Obserbaan Mo Iray Pinalsa Pian Mas Nakabat Moy Jehova

1. Antoy sakey ya rason no akin ya lalon akabat nen Job si Jehova?

DIAD interon bilay nen Job, seguro say sakey ed saray agto nalinglingwanan et amay impitongtong nen Aman Jehova ed sikato. Imbaga nen Jehova ed si Job ya imanoen to iray nanduruman pinalsa. Akin ey? No ontan so gawaen nen Job, lalon nakombinse ya si Jehova so sankarunongan ed amin, tan sarasarag Ton asikasoen iray lingkor To. Singa bilang, anengneng nen Job ya agpapaulyanan nen Jehova iray ayayep, kanian seguradon asikasoen to met si Job. (Job 38:39-41; 39:1, 5, 13-16) Nen inobserbaan nen Job iray nanduruman pinalsa, lalo ton akabat so Dios.

2. Akin et nanairapan so arum ya obserbaan iray pinalsa nen Jehova?

² Nakabat tayo met so Dios no obserbaan tayo ray pinalsa to. Pero, ompan naiirapan tayon gawaen itan lapud nanduruman rason. Singa bilang, no syudad so panaayaman tayo, ompan puros bilding so walad kaliberliber, kanian daiset lay nanengneng tayon pinalsa na Dios. Tan anggano probinsya so panaayaman tayo, ompan busy tayo kanian ngalngali anggapoy panaon tayo ya obserbaan so kalikasan. Pero akin et importante ya walay panaon tayon obserbaan iray pinalsa nen Aman Jehova? Atan so pantongtongan tayod sayan artikulo. Pantongtongan tayo met no panon ya inusar nen Jehova tan Jesus iray walad kalikasan pian nibangat da tayo, tan no antoy gawaen tayo pian makaaral tayo ed saray pinalsa.

AKIN ET OBSERBAAN TAYO IRAY PINALSA?

3. Antoy patunay ya labay nen Jehova ya na-enjoy nen Adan iray pinalsa?

³ Labalabay nen Aman Jehova ya na-enjoy nen Adan iray nanduruman pinalsa. Impanayam na Dios si Adan ed marakdakep ya paraiso—diad hardin na Eden. Si Adan so inyasain to ya mangasikaso ed satan ya hardin, ya anggad magmaliw ya paraiso so interon dalin. (Gen. 2:8, 9, 15) Imadyin mo pay pambilib nen Adan nen first time ton naobserbaan so isimit na saray bukel tan say ibuskag na saray rosas. Talagan baleg ya pribilehyo ya sikato so apilin mangasikaso ed hardin na Eden! Say sakey nin asainmin to et ikdan to na ngaran iray ayayep. (Gen. 2:19, 20) Diad tua, sarag pa met nen Jehova ya sikato lay mangiter na ngaran ed saray ayayep, pero inmatalek to la itan ed si Adan. Seguradon inobserbaan nin maong nen Adan no antoy itsura tan kalareker na saray ayayep, insan inisip ton maong no anton ngaran so bagay da. Na-enjoy to itan ya maong! Anengneng to ya say Ama to et talagan marunong tan matalino ya designer.

4. (a) Antoy sakey ya rason akin et kaukolan tayon obserbaan iray pinalsa? (b) Antoy favorite mo ya pinalsa nen Aman Jehova?

⁴ Say sakey ya rason no akin ya obserbaan tayo ray pinalsa et lapud atan so labay nen Jehova ya gawaen tayo. Oniay imbaga to: “Tangay kayo pad tawen tan nengneng yo.” Tan oniay tepet to: “Siopay amalsa ed sarayan bengatla?” Amta tayo lay ebat. (Isa. 40:26) On, no ontangay tayod tawen, dakdakel so nanengneng tayon makapakelaw ya pinalsa nen Aman Jehova. Anggan say dalin tan dayat et napno na mararakep tan makapabilib ya pinalsa to. (Sal. 104:24, 25) Di ba, nai-enjoy tayo iratan? Mapatnag ya labay nen Jehova ya panliketan tayo iratan ta inikdan to tayoy limaran senses—say pakanengneng, pakarengel, pakalikna, pakataway, tan pakasingob.

