Mansiansian Aliing ed “Panaon na Anggaan”
“Mansiansian manbantay, mansiansian aliing, ta agyo amta no kapigan so aturon panaon.”—MARCOS 13:33.
1. Panon so nepeg ya ikiwas tayo unong a niparungtal so makapakigtot iran ebento ed sayan “panaon na anggaan”?
UNONG a nipaparungtal so makapakigtot iran ebento ed sayan “panaon na anggaan,” panon so nepeg ya ikiwas na saray Kristianos? (Daniel 12:4) Sikaray ag-atainan ed panduaruwa. Imbalikas nen Jesu-Kristo so propesiyan mankarga na atibkel a tandan nasusumpal ed sayan koma-20 siglo. Impasakbay to so dakel iran nengneng ya ananda ed sayan peryodo a nikadkaduma nanlapulad 1914. Lapud mikabisado ed propesiya nen Daniel nipaakar ed “panaon na anggaan,” pinatumbokan nen Jesus so dilin baleg a propesiya to diad impamaseseg ed saray babangatan ton “mansiansian aliing.”—Lucas 21:36.
2. Akin a wala so baleg a pankaukolan diad pansiansian aliing ed espiritual?
2 Akin a mansiansian aliing? Lapud saya so sankapeligroan a panaon ed awaran na too. Parad saray Kristianos say pakateglep ed espiritual diad sayan panaon so makadesyang. No magmaliw itayon mapaulian odino abuloyan so kapusoan tayon nabelatan na saray kapagaan ed bilay, niiyan itayo ed kaatapan. Diad Lucas 21:34, 35, pinasakbayan itayo nen Jesus: “Imanoen yo so inkasikayo pian saray puso yo so agbalot napano ed inkasiba tan panagbuanges tan saray kapagaan ed bilay, tan kasanlilikna atan ya agew so tampol ya onsabi ed sikayon singa patit. Ta onsabi itan naani ed saramay manaayam ed amin a dalin.”
3, 4. (a) Anto so labay ya ibaga nen Jesus diad impangikuan a say agew na sanok na Dios so tampol ya onsabi ed totoo “a singa patit”? (b) Lapud say Dios so agmangiletneg na say patit, akin ya atan ya agew so agnailaloan a manalona ed totoo diad inkalapagan?
3 Diad maabig a sengegan ya inkuan nen Jesus a say agew nen Jehova so ‘tampol ya onsabi ed sikatayon singa patit.’ Say sakey a patit so mabetbet ya akinlongan na kalot, tan uusaren itan diad pangerel na saray manok tan ayayep. Say patit so walaan na kablitan, tan siopaman a manakar ditan so napatir ed kablitan. Insan say patit so onkaput, tan say biktima so narel. Amin na saya so tampol a nagawa. Diad mipadparan nengneng, inkuan nen Jesus, saray inaktibo ed espiritual so nabigla tan natalonaan ed “agew na sanok” na Dios.—Uliran 11:4.
4 Kasin si Jehova a Dios so mangileletneg na patit ed totoo? Andi, agto aalagden so agnaaamtaan a pangerel ed totoo pian deralen ira. Ingen atan ya agew so onsabin bigla ed totoo diad inkalapagan lapud agda inikdan na manunan imano so Panarian na Dios. Linma ra ed dilin dalan da diad saray pangegemtan ed bilay, a mangipupulisay ed kabaliksan na saray nagagawad liber da. Anggaman kuan, saya so agmanguman ed eskedyul na Dios. Sikato so walaan na dilin nigeter a panaon parad pikuekuentaan. Tan, sipapangasi, agto intalirak so katooan ya agsikakabat ed onsasabin panangukom to.—Marcos 13:10.
5, 6. (a) Lapud onsasabin panangukom, anton maaron probisyon so ginawa na Manamalsa parad atooan iran pinalsa, balet tekep na anton inkalapagan a pansumpalan? (b) Anto so kunsideraen pian natulongan itayon mansiansian aliing?
5 Sayan pasakbay so sakey a maaron probisyon ed biang na baleg a Manamalsa, a sikatoy interesado ed pankaabigan na atooan iran pinalsa dia ed simbolikon gagatinan na sali to. (Isaias 66:1) Aasikasoen toray manaayam ed pasen ya asalitan gagatinan na salisali to. Kanian diad panamegley na saray embahador tan ibabaki to, papasakbayan to ra ed saray ebento ed arapen da. (2 Corinto 5:20) Ingen, anggaman ed amin a niiter a pasakbay, saraman ya ebento so onsabi ed atooan a pamilya bilang agnailaloan a singa nikutep ira ed sakey a patit. Akin? Lapud kaslakan a totoo so nanaugip ed espiritual. (1 Tesalonica 5:6) Diad pangipareng, melag lambengat a bilang so mangimano ed pasakbay tan makaliktar a mamaarap ed balon mundo na Dios.—Mateo 7:13, 14.
6 Sirin, panon itayon makapansiansian aliing diad sayan panaon na anggaan pian nibilang ed limog na saramay niliktar naani? Itatarya nen Jehova so nakaukolan a tulong. Imanoen tayo pa so pitoran bengatlan nagawaan tayo.
Labanan so Panagsigensigen
7. Anton pasakbay nipaakar ed panagsigensigen so inter nen Jesus?
7 Ununa, nepeg tayon labanan so panagsigensigen. Diad Mateo 24:42, 44, inkuan nen Jesus: “Kanian manpuyat kayo, ta agyo amta no anton agew so isabi na Katawan yo. Nisengeg ed saya paneknekan yo met so inkasikayon akaparaan, ta diad oras ya agyo isisipen, onsabi ed sikayo so Anak na too.” Say lenguahen inusar dia nen Jesus so mangipanengneng a diad sayan maatap a panaon, wala so baleg a panagsigensigen, tan say panagsigensigen so mangipaarap ed kadederal. Diad agew nen Noe dakel iran bengatla so nanggawa ed totoon okupado. Bilang nansumpalan, saray totoon asigensigen so “ag-angimano” ed nagagawa, tan sikaran amin so inyanor na Delap. Mitunosan, impasakbay nen Jesus: “Ontan naani so kiwawala na Anak na too.”—Mateo 24:37-39.
8, 9. (a) Panon a saray ordinaryon gegemtan ed bilay so mapeligron manigensigen ed sikatayo? (b) Antoran pasakbay so iter nen Pablo tan Jesus ed sikatayo?
8 Tandaan met, a diad pasakbay to ed Lucas 21:34, 35, sisingbaten nen Jesus iray ordinaryon nengneng na bilay, a singa say panangan, kakainum, tan saray kapagaan diad panag-anap na pambilay. Saratan a bengatla so kaslakan ed amin a totoo, a pati ed saray babangatan nen Katawan a Jesus. (Ipareng so Marcos 6:31.) Sarayan bengatla so nayarin agmakapasakit a mismo, balet no naabuloyan, sikaray makasigensigen ed sikatayo, manggawad sikatayon okupado, tan sirin et mangipaarap ed sikatayo diad maatap a pakateglep ed espiritual.
9 Sirin, agtayo papaulian so bengatlan sankaimportantian—say igamor na madibinon panangabobon. Imbes a nikutep ed saray ordinaryon bengatla ed bilay, saratan so usaren tayo lambengat ed ageteran a laknab a nakaukolan a manustuni ed sikatayo. (Filipos 3:8) Agda nepeg ya ipaliis iray intereses na Panarian. Unong ya ibabaga na Roma 14:17, “say panarian na Dios so agmankabaliksan na panangan tan kakainum, noagta kabaliksan to so inkatunong tan kareenan tan gayaga a tekep na masanton espiritu.” Nonoten iray balikas nen Jesus sanen inkuanto: “Itultuloy yo sirin ya anapen ya ununa so panarian tan say inkatunong to, tan amin na sarayan bengatla so niarum naani ed sikayo.” (Mateo 6:33) Niarum ni, inyabawag nen Jesus ed Lucas 9:62: “Anggapo so toon angiyan na lima to ed araro tan onlingaw ed saray bengatla ed benegan so makana ed panarian na Dios.”
10. Anton kapeligroan so niwala no agtayo pansiansiaen iray mata tayon akanengneng a maptek ed kalat?
10 Bektan ginmapo itayon manbaka, diad piguratibon panagsalita, so nepeg itayon mansiansia ed maptek a gulis. Say dumaralos ya onlingaw ed beneg so agmakabaka na maptek a dasig. Sikato so nasigensigen tan magmainomay ya onkasipa odino mantunda diad arum a samben. Ag-itayo magmaliw a singa say asawa nen Lot, a linmingaw ed beneg tan agbalot akaliktar. Nepeg tayon pansiansiaen iray mata tayon akanengneng a maptek ed kalat. Pian nagawaan itan nepeg tayon labanan so panagsigensigen.—Genesis 19:17, 26; Lucas 17:32.
Manpikasin Sankaseetan
11. Anto so indanet nen Jesus kayari impamasakbay ed sikatayo ed kapeligroan na kasigensigen?
11 Anggaman kuan, wala so nagkalalon nagawaan tayo pian makapansiansian aliing. Say komaduan importanten bengatla et say: Manpikasin sankaseetan. Kayari impamasakbay ed sikatayo a sumpad kasigensigen ed saray ordinaryon gegemtan ed bilay, inter nen Jesus iyan simbawa: “Kanian, manpuyat kayo ed amin a panaon a mikasi kayo pian ontalona kayo a nilaban ed sarayan amin a bengatlan nagawa, tan diad italindeg ed arap na Anak na too.”—Lucas 21:36.
12. Anton nengneng na pikakasi so nakaukolan, tan tekep na anton pansumpalan?
12 Kanian, nepeg itayon manggawa na lawas pikekerew nipaakar ed kaatapan na kipapasen tayo tan say pankaukolan tayon magmaliw ya alerto. Kanian sipipikasin onasingger itayo ed Dios tekep na sankaseetan iran kerew. Ikuan nen Pablo ed Roma 12:12: “Mansiansian malet ed pikakasi.” Tan diad Efeso 6:18, nabasa tayo: “Diad amin a nengneng na pikakasi tan pikekerew . . . , mansiansia ed pikakasi diad amin a panaon diad espiritu. Nisengeg ed atan mansiansian aliing tekep na amin ya inkaseet.” Saya so aliwa lambengat a pamaakaran na panagpikasin singa nibanbanan bengatla ya agtanton importante. Say mismon kiwawala tayo so walad kapeligroan. Kanian nakaukolan tayo so onasingger a siseseet parad madibinon tulong. (Ipareng so Hebreos 5:7.) Diad ontan napansiansia tayo so inkasikatayo ed dapag nen Jehova. Anggapo la so nagkalalon makagungguna diad panulong ed sikatayon manumpal ed saya nen say ‘panpikasi [tayo] ed amin a panaon.’ Sirin pansiansiaen itayo nen Jehova diad kipapasen na inkaliing. Kanian, agaylan importante so panseet ed pikakasi!
Mansiansian Maapit ed Organisasyon na Dios tan ed Kimey To
13. Anton nengneng na pililimog so nakaukolan pian makapansiansian aliing?
13 Kaliktan tayon naliktaran irayan amin a bengatlan onsabi ed mundo. Kaliktan tayo so ontalindeg ed arap na Anak na too, a walaan na panangabobon to. Nisengeg ed saya wala so komatlon bengatlan nagawaan tayo: Mansiansian malet ed teokratikon organisasyon nen Jehova. Nakaukolan tayo so sigpot a milimog ed atan ya organisasyon tan mibiang ed saray aktibidades to. Diad onian paraan ag-itayo nalingon mangipabidbir ed inkasikatayo a bilang aliing iran Kristianos.
14, 15. (a) Say pibiang ed anton kimey so ontulong ed sikatayon mansiansian aliing? (b) Siopa so manetermina no kapigan so kasumpal na panagpulong a kimey, tan panon so nepeg a liknaan tayo nipaakar ed atan? (c) Kayari na baleg a kairapan, anto so natebek tayo sano onlingay itayo ed agawaan a panagpulong na Panarian?
14 Say komatlon bengatla a makatulong ed sikatayon mansiansian aliing so maapapit a mikonektaan. Nepeg a wala itayo ed limog na saramay mamapasakbay ed totoo diad onsasabin anggaan na sayan sistema na bengabengatla. Say sigpot ya anggaan na sayan daan a sistema na bengabengatla so agnagawa anggad “sayan maong a balita na panarian” so nipulong ed laknab ya ingagala na Dios a Makapanyarin-amin. (Mateo 24:14) Aliwan saray Tasi nen Jehova so manetermina sano kapigan so kasumpal na panagpulong a kimey. Inggana nen Jehova itan a pankanepegan ed inkasikato. (Marcos 13:32, 33) Anggaman ontan, determinado itayon mankimey ya impasya tan anggad nakaukolan diad pangipulong nipaakar ed sankaabigan a gobiernon nagamoran na katooan, say Panarian na Dios. Say iterak na “baleg a kairapan” so onsabi legan a sikatayo so mibibiang ni ed sayan kimey. (Mateo 24:21) Kaleganan na amin ya arapen a panaon, nayarian na saray niliktar so onlingay ed abenegan tan impapuson mamekder a si Jesu-Kristo so aliwan palson propeta. (Apocalipsis 19:11) Say panagpulong a kimey so nasumpal naani diad laknab a babaleg a tuloy nen say iilaloan na saray mibibiang ed atan.
15 Matukoy, diad makatantandan panaon sano sayan kimey so nasumpal diad dilin kapenek na Dios, mas dakel a totoo so nayarin mibiang ed atan nen say diad dinanman ya apalabas a panaon. Agaylan misalamat itayon nawalaan na pibibiang ed sayan engranden kimey! Papaseguroan itayo nen apostol Pedro a si Jehova et “agto pilalek so siopaman a naderal noagta pilalek ton amin et magbabawi.” (2 Pedro 3:9) Kanian, say aktibon puersa na Makapanyarin-amin a Dios so onkikiwas natan a mabibiskeg nen diad kapiganman, tan pilalek na saray Tasi nen Jehova so mantultuloy ed sayan papakiwasen-na-espiritun kimey. Kanian mansiansian maapit ed organisasyon nen Jehova, tan magmaliw ya okupado ed mapublikon ministeryo to. Saya so sakey a katulongan ed pansiansia yon aliing.
Gawaen so Dilin-Panangusisa
16. Akin a nepeg tayon gawaen so dilin-panangusisa ed peles ya espiritual a kipapasen tayo?
16 Wala so komaliman bengatlan nagawaan tayo pian makapansiansian aliing. Balang sinansakey, nepeg tayon gawaen so dilin-panangusisa ed peles a kipapasen tayo. Saya so matukoy natan nen say diad kapiganman ya apalabas. Nakaukolan tayon paneknekan no siopan dapag so mabiskeg ya akatalindegan tayo. Diad Galacia 6:4, inkuan nen Pablo: “Balang sakey et paneknekan to komon so dilin gawa to.” Manggawa na dilin-panangusisa a mitunosan ed saray balikas nen Pablo diad 1 Tesalonica 5:6-8: “Ag-itayo naugip a singa gawaen na saray arum, noagta mansiansia itayon aliing tan mandangka. Ta saramay naugip et naugalian da so naugip ed labi, tan saramay abuanges so gendat a manbuanges ed labi. Balet no diad sikatayon kien na agew, mandangka itayo tan ikawes so kinlong na pananisia tan aro tan bilang takuko et say ilalo ed kilalaban.”
17. Sano manggawa na dilin-panangusisa, antoran tepet so nepeg tayon itepet ed inkasikatayo?
17 Kumosta itayo? Sano usisaen tayo so inkasikatayo unong ed liwawa na Kasulatan, kasin nanengneng tayo a sikatayo so mansiasiansian sililiing, a walaan na ilalo ed kilalaban a pinagkatakuko? Kasin sikatayo so totoon positibon angisian la ed inkasikatayo manlapud daan a sistema na bengabengatla tan angipulisay la ed saray ideya to? Kasin sikatayo so peteg a walaan na espiritu na balon mundo na Dios? Sikatayo ta so sigpot ya alerto no nipaakar ed arapen na sayan sistema? No ontan, ag-itayo natalonaan na agew nen Jehova a singa sikatayo so matakew.—1 Tesalonica 5:4.
18. Anton kaaruman iran tepet so nayarin nakaukolan ya itepet tayo ed inkasikatayo, tan diad anton pansumpalan?
18 Anggaman kuan, anto no say dilin-panangusisa tayo et ipatnag ton manggugunaet itayon mangiletneg na marakep, mainomay, komportable, mainawan dalan na panagbilay? Anto no nalmoan tayon saray espiritual a mata tayo so manteglep tan makakaugip? Kasin wala itayo ed kipapasen na pankukugip, a manguusil ed arum a minumundon pantasya? No ontan, sirin onliing itayo la!—1 Corinto 15:34.
Dalepdepen Iray Asumpal lan Propesiya
19. Antoray arum a propesiyan anengneng tayon asumpal?
19 Onla tayo natan ed komanem a bengatlan ontulong ed sikatayon mansiansian aliing: Dalepdepen so dakel iran propesiyan nasusumpal ed sayan panaon na anggaan. Alabsanan tayo la so koma-77 taon nanlapulad impangangga na aturon panaon na nasyones nen 1914. Diad inengneng tayo ed abenegan a masulok a kakatlo na sakey a siglo, nanengneng tayo no panon so nantutumbokan ya inkasumpal na propesiya—say inkipawil na tuan panagdayew; say inkiliktar na alanaan a nakdaan, a pati kakaiba ra, diad espiritual a paraiso; say panagpulong na maong a balita na Panarian diad englobon eskala; say impatnag na baleg ya ulop. (Isaias 2:2, 3; kapitulo 35; Zacarias 8:23; Mateo 24:14; Apocalipsis 7:9) Agawa so panangitandoro ed baleg a ngaran nen Jehova tan sankatalbaan ya inkasoberano, ontan met ed idaraak na daiset pian magmaliw a sanlibo tan say melag pian magmaliw a mabiskeg a nasyon, a pepelesen nen Jehova diad panaon to. (Isaias 60:22; Ezequiel 38:23) Tan saray pasingawey nen apostol Juan ed salaysay na Apocalipsis so manasingger la natan ed pantok to.
20. Anton kumbiksion so ipapanabang na saray Tasi nen Jehova, tan anto so peteg a paneknekan da?
20 Kanian, nagkalalo nen say kapiganman, mabiskeg a kumbinsido iray Tasi nen Jehova diad inkasusto na pakatalos da ed kabaliksan na saray kurang na mundo nanlapulad 1914. Diad impakawalaan na ontan a kumbiksion, pinaneknekan dan sikara so instrumento ed saray lima na Sankatagyan a Dios. Sikara so angipiaan a mangipasabi na madibinon mensahe diad sayan makatantandan panaon. (Roma 10:15, 18) On, saray balikas nen Jehova parad panaon na anggaan so tinmua. (Isaias 55:11) Kanian, saya so nepeg a mamaliing ed sikatayon mantultuloy anggad nanengneng tayo so pinal a pakagamor ed amin iran sipan na Dios diad panamegley nen Jesu-Kristo.
Say Kilalaban So Mas Asingger Nen Say Sanen Nagmaliw Itayon Mananisia
21. Anton komapiton tulong diad pansiansian aliing so walad sikatayo?
21 Kaunoran, say komapiton tulong diad pansiansia tayon aliing: Lawas tandaan a say kilalaban tayo so mas asingger nen say sanen inmunan nagmaliw itayon mananisia. Mas importante, say kialangon na sankatalbaan ya inkasoberano nen Jehova tan say kapasantos na ngaran to so asingsingger lan tuloy. Kanian say pankaukolan ed pansiansian aliing so nagkalautlan maganat. Insulat nen apostol Pablo: “Kabat yon totoo so panaon, ya oras la pian onliing kayo ed ugip, ta natan mas asingger ed sikatayo so kilalaban nen say sanen inmunan impanisia tayo. Say labi aralem la; say agew asingger la.”—Roma 13:11, 12.
22. Panon a say kinaasingger na kilalaban tayo so nepeg a mangapekta ed sikatayo?
22 Diad panasingger a tuloy na kilalaban tayo, nepeg tayo so mansiansian aliing! Agtayo nepeg ya abuloyan so antokaman odino minumundon intereses a manalona ed panamabli tayo ed gagawaen nen Jehova parad totoo to legan na sayan panaon na anggaan. (Daniel 12:3) Nepeg tayon ipanengneng so mas nagkalalon inkaseet pian ag-itayo nipaliis manlapud dalan a malinew ya igaganggan na Salita na Dios parad sikatayo. (Mateo 13:22) Malinew ya ipapanengneng na ebidensya a sayan mundo so wala la ed kaunoran iran agew to. Agmabayag sikato so napurak ed kiwawala diad ando lan ando a sublayan na balon mundo na inkatunong.—2 Pedro 3:13.
23. Diad anton paraan a sikatayo so tulongan nen Jehova, tan diad anton abendisyonan a pansumpalan?
23 Kanian, mansiansia itayon aliing ed amin a pamaakaran. Nagkalautla, magmaliw ya alerto no iner so pankukurangan tayon panaon. Tandaan, si Jehova so agbalot naugip ed sayan pamaakaran. Imbes, lawas tulongan to itayon mansiansian aliing ed sayan panaon na anggaan. Say labi aralem la. Say agew manasingger la. Kanian mansiansian aliing! Agmabayag naeksperiensia tayo so sankarakpan ed amin iran agew, unong a sumpalen na Mesianikon Panarian so gagala nen Jehova diad dalin!—Apocalipsis 21:4, 5.
Antoray Ebat Yo?
◻ Anto so labay ya ibaga nen Jesus sanen inkuanton say agew na sanok na Dios so onsabi ed totoo “a singa patit”?
◻ Akin a nepeg tayon labanan so panagsigensigen, tan panon tayon nagawaan itan?
◻ Anton nengneng na pikakasi so nakaukolan pian makapansiansian aliing?
◻ Anton nengneng na pililimog so makana?
◻ Akin a gawaen so dilin-panangusisa ed espiritual a kipapasen tayo?
◻ Anton betang so kanaan na propesiya diad pansiansia tayon aliing?