mangagayaga ed sayan agnasukat a pribilehyo?

Panon ya Onsabi so “Kalikaliktan Iran Bengatla”

5, 6. Sakbay a namayegmeg iray amin a nasyones ed kadederal, anton manangiliktar a kimey so nagawa?

⁵ Onla itayo natan ed Aggeo 2:7, a ditan et impropesiya nen Jehova so nipaakar ed espiritual ya abung a panagdayewan to. Inkuanto: “Et pamayegmegen ko naani so saray amin a nayson, et saray kalikaliktan a bengatla na saray amin a nasyon onsabi ra naani; et panoen ko naani so sayan abung na gayaga.” Ipanengneng na saray propesiya na Biblia a say ‘panmayegmeg ed nasyones’ et manutukoy ed pangidapo nen Jehova na panangukom ed nasyones. (Nahum 1:5, 6; Apocalipsis 6:12-17) Sirin, say kiwas nen Jehova a nipropesiya ed Aggeo 2:7 so mamantok ed panmayegmeg na nasyones ed kaandi​—naderal. Balet anto met ed “saray kalikaliktan a bengatla ed amin a nasyones”? Kasin nakaukolan a manalagar ira ed atan a pinal a makaderal a panagmayegmeg pian niliktar ira? Andi.

⁶ Ibaga na Joel 2:32 a “siopaman ya ontawag ed ngaran nen Jehova so nilaban naani; ta dia ed palandey Sion tan diad Jerusalem wala naani so saray makaliktar, unong a sinalita nen Jehova, tan ed limog na saray niliktar, wala naani so saray tawagen nen Jehova.” Ibiig ira nen Jehova, tan ontawag ira ed ngaran to a tekep na pananisia ed bagat nen Jesus sakbay na kapantokan ya iyegyeg na baleg a kairapan. (Ipareng so Juan 6:44; Gawa 2:38, 39.) Makapaliket, say mablin baleg ya ulop, a manbilang la natan na masulok ya apatiran laksa, so ‘onloloob’ ed abung a panagdayewan ed si Jehova diad paniilalo ed ‘panmayegmeg [to] ed amin a nasyones’ diad Armagedon.​—Apocalipsis 7:9, 10, 14.

7. Anto so nalalanor diad ‘itawag ed ngaran nen Jehova’?

⁷ Panon ya ontawag irayan makaliktar ed ngaran nen Jehova? Iter ed sikatayo na Santiago 4:8 so sakey a pakapatnagan, ya angikuan: “Onsingger ed Dios, et sikato so onasingger ed sikayo. Linisan yo so limalima yo, sikayon managkasalanan, tan gogolan yo so kapusoan yo, sikayon manduwaruwa.” Singa ed alanaan a nakdaan ya angitonton ed dalan, saraman so manilalo a magmaliw a baleg ya ulop na saray makaliktar ed Armagedon so nepeg ya onkiwas a desidido. No ilaloan yo so niliktar, nepeg yo so uninom na managlinis a Salita nen Jehova tan iyaplika so matunong iran estandarte to ed bilay yo. Sikayo so nepeg a desido diad pangidedika ed bilay yo ed si Jehova, ya isimbolo iya diad bautismo ed danum. Say itawag yo ed si Jehova diad pananisia so mangilaktip met ed pantasi parad sikato. Kanian, diad Roma kapitulo 10, bersikulo 9 tan 10 et insulat nen Pablo: “No dia ed ‘sangim ipatuam’ si Jesus a sikato so Katawan, tan mangagamil na pananisia ed pusom a say Dios et pinaoli to ed saray inaatey, sika so nilaban. Ta say too sisiaen to ed puso to so katunongan, balet say sangi so mangggawa na panangipatua ya onkana ed kilalaban.” Insan, diad bersikulo 13, inaon na apostol so propesiya nen Joel, mangidadanet a “siopaman ya ontawag ed ngaran nen Jehova so nilaban.”

‘Anapen, Anapen, Anapen’

8. (a) Unong ed si propetan Sofonias, anto so kakaukolanen nen Jehova parad kilalaban? (b) Anton pasakbay so ipapasabi ed sikatayo na salitan “nayari” ed Sofonias 2:3?

⁸ Diad ibaling ed libro na Biblia a Sofonias, kapitulo 2, bersikulo 2 tan 3, nabasa tayo so kakaukolanen nen Jehova parad kilalaban: “Sakbay a say masebeg a sanok nen Jehova onsabi ed sikayo, sakbay a say agew na sanok nen Jehova onsabi ed sikayo, anapen yo si Jehova, sikayo ya amin a mauyamo ed dalin, ya angunor na saray dilin panguksoyan To. Anapen yo so inkatunong, anapen yo so kauyamoan. Nayari a sikayo naani niyamot dia ed agew na sanok nen Jehova.” Imanoen so salitan “nayari.” Aliwan kipapasen ya aminsan a nilaban, et lawas nilaban. Say kiyamot tayo ed atan ya agew so mandependi ed pantultuloy tayon panggawa ed sarayan taloran bengatla. Nepeg tayon anapen si Jehova, anapen so inkatunong, tan anapen so kauyamoan.

9. Panon so katumangan na saramay manaanap ed kauyamoan?

⁹ Peteg, a makapakelaw so tumang diad pananap na kauyamoan! Diad Salmo 37, bersikulos 9 ya anggad 11, nabasa tayo: “Saramay manalagar ed si Jehova tawiren da so dalin. Ta walani so daiset et say bagel onandi . . . Balet saray mauyamo a mismo tawiren da naani dalin, tan peteg manliket ira ed dilin inkadaakan na kareenan.” Tan anto met so nipaakar ed pananap na inkatunong? Sasalitaen na bersikulo 29: “Say matunong a mismo so manawir ed dalin tan sikaray manayam diman lawas.” No nipaakar ed pananap ed si Jehova, ibaga ed sikatayo na bersikulo 39 tan 40: “Say kilalaban na saray matunong sikato so manlapu ed si Jehova; sikato so biskeg da ed panaon na gonigon. Ta si Jehova tulongan tora tan iliktar tora. Iliktar to ra ed bagel tan ilaban tora, lapud nanmatalek ira ed sikato.”

10. Siopa so kabkabat ed panangikaindan dan mananap ed si Jehova tan mananap na kauyamoan?

¹⁰ Saray sekta na Kakristianoan so sinmaew a nananap ed si Jehova. Impulisay ni ingen na klero ra so mablin ngaran to, a sipapangtan angekal ed saya ed saray patalos na Biblia ra. Mas labay da nin dayewen so andian na ngaran a Katawan odino Dios tan galangen so paganon Trinidad. Niarum ni, ag-aanapen na Kakristianoan so inkatunong. Dakel ed saray patumbok to so angyadapta odino angiyalibansa ed malukak iran estiloy-panagbilay. Imbes ya anapen so kauyamoan a singa ginawa nen Jesus, nanggawa iray inkapasirayew, alimbawa ed telebisyon, na madarak tan mabetbet ya imoral a panagbilay. Patatabaen na saray klero so inkasikara diad nanaala ra ed saray pulok da. Diad saray salita na Santiago 5:5, sikara so “nanbilay ed saray liket dia ed dalin tan ed pilalawan.” Bangta manasingger so agew nen Jehova, maseguron tuloy a naromog dan saray impuyan a salita so onaplika ed sikara: “Saray kayamanan so andi kakanaan ed agew na sanok.”​—Uliran 11:4.

11. Siopa so too na kaugsan, tan panon so impanipon to na abalbaleg a kasalanan ed dala?

¹¹ Sanen inmunan siglo K.P., unong ya isasalaysay nen apostol Pablo ed komaduan sulat to ed saray taga-Tesalonica, arum iran Kristianos so aliketan, a nononoten dan say agew nen Jehova so diad saman et onsabi ed sikara. Balet impasakbay nen Pablo ya onsabi nin ununa so apostasya, tan “say too na kaugsan” so kaukolan a niparungtal. (2 Tesalonica 2:1-3) Natan, diad sayan koma-20 siglo, naimano tayo so inkalaknab na atan ya apostasya tan no panon inkauges so klero na Kakristianoan ed imaton na Dios. Legan na sarayan kaunoran ya agew nanlapulad 1914, say klero so nantipon na abalbaleg a kasalanan ed dala diad ‘pangiyaalibansa na bakal.’ (Joel 3:10) Intultuloy da met ya ibangat so palso iran doktrina, a singa say ag-ompatey a kamarerwa na too, purgatoryo, panamairap ed impiernon-apuy, bautismo na kapanyanak, say Trinidad, tan mipadpara iran bengatla. Iner so talindegan da sano idapo nen Jehova so panangigeter to? Ikuan na Uliran 19:5: “Say manbitla na saray tila so agmakatainan.”

12. (a) Antoray atooan a “katawenan” tan “dalin” ya asingger lan naderal? (b) Anto so naaralan tayo ed onsasabin kadederal na sayan mauges a mundo?

¹² Diad 2 Pedro 3:10, nabasa tayo: “Say agew nen Jehova so onsabi a singa matakew, a dia ed atan saray tawen mangangga ra a pati baleg ya ungol, ta saray elementos natunaw ed manliob a petang, tan say dalin tan saray gawa a wala ed sikato napoolan ira.” Say abulok iran uley a sigpot a manasakbong ed totoo a singa katawenan, a tekep na amin iran elementos a manitibukel natan na akusbon sosyedad na too, so napunas manlapud dalin na Dios. Saray managgawa tan negosyante na makaderal a tuloy iran ayura, managswitik, mansimpisimpitan iran relihyonista tan klero ra, manangiyalibansa na kaugsan, karawalan, tan krimen​—amin na saraya so naandi. Sikara so natunaw ed sanok nen Jehova. Balet diad bersikulo 11 tan 12, inyarum nen Pedro iyan pasakbay ed saray Kristianos: “Lapud sarayan amin a bengabengatla so naderal naani, anton nengneng na inkatoo so nepeg yon pagmaliwan ed amin a masantos a panagbilay tan saray gawa na maridios a debosyon, ed panalagar tan panpilalek yo ed isabi na agew nen Jehova.”

Onkiwas La Si Miguel!

13, 14. Siopa so baleg a Manangiyalangon ed uley nen Jehova, tan panon a sikato so aktibo nanlapulad 1914?

¹³ Panon so kiliktar na siopaman legan na “panaon na gonigon” nen Jehova? Say Ahente na Dios ed pangitarok na kililiktar et si Miguel arkanghel, a say kabaliksan na ngaran to et “Siopa So Mipara’d Dios?” Sirin, matukotukoy a sikato so Sakey a mangiyalangon ed uley nen Jehova, a mangitandoro ed si Jehova a bilang say mogmon tuan Dios tan manepeg a Soberanon Katawan na amin a talba.

¹⁴ Agaylan makatantanda iray ebenton dedeskribien na Apocalipsis kapitulo 12, bersikulo 7 ya anggad 17, nipaakar ed “agew na Katawan” nanlapulad 1914! (Apocalipsis 1:10) Say arkanghel a si Miguel so angibasileng ed sumusumpan Satanas manlapud tawen diad dalin. Saginonor, unong ya adeskribe ed Apocalipsis 19, bersikulo 11 ya anggad 16, say sakey ya atawag a “Matoor tan Matua” so ‘mangigatin ed darapilan na alak na petang tan say sanok na Dios a Makapanyarin-amin.’ Sayan makapanyarin mangatatawen a bumabakal so angaranan ya “Ari na saray arari tan Katawan na kakatawan.” Kaunoran, say Apocalipsis 20, bersikulo 1 tan 2, so mangibabaga ed baleg ya anghel ya angibasileng ed si Satanas ed kalinsurong tan ikulong to diman ed sanlibon taon. Mapatnag, amin na sarayan kasulatan so mangipaarap ed sakey a Manangiyalangon ed inkasoberano nen Jehova, say Katawan a Jesu-Kristo, ya impasen nen Jehova ed maglorian mangatatawen a trono to nen 1914.

15. Diad anton nikaduman dalan a si Miguel et asingger lan “ontalindeg”?

¹⁵ Si Miguel so “akatalindeg” la, unong ya abitla ed Daniel 12:1, diad biang na totoo nen Jehova nanlapulad inkipasen to a bilang Ari nen 1914. Balet agmabayag si Miguel so “ontalindeg” ed nikadkaduman tuloy a pantalos​—bilang Ahente nen Jehova a mangekal na amin a kaugsan diad dalin tan bilang Manangiliktar ed sankagloboan a sosyedad na totoo na Dios. Say kabaleg na atan a “panaon na gonigon” so ipaparungtal ed saray salita nen Jesus ed Mateo 24:21, 22: “Tan wala naani baleg ya irap ya agnin balot agawa nanlapud gapo na mundo ya angga ed natan, anggapo, anggapo la naani. Diad tua, no ag-apatikeyan iratan ya agew anggapo komon naani laman a nilaban; balet nisengeg ed saray pinili napatikeyan so saratan ya agew.”

16. Anton laman so niliktar legan na baleg a kairapan?

¹⁶ Agaylan maliket itayo ya arum a laman so nilaban ed atan a panaon! Andi, aliwan singa rebelyoson Judios ya asikup ed Jerusalem nen 70 K.P., ya arum ed sikara so inawit a bilang ariripen ed Roma. Imbes, saraman so makaliktar ed “panaon na anggaan” so singa say Kristianon kongregasyon a binmatik la ed Jerusalem sanen ginmapo so kaunoran ya inlusob. Sikara so magmaliw a dilin totoo na Dios, saray nilaksa ed baleg ya ulop a pati ed siopaman ed saray alanaan a siansian wadia ni ed dalin. (Daniel 12:4) Say baleg ya ulop so “pinmaway ed baleg a kairapan.” Akin? Lapud “inurasan da so kawekawes da tan pinaputi ra ed dala na Kordero” Aagamilen da so pananisia ed pakayari na dondon na niibung a dala nen Jesus tan idemostra itan a pananisia diad sitotoor a panlilingkor ed Dios. Anggan natan, si Jehova, “Samay akayurong ed trono,” so mangibubuskag ed mananalimbeng a tabernakulo to ed sikara, bangta say Kordero, si Kristo Jesus, so mamapastol tan mangiwawanwan ed sikara ed saray subol na danudanum na bilay.​—Apocalipsis 7:14, 15.

17. Panon a say baleg ya ulop so nagkalautlan apaseseg ya onkiwas ta pian niyamot legan na onsasabin agew na gonigon?

¹⁷ Diad pananap ed si Jehova, inkatunong, tan kauyamoan, saray nilaksan baleg ya ulop so nepeg ya agmangiyabuloy ya ombetel so ununan aro ra ed katuaan! No sakey kayo ed sarayan malakarneron totoo, anto so nepeg yon gawaen? Unong a sinalita ed Colosas kapitulo 3, bersikulo 5 ya anggad 14, nepeg yon sigpot a “lakseben so toon daan a pati saray gawa to.” Diad pananap ed madibinon tulong, panggunaetan so “pangisulong yo ed inkasikayo na balon inkatoo, a niletneg ed suston pikakabat. Diad kauyamoan, ipaalagey tan pansiansiaen so seseg diad pangidayew ed si Jehova tan diad pangipakabat ed arum na saray engraden gagala to. Sirin, niyamot kayo ed “panaon na gonigon,” say agew na “masebeg a sanok nen Jehova.”

18, 19. Diad anton pamaakaran a say panagsungdo so magmaliw a makana parad kilalaban?

¹⁸ Asingger la itan ya agew! Mapmaples a mamaarap ed sikatayo. Say panipon ed saray sinansakey ed baleg ya ulop so nagagawa la natan ed loob na 57 taon. Dakel ed saraya so inatey la tan manaalagar ed kioli ra. Balet sikatayo so papaseguroan na propesiya na Apocalipsis a bilang sakey a grupo say baleg ya ulop so ompaway ed baleg a kairapan a bilang say sentro na sakey a sosyedad a “balon dalin.” (Apocalipsis 21:1) Kasin wadman kayo? Posibli itan, ta ikuan nen Jesus ed Mateo 24:13: “Say misungdo angga ed kasampotan sikato lamlamang so nilaban naani.”

¹⁹ Saray desdes a naeeksperiensia na saray totoo nen Jehova ed sayan daan a sistema so mantultuloy ya ondaak. Tan sano onterak so makapagonigon a baleg a kairapan, nayarin nasagmak yo so saray kairapan. Balet mansiansia maapit ed si Jehova tan ed organisasyon to. Mansiansian sililiing! “‘Mansiansia kayon manalagar ed siak,’ so kuan nen Jehova, ‘angga ed agew na iyaalagey ko a mansamsam, ta say panangigeter ko ed sikato et say panipon ed saray nasyon, pian tiponen koray panarian, pian ikalbok ed sikara so sanok ko, amin a masebeg a sanok ko; ta say amin a dalin naakmon naani ed apuy na imon ko.’”​—Sofonias 3:8.

20. Legan a manasingger lan tuloy so kapantokan a “panaon na gonigon,” anto so nepeg tayon gawaen?

²⁰ Parad salimbeng tan panamaseseg ed sikatayo, siaaro si Jehova ya angitarya ed totoo to na “sakey a puron lenguahe,” a mangilaktip ed engranden mensahe ed onsasabin Panarian to, “ta pian sikaran amin et ontawag ed ngaran nen Jehova, ta pian manlingkor ira ed sikaton benebenek.” (Sofonias 3:9) Legan a mapmaples a manasingger so kapantokan a “panaon na gonigon,” manlingkor itayo komon a tekep na seseg, a tulongan iray arum a mauyamon ‘ontawag ed ngaran nen Jehova’ parad kilalaban.

Kasin Nanonotan Yo?

◻ Anton kiwas nen Jehova so ununa sakbay ed pangitarok na kareenan ed dalin?

◻ Unong ed si Joel, anto so nepeg a gawaen na sakey ta pian nilaban?

◻ Unong ed si Sofonias, panon a naromog na saray mauyamo so salimbeng ed ampetang a sanok nen Jehova?

◻ Siopa so “too na kaugsan,” tan panon so impantipon to na kasalanan ed dala?

◻ Panon kaimportante so sungdo ed pamaakaran na kilalaban?