Imburi Diad Abung nen Caifas

Nen inerel si Jesus diad hardin na Getsemani, sikatoy tinaynan na saray apostol tan batik ira. Balet, ag-intuloy na duara so ontaynan. Saraya et si Pedro “tan sakey nin disipulo,” a mapatnag a si apostol Juan. (Juan 18:15; 19:35; 21:24) Ompan nabotan da ni Jesus nen inawit ed si Anas. Sanen impaiyakar nen Anas si Jesus ed Atagey a Saserdoten si Caifas, manumtumbok ed bandad arawi si Pedro tan Juan. Nayarin nankaduay liknaan da, a natatakot ira ompan pateyen da ra balet mapaga met ira no antoy nagawad Katawan da.

Kabat na atagey a saserdote si Juan kanian akaloob ed sular na abung nen Caifas. Si Pedro et wala labat ed paway, dimad puerta, anggad pinmawil si Juan tan akitongtong ed biin lingkor, a bantay na puerta. Insan inabuloyan ya onloob si Pedro.

Ambetel ed saman a labi, kanian namparlang na apoy iramay wadmad sular pian mandangdang ira. Akiyurong si Pedro ed sikara pian napetangan legan a manaalagar “pian nanengneng toy pansumpalan” na bista ed si Jesus. (Mateo 26:58) Maliwliwaway apoy kanian si Pedro et alupaan na samay bantay na puerta ya amaloob ed sikato. Tinepet to: “Agta sakey ka met ed saray disipulo na saman a too?” (Juan 18:17) Tan aliwan sikato labat so akabidbir ed si Pedro tan angibagan sikatoy kaiba nen Jesus.​—Mateo 26:69, 71-73; Marcos 14:70.

Aburidon maong si Pedro. Sinali toy agmanpaimano, ya pinmaway ni ingen diad asingger ed puerta. Kanian imburi nen Pedro ya kaiba toy Jesus, a kuan to: “Agko kabat itan a too, tan agko amta ’tay ibabagam.” (Marcos 14:67, 68) Sikatoy “nansamba” met, a labay ton ibaga et mabulos ton sinambaan a tua iray ibabaga to tan no andi et akoen toy dusa.​—Mateo 26:74.

Diad saman et bibistaen si Jesus, a mapatnag a diad bandad tagey na abung nen Caifas a walad petek na sular. Nayarin nanenengneng nen Pedro tan saray arum a manaalagar so iloloob tan ipapaway na nanduruman testigo.

Say punto na panagsalita nen Pedro ed lenguahe na Galilea et pakapatnagan a mantitila. Ontan met, samay sakey a wadman et kanayon nen Malco a tinapyas nen Pedro so layag to. Kanian inakusaan toy Pedro: “Agta sika imay anengneng kon kaiba tod hardin?” Sanen imburi iya nen Pedro diad mikatlon pankanawnawa, kinmukaok so lalong, unong ed impasakbay.​—Juan 13:38; 18:26, 27.

Diad saman, nayarin walad balkonahe si Jesus a manantandag ed sular. Linmingaw so Katawan tan ninengneng toy Pedro, a lapud saya et singa sasaksaken so puso to. Anonotan to may imbaga nen Jesus pigay oras ni labat so apalabas diad tagey a kuarto. Isip mo pa no antoy alikna nen Pedro nen amoria to no antoy ginawa to! Sikatoy pinmaway tan inmaki-akis.​—Lucas 22:61, 62.

Panon iyan agawa? Panon a si Pedro​—a mataletalek a mabiskeg so espiritualidad to tan matoor​—et imburi toy Katawan to? Pinikewet so katuaan, tan impasen si Jesus bilang sakey a bubusolen a kriminal. No kapigan kaukolan komon nen Pedro so manpakpel parad sakey ya anggapoy kasalanan, imbeneg to laingen imay walaan na “salita a mangitonton ed bilay ya andi-anggaan.”​—Juan 6:68.

Say makapaermen ya eksperiensya nen Pedro et mangipapanengneng ya anggan say toon walaan na pananisia tan debosyon et nayarin napelag no ag-akaparaan ed saray ag-iilaloan a subok tan tukso. Komon ta say agawad si Pedro et onkanan pasakbay ed amin a lingkor na Dios!