5. Base ed Roma 1:20, antoy resulta no aralen tayo ray pinalsa nen Jehova?

⁵ Wala ni ibabaga na Biblia ya importantin rason no akin ya kaukolan tayon obserbaan iray pinalsa—lalo tayon nakabat tan natalosan iray ugali tan kualidad nen Aman Jehova. (Basaen so Roma 1:20.) Singa bilang, isip mo pa ray nanduruman design ya nanengneng diad kalikasan. Patunay iratan ya marundunong so Dios. Tan isip mo pa ray nanduruman naakan ya nai-enjoy tayon kanen. Patunay met itan ya inar-aro itayo nen Aman Jehova. No isipen tayo ray kualidad to ya nanengneng ed saray ginawa to, sikatoy mas nakabat tayo tan lalon onasingger so liknaan tayod sikato. Pantongtongan tayo natan no panon ya inusar nen Jehova iray pinalsa to bilang visual aid pian nibangat tod sikatayo iray importantin katuaan.

UUSAREN NA DIOS IRAY PINALSA PIAN NIBANGAT TO TAYO

6. Antoy naaralan tayo no obserbaan tayo iray ibon ya manma-migrate?

⁶ Walay tutumboken nen Jehova ya eskedyul. Kada taon, diad bandad sampot na Pebrero ya anggad kapegleyan na Mayo, nanengneng la na saray Israelita iray mantikyab ya dulakak ya mamapaarap ed norte. “Anggan say dulakak ed tawen et amta toy panaon na iyalis tod arum a pasen,” so kuan nen Jehova ed saray Israelita. (Jer. 8:7) On, walay inyeskedyul nen Jehova ya panaon no kapigan so iyalis o pan-migrate na saray dulakak. Segurado tayo sirin ya wala met lay inyeskedyul ton panaon pian deralen iyan mauges ya mundo. Kanian no makanengneng kay grupo na saray ibon no panaon lay panag-migrate da, komon ta nipanonot ed sika so katuaan ya seguradon onsabi so “aturon panaon” na panangukom nen Jehova.—Hab. 2:3.

7. Antoy naaralan tayo no obserbaan tayoy ititikyab na saray ibon? (Isaias 40:31)

⁷ Tutulongan tan papabiskegen nen Jehova iray lingkor to. Insipan nen Jehova ya pabiskegen to iray lingkor ton naksawan tan onkakapuy, tan “ontikyab iran singa walaay payak na agila.” (Basaen so Isaias 40:31.) Nensaman, mabetbet ya makakanengneng iray Israelita na mantikyab iran agila. Anggano ag-ikampay na saray agila so payak da, tuloytuloy labat so ititikyab da basta wala rad pasen ya kawalaan na ampetang ya dagem. No sarayan agila et tutulongan nen Aman Jehova pian ag-ira nairapan ya ontikyab, di sarasarag to sirin ya tulongan tan pabiskegen iray lingkor to. Kanian no makanengneng kay ibon ya tuloytuloy so ititikyab to anggano ngalngali agto ikampay so payak to, komon ta naisip mo ya sarasarag ka met ya pabiskegen nen Jehova pian nakayam iray problemam.

8. Antoy atalosan nen Job nen impaimano ed sikato nen Jehova iray nanduruman pinalsa, tan anto met so naaralan tayo?

⁸ Makapantiwala ka ed si Jehova. Singa abitla ed gapo, walay ginawa nen Jehova pian ombiskeg so tiwala nen Job ed sikato. (Job 32:2; 40:6-8) Kinatongtong toy Job tan impaimano to iray nanduruman pinalsa, singa saray bitewen, lurem, tan kirmat. Impaimano met nen Jehova iray ayayep, singa say toro tan kabayo. (Job 38:32-35; 39:9, 19, 20) Impaimano iratan nen Jehova ta labay ton na-realize nen Job ya sikatoy Dios ya marundunong, mabisbiskeg, tan maar-aro. Kayari na impantongtong da, lalon tinmibay so tiwala nen Job ed si Jehova. (Job 42:1-6) Kanian no imanoen tan aralen tayo met iray pinalsa, lalo tayon natalosan ya anggapoy makatalo ed karunongan tan biskeg nen Aman Jehova. No mantiwala tayod sikato, aliwan diad sarili tayo, nasarag tayo ray problema. Tan onsabi panaon et ekalen to lan amin iratan. Lanang tayo komon itan ya isipen pian ag-onkapuy so tiwala tayod sikato.

INUSAR NEN JESUS IRAY PINALSA PIAN MAS NAKABAT TAYOY AMA TO

9-10. Antoy naaralan tayo ed si Jehova diad pangiiter toy agew tan uran?

⁹ Kabkabisado nen Jesus so amin ya walad kalikasan. Nen ginawa nen Ama to so interon uniberso, ibabaga na Biblia ya si Jesus et walad abay To bilang “marundunong a komikimey.” (Pro. 8:30) Nen wadiad dalin si Jesus, inusar to ray nanduruman pinalsa pian ibangat ed saray disipulo to iray kualidad tan ugali nen Ama to. Pantongtongan tayoy pigara ed saratan.

¹⁰ Anggapoy pipilien nen Jehova ya panengnengan na panangaro. Diad samay Sermon ed Palandey, impaimano nen Jesus ed saray disipulo to so agew tan uran. Maslak ya totoo et ibabaliwala da labat iratan. Pero diad tua, no anggapo iratan, imposible so manbilay. Sarag pa met nen Jehova ya isiblet so agew tan uran ed saramay totoon agmandadayew ed sikato. Pero lapud maar-aro, “papasinagen toy agew . . . tan papepelagen toy uran” ed amin ya totoo. (Mat. 5:43-45) Impaimano itan nen Jesus pian na-realize tayo ya labay nen Jehova ya panengnengan tayoy panangaro so amin ya totoo. Kanian kada no naliknam so sinag na agew tan nanengneng moy terter na uran, dalepdep mo so panangaro nen Jehova ed amin ya totoo. Naalig tayo itan ya panangaro no anggapo met so pipilien tayon pulongan.

11. Akin et napaseseg tayo no nengnengen tayo ray siwit?

¹¹ Iter nen Jehova iray pankaukolan tayo. Wala ni imbaga nen Jesus diad samay Sermon ed Palandey. Impaimano to iray siwit, insan kuan to: “Imano yo pan maong iray ontitikyab a manok; ag-ira mantatanem na bukel odino manaani odino mantitipon diad saray kamalir, balet papakanen ira na Ama yod tawen.” Imadyin mo pay Jesus ya inturo to iray siwit ya mantiktikyab ed gilig na palandey, insan tinepetan to iray ondedengel ed sikato: “Agta mas mabli kayo ni nen say sikara?” (Mat. 6:26) Makapa-touch itan ya imbaga to, awa? Makatulong itan pian agtayo pandudaan ya asikasoen itayo nen Jehova. (Mat. 6:31, 32) Anggad natan et napapaseseg tayo ed satan ya imbangat nen Jesus. Niay sakey ya alimbawa. Aburidon maong so sakey ya kabataan ya payunir ed Spain nen aga makaanap na napanayaman to. Pero nen akanengneng iyan sister na saray siwit ya mantotoktok na bukel tan napnaplag ya prutas, binmiskeg so liknaan to. Kuan to: “Impanonot ed siak na saraman ya siwit ya no aasikasoen ira nen Jehova, di asikasoen to ak met.” Ag-abayag, akalmo lanlamang imay sister na napanayaman to.

12. Antoy naaralan tayo ed si Jehova no onnengneng tayod saray anuyaw? (Mateo 10:29-31)

¹² Importante ed si Jehova so kada lingkor to. Antis ya imbaki nen Jesus ya manpulong iray apostol to, walay imbaga to ya akatulong pian agda takotan iray onkontra ed sikara. (Basaen so Mateo 10:29-31.) Impaimano tod sikara so sakey ya klase na siwit ya inagew-agew dan nanenengneng—say anuyaw. Nen panaon nen Jesus, mamura labat iratan ya siwit. Pero oniay imbaga tod saray disipulo to: “Anggapo ed saratan so napelag ed dalin ya ag-amta na Ama yo.” Insan oniay impaseguro to: “Mas mabli kayo nen say dakel ya anuyaw.” On, labay ya ipa-realize nen Jesus ed saray disipulo to ya importante ed si Jehova so kada sakey ed sikara. No saray angkekelag ya anuyaw et iimanoen nen Jehova, anggapo sirin so nepeg dan takotan, ta mas mabli ira nen saray anuyaw. Seguro nen wala lad teritorya iray disipulo, nanonotan da imay imbaga nen Jesus kada no makanengneng iray anuyaw. Sika ey? Komon ta kada no makanengneng kay melag ya siwit, nanonotan mo ya importante ka ed si Jehova ta “mas mabli [ka] nen say dakel ya anuyaw.” Anggano dakel so onkontra ed pandadayew mo, anggapoy nepeg mon takotan ta tulongan to ka.—Sal. 118:6.

ANTOY GAWAEN TAYO PIAN NAOBSERBAAN TAYO RAY PINALSA TAN MAS NAKABAT TAYOY DIOS?

13. Antoy gawaen tayo pian makaaral tayo tungkol ed si Jehova diad saray pinalsa to?

¹³ Dakel ni naaralan tayo tungkol ed si Jehova diad saray pinalsa to. Anto sirin so gawaen tayo? Unona, dapat walay panaon tayo ya obserbaan iray pinalsa. Insan isipen tayo no antoy naaralan tayo ed saratan tungkol ed si Jehova. Pero no maminsan, aliwa itan ya mainomay. Oniay imbaga nen Sister Géraldine ya taga Cameroon: “Syudad so panaayaman ko, kanian talagan kaukolan koy man-effort pian naobserbaan ko ray pinalsa nen Jehova.” Oniay imbaga met na sakey ya elder, si Alfonso: “Seseguroen ko ya walay eskedyul ko ya manbukbukor pian naobserbaan ko ray pinalsa nen Aman Jehova tan nadalepdep ko no antoy naaralan kod saratan tungkol ed sikato.”

14. Antoy atalosan nen David nen dinalepdep to iray pinalsa nen Jehova?

¹⁴ Dinalepdep ya maong nen David iray pinalsa nen Jehova. Oniay imbaga tod Dios: “Sano nanenengneng koy katawenan, saray kimey mo, say bulan tan saray bitewen a ginawam, antoy kablian na sakey a too pian sikatoy nodnonoten mo?” (Sal. 8:3, 4) On, kada labi, no ontangay si David diad tawen tan nanengneng to ray bitewen tan bulan, agto labat iratan pambiliban. Dinalepdep to met no antoy naaralan to ed saratan tungkol ed Dios. A-realize to ya agaylay pakapanyari nen Aman Jehova. Dinalepdep met nen David no panon ya abuo so laman to nen sikatoy ilulukon ni. Pankelawan to no panon ya ombabaleg so ugaw diad eges na ina. Kanian lalo ton atalosan ya talagan marundunong ya Dios si Jehova.—Sal. 139:14-17.

15. Anton pinalsa so inobserbaan mo, tan antoy naaralan mod satan tungkol ed si Jehova? (Salmo 148:7-10)

¹⁵ Singa si David, agtayo la kailangan so onla nid arum ya lugar pian makaaral tayo ed saray pinalsa na Dios. Anggan dia labat ed kalibeliber, seguradon dakel lay nanengneng mo ya pakaaralan mod si Jehova. Singa bilang, no naliliknam so petang na agew, kasin naiisip moy pakapanyari nen Jehova? (Jer. 31:35) No makanengneng kay siwit ya manggagawa na ubong to, kasin ikokonektam itan ed karunongan na Dios? Seguro makalek ka no makanengneng kay uken ya uusilan toy ikol to. Pero kasin naiisip mo ya maliket ya Dios si Jehova tan wala met manayay sense of humor to? No makanengneng kay nanay ya pigagalawan toy baby to, kasin naiisip mon tampol so panangaro nen Jehova tan napakilos kan misalamat ed sikato? On, no gagalaen tayo, dakdakel so naaralan tayod si Jehova diad saray pinalsa to! Makaaral tayo ed amin ya ginawa nen Jehova—baleg man o melag, asingger man o arawi. Singa iratan mansasalita tan idadayew day Amalsa ed sikara.—Basaen so Salmo 148:7-10.

16. Antoy gawaen mo manlapud natan?

¹⁶ Talagan matattalino, maas-asikaso, mabisbiskeg, tan artistic so Dios tayo! Saratan ya kualidad to tan arum nin ugali to et sankanengneng diad saray pinalsa to. Importante sirin ya walay eskedyul tayon obserbaan tan i-enjoy iray ginawa nen Jehova tan isipen tayon maong no antoy naaralan tayod saratan tungkol ed sikato. No ontan so gawaen tayo, lalon onasingger so liknaan tayo ed Amalsa. (Sant. 4:8) Pantongtongan tayod ontumbok ya artikulo no panon ya usaren na atateng iray pinalsa pian lalon naar-aro na ananak da si Jehova